რა ხდება უკრაინაში, სადაც მესამე დღეა შეიჭრა რუსეთი და ფართომასშტაბიან ომს აწარმოებს?

მოვლენების მოკლე ქრონოლოგია ასეთია:

• რუსეთი 24 თებერვალს, გამთენიისას შეიჭრა უკრაინაში სრულმასშტაბიანი ომი დაიწყო.
• შეჭრას წინ უძღოდა რუსეთის პრეზიდენტის მიერ უკრაინის სეპერატისტული დონბასის და ლუგანსკის დამოუკიდებლობის აღიარება.
• რუსეთის პრეზიდენტი ვლადიმირ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“.
• პარალელურად, დასავლეთის ქვეყნებმა, მათ შორის, აშშ-მ განაცხადეს, რომ რუსეთის აგრესიის საპასუხოდ აწესებენ მძიმე ეკონომიკურ სანქციებს.
• აშშ-მა 26 თებერვლის ღამეს ვოლოდიმირ ზელენსკის ქვეყნიდან ევაკუაცია შესთავაზა, თუმცა უკრაინის პრეზიდენტმა უარი განაცხადა და რჩება კიევში.
• 26 თებერვალს საქართველოს პრეზიდენტის ადმინისტრაციამ განაცხადა, რომ საფრანგეთის პრეზიდენტმა ემანუელ მაკრონმა სალომე ზურაბიშვილი საფრანგეთში მიიწვია.

ნეტგაზეთი განახლებად რეჟიმში გთავაზობთ 26 თებერვლის სიახლეებს უკრაინაში მიმდინარე ომის  შესახებ. სიახლეები გამოჩნდება გვერდის თქვენ მიერ განახლების (დარეფრეშების) შემდეგ.

მოვლენებს განახლებად რეჟიმში  შეგიძლიათ თვალი ადევნოთ ნეტგაზეთის ტელეგრამის არხზე: https://t.me/ambebiukrainidan;

ამბებს რუსულ ენაზე შეგიძლიათ თვალი ადევნოთ და გაუზიაროთ მეგობრებს უკრაინაში ნეტგაზეთის რუსული ვერსიიდან: ru.netgazeti.ge 

4:56 ხარკოვში რუსეთის თავდასხმის შემდეგ გაზსადენი აფეთქდა.

3:57 უკრაინის ქალაქ ვასილკოვში რუსეთმა ნავთობის საცავი აფეთქა, გაჩნდა ძლიერი ხანძარი.

00.20 ევროკომისიის პრეზიდენტმა ურსულა ფონ დერ ლაიენმა გამოაცხადა დასავლეთის ახალი სანქციების რუსეთის წინააღმდეგ, რაც ითვალისწინებს რუსული ბანკების „გარკვეული რაოდენობის“ SWIFT-დან გათიშვას; რუსეთის ცენტრალური ბანკის აქტივების გაყინვას და რუს ოლიგარქებისთვის დასავლეთის ბაზარზე წვდომის შეზღუდვას.

00.19 უკრაინის თავდაცვის ძალების სარდლობა აჯამებს სხვადასხვა დანაკარგს, რომელიც, მისი თქმით, რუსეთმა უკრაინასთან ომში 26 თებერვალს განიცადა.

• 1 დღეში რუსებმა დაკარგეს 11 ვერტმფრენი, 3 SU-30, 2 SU-25 და სხვა ტექნიკა — უკრაინა

22.58 — საქართველოს პრეზიდენტი სალომე ზურაბიშვილი უკრაინის პრეზიდენტ ვოლოდიმირ ზელენსკის ტელეფონით ესაუბრა. ამის შესახებ ზურაბიშვილი ტვიტერზე წერს.

• სალომე ზურაბიშვილი ვოლოდიმირ ზელენსკის ტელეფონით ესაუბრა

22.16 გერმანიის კანცლერის განცხადებით, მისი ქვეყანა უკრაინას იარაღს მიაწვდის.

• უკრაინას ტანკსაწინააღმდეგო იარაღსა და სტინგერებს მივაწვდით — შოლცი

21.46 გერმანიამ ნიდერლანდებს უფლება მისცა, გაუგზავნოს უკრაინას გერმანული წარმოების 400 ნაღმტყორცნი(RPG) რუსეთის წინააღმდეგ საბრძოლველად. ინფორმაციას ევროპული გამოცემები ავრცელებენ.

• ბერლინი დათანხმდა ნიდერლანდებიდან უკრაინაში გერმანული იარაღის ექსპორტს — მედია

20.47  უკრაინის საჰაერო ძალების სარდლობის ცნობით, შეიარაღებული ძალების საზენიტო-სარაკეტო ქვედანაყოფმა ჩამოაგდო რუსული გამანადგურებელი Су-30, რომელიც შავი ზღვის თავზე დაფრინავდა.

• რუსული Su-30 ჩამოვაგდეთ — უკრაინის საჰაერო ძალები

19.30
თბილისში სოლიდარობის მორიგი აქცია იწყება, აქციის მონაწილეები საქართველოს ჰიმნს მღერიან:

19.00  უკრაინის პრეზიდენტი ვოლოდიმირ ზელენსკი თურქეთის პრეზიდენტ რეჯეფ ტაიპ ერდოღანს მადლობას უხდის მხარდაჭერისთვის. ამასთან, ის კიდევ ერთხელ ამახვილებს ყურადღებას შავ ზღვაში რუსული სამხედრო ხომალდების გადაადგილების შეზღუდვის მნიშვნელობაზე.

• შავ ზღვაში რუსული გემების შეზღუდვა უმნიშვნელოვანესია – ზელენსკი ერდოღანს

18. 40  პოლონეთის პრეზიდენტი ანჯეი დუდა უკრაინის ევროკავშირში გაწევრების ინიციატივით გამოდის.

უკრაინა სწრაფად უნდა გახდეს EU-ს წევრი – პოლონეთის პრეზიდენტი

17.25  უკრაინის საგარეო საქმეთა მინისტრის განცხადებით, რუსული პროპაგანდის ნაწილია ის, რომ თითქოს უკრაინა რუსეთში ატომური ბომბის ჩამოგდებას აპირებს.

• უკრაინა არ გეგმავს რუსეთში ატომური ბომბის ჩამოგდებას, ეს სიყალბეა – კულება

16. 40 რუსეთის „ინფორმაციული ტექნოლოგიებისა და მასობრივი კომუნიკაციების ზედამხედველობის ფედერაციული სამსახური“, Роскомнадзор-ი რუსულ ანტისამთავრობო მედიასაშუალებებს „ყალბი ინფორმაციის გავრცელებაში“ ადანაშაულებს და ემუქრება, თუკი ინფორმაციას არ წაშლიან, მათზე წვდომას შეზღუდავს.

26 თებერვალს გამოქვეყნებულ განცხადებაში უწყება წერს, რომ „გამოვლინდა ყალბი ინფორმაციის გავრცელების ფაქტები“ 10 მედიასაშუალებაში.

• Роскомнадзор-ი კრიტიკულ მედიას „ყალბი ამბების“ გავრცელებაში ადანაშაულებს და ემუქრება

16. 35 საფრანგეთმა ლა-მანშის სრუტეში რუსული სატვირთო გემი, სახელად „Baltic Leader“ დააკავა.

• საფრანგეთმა სანქციების გამო, რუსული გემი დააკავა

16. 00 საქართველოს მთავრობის განკარგულებით, უკრაინაში მიმდინარე მოვლენებთან დაკავშირებით დაზარალებული მოსახლეობის დასახმარებლად, მთავრობის სარეზერვო ფონდიდან 1 მილიონი ლარი გამოიყოფა

• მთავრობა უკრაინაში დაზარალებული მოსახლეობისთვის 1 მილიონი ლარს გამოყოფს

15. 50  ევროპული საბჭოს პრეზიდენტმა, შარლ მიშელმა სალომე ზურაბიშვილი უახლოეს დღეებში ბრიუსელში სამუშაო ვიზიტით მიიწვია. ამის შესახებ ინფორმაციას საქართველოს პრეზიდენტის ადმინისტრაცია ავრცელებს.

• შარლ მიშელმა ზურაბიშვილი ბრიუსელში მიიწვია

15.10 უკრაინის ვიცე-პრემიერი ირინა ვერეშჩუკი წითელი ჯვრის საერთაშორისო საზოგადოებას მიმართავს, გადაასვენონ უკრაინის ტერიტორიაზე დაღუპული ჯარისკაცების ცხედრები.

„გადაასვენეთ ათასობით ოკუპანტის ცხედარი რუსეთში“ – უკრაინის ვიცე-პრემიერი წითელ ჯვარს

14.58  საქართველოს პრეზიდენტის ადმინისტრაციის ცნობით, სალომე ზურაბიშვილსა და საფრანგეთის პრეზიდენს, ემანუელ მაკრონს შორის, უკრაინაში მიმდინარე მოვლენების შესახებ სატელეფონო საუბარი შედგა.

მაკრონმა ზურაბიშვილი პარიზში მიიწვია

14.20 საქართველომ, 80 სხვა სახელმწიფოსთან ერთად, თანასპონსორობა გაუწია გაეროს უსაფრთხოების საბჭოს რეზოლუციას, რომელსაც რუსეთმა ვეტო დაადო. აღნიშნული საკითხი გაეროს გენერალურ ასამბლეაში გადაინაცვლებს, – აცხადებს საქართველოს საგარეო საქმეთა სამინისტრო.

უკრაინის მხარდამჭერი რეზოლუციის თანასპონსორი საქართველოცაა

13. 41  უკრაინის ჯანდაცვის მინისტრის ვიქტორ ლიაშკოს განაცხადებით, რუსეთის სრულმასშტაბიანი თავდასხმის შედეგად დაიღუპა 198 ადამიანი, მათ შორის 3 ბავშვი.

რუსეთის თავდასხმის შედეგად დაიღუპა 198 ადამიანი, მათ შორის 3 ბავშვი – უკრაინის ჯანდაცვის მინისტრი

13. 10 უკრაინის საგარეო საქმეთა მინისტრის, დმიტრო კულებას განცხადებით, კვიპროსი არ დაბლოკავს რუსეთის SWIFT-ის სისტემიდან გათიშვის გადაწყვეტილებას.

შევძელით, კვიპროსი არ შეეწინააღმდეგება SWIFT-იდან რუსეთის გათიშვას – კულება

12. 45 კიევის მერის, ვიტალი კლიჩკოს განცხადებით, კიევის მეტრო მხოლოდ თავშესაფრის ფუნქციას შეასრულებს და ტრანსპორტირებისთვის აღარ გამოიყენებენ.

კიევის მეტრო თავშესაფრად გადაკეთდა, მატარებლები აღარ ივლიან – კლიჩკო

12. 43  კიევის მერის ვიტალი კლიჩკოს ცნობით, ღამის მანძილზე საბრძოლო მოქმედებების შედეგეად დაჭრილია 35 უკრაინის მოქალაქე, მათ შორის ორი ბავშვი.

11:45 – რუსეთის თავდაცვის სამინისტრო აცხადებს, რომ რუსმა ჯარისკაცებმა კონტროლი დაამყარეს ქალაქ მელიტოპოლზე. ჯერჯერობით სხვა წყარო ამ ინფორმაციას დამოუკიდებლად ვერ ადასტურებს. უკრაინის მთავრობას ამაზე კომენტარი ჯერ არ გაუკეთებია.

• რუსეთი ამბობს, რომ მელიტოპოლი აიღეს – უკრაინა ჯერ არ ადასტურებს

11:00 – კიევის რეგიონის ვიშგოროდსკის რაიონში რუსების 100-მდე ჯავშანმანქანა მოძრაობს – UNIAN

10:45 – ფეისბუკის უსაფრთხოების პოლიტიკის მიმართულების ხელმძღვანელმა, ნათანიელ გლაიკერმა ტვიტერზე დაწერა, რომ ფეისბუკმა რუსულ სამთავრობო მედიასაშუალებებს საკუთარ პლატფორმებზე რეკლამების განთავსება აუკრძალა.

• ფეისბუკმა რუსულ სამთავრობო მედიას რეკლამები აუკრძალა

10:30 – უკრაინელებმა 26 თებერვლის დილას ჩამოაგდეს უკვე მეორე Il-76, – მძიმე სამხედრო სატრანსპორტო თვითმფრინავი. პირველი Il-76 ჩამოაგდეს ვასილკოვთან, მეორე კი ქალაქ ბელაია-ცერკოვთან (Біла Церква), რომელიც დედაქალაქისგან 85 კმ-ით (სამხრეთით) არის დაშორებული.

• უკრაინელებმა რუსეთის მეორე Il-76 ჩამოაგდეს – AP

10:15 – უკრაინის პრეზიდენტი ვოლოდიმირ ზელენსკი ვიდეო ვრცელებს, რომ „ფეიკნიუსებს“ არ დაუჯერონ. მისი თქმით, ის უკრაინაშია და ქვეყნის დაცვას გრძელდება. ზელენსკის თქმით, არ დაუჯერონ ინფორმაციას, რომ ის  დანებებას აპირებს და იარაღს აბარებს.

• მე აქ ვარ, იარაღს არ დავყრით, ნუ დაუჯერებთ „ფეიკებს“ – ზელენსკი

09:50 – სადაზღვევო კომპანიებმა შავ ზღვაში შემავალ გემებზე ტვირთის დაზღვევის ფასები კიდევ გაზარდეს.

• შავ ზღვაში გემების ტვირთის დაზღვევის თანხა გაიზარდა

09:30 – კომპიუტერული ჩიპების (ნახევარგამტარების) გლობალურმა ინდუსტრიამ, შეერთებული შტატების მიერ რუსეთისთვის უკრაინაში შეჭრის გამო დაწესებული სანქციების ფონზე, რუსეთში გაყიდვები შეწყვიტა.

• კომპიუტერული ჩიპების ინდუსტრიამ რუსეთში გაყიდვები შეაჩერა – WaPo

09:25 – შტატების პრეზიდენტის ადმინისტრაცია კონგრესს უკრაინისთვის დამატებით 6.4 მლრდ აშშ დოლარის ოდენობის დახმარების გამოყოფას სთხოვს. დილის საათებში თეთრმა სახლმა უკვე გამოყო 350 მლნ აშშ დოლარი.

• შტატები უკრაინისთვის $6.4 მლრდ-ის გამოყოფას გეგმავს, $350 მლნ უკვე გამოიყო

09:15 – საქართველოში აშშ-ს ყოფილი ელჩის, იან კელის თქმით, საქართველოს პრემიერ-მინისტრ ირაკლი ღარიბაშვილის განცხადება, რომ საქართველო რუსეთის წინააღმდეგ სანქციებს არ შეუერთდება, აგრესორის გვერდით დგომას ნიშნავს.

• ღარიბაშვილის განცხადება აგრესორის გვერდით დგომას ნიშნავს – იან კელი

09:10 – უკრაინის დედაქალაქის, კიევი ქუჩებში ბრძოლა მიმდინარეობს. დედაქალაქის მთავრობა მოსახლეობას მოუწოდებს, სახლში დარჩნენ ხოლო სირენის შემთხვევაში – თავშესაფარში დაიმალნონ.

• კიევის ქუჩებში ბრძოლა მიმდინარეობს

09:00 – ღამის განმავლობაში არაერთი ცნობა გავრცელდა უკრაინის დედაქალაქ კიევის გარშემო მძიმე ბრძოლების შესახებ. იტყობინებიან რთულ ვითარებასა და აფეთქებებზე კიევის შიგნითაც.

• ვრცელდება ცნობები აფეთქებებზე კიევში, მძიმე ბრძოლებზე მის გარშემო