დღეს, 21 ნოემბერს საქართველოს საპარლამენტო არჩევნების მეორე ტური იმართება, თუმცა მას ოპოზიცია ბოიკოტს უცხადებს, რადგან მიიჩნევს, რომ არჩევნები გაყალბდა და ცესკოს ოფიციალური მონაცემი არ ასახავს რეალობას. 

მეორე ტური იმართება 17 მაჟორიტარულ ოლქში, სადაც, ოფიციალური მონაცემებით, პირველ ტურში კანდიდატებმა ვერ დააგროვეს ხმების სათანადო რაოდენობა – არჩევნებზე მისულთა ხმების 50%-ზე მეტი. 

ცესკოს მონაცემით, პირველ ტურში 13 მაჟორიტარულ ოლქში “ქართული ოცნების” კანდიდატებმა გაიმარჯვეს. 

პოლიტიკური ბოიკოტის მიუხედავად, ფორმალურად, საარჩევნო კანონმდებლობის შესაბამისად, არჩევნების მეორე ტურში მონაწილეობს 31 ოქტომბრის არჩევნებში შესაბამის მაჟორიტარულ ოლქებში საუკეთესო შედეგის მქონე ორი კანდიდატი,  ჯამში 6 საარჩევნო სუბიექტის წარდგენილი კანდიდატები.  

ცესკოს ცნობით, 21 ნოემბერს მეორე ტურზე, ამომრჩევლებს 1914 საარჩევნო უბანი და გამონაკლის შემთხვევაში შექმნილი 9 უბანი მოემსახურება; საარჩევნო ადმინისტრაცია იუწყება, რომ სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფ ამომრჩევლებს, მათი არჩევნებში მონაწილეობის უზრუნველყოფის მიზნით შექმნილია 80 სპეციალური საარჩევნო უბანი.

ამომრჩეველთა საერთო რაოდენობა კი 2 140 210-ია.

ცესკომ მეორე ტურისთვის როგორც სადამკვირვებლო, ისე მედიაორგანიზაციებს და საარჩევნო სუბიექტების წარმომადგენლებს გაუგრძელა რეგისტრაცია/აკრედიტაციის ვადა. თუმცა მეორე ტურს ოპოზიციის ბოიკოტის გამო სადამკვირვებლო ორგანიზაციები შემცირებული რესურსებით დააკვირდებიან, ოპოზიციურმა პარტიებმა კი საარცევნო უბნებიდან გაიწვიეს თავიანთი დამკვირვებლები. 

არჩევნების მეორე ტურის გამო მთავრობამ ორი დღით მოხსნა კოვიდ 19-ის პანდემიის გამო დადგენილი შეზღუდვები ღამის საათებში გადაადგილებაზე. 

საარჩევნო კანონმდებლობით მნიშვნელობა არა აქვს ამომრჩეველთა რა ნაწილი მიღეებს მონაწილეობას მეორე ტურში – გამარჯვებული მონაწილეთა უმრავლესობის ხმებით მიხედვით გამოვლინდება. 

მოკლედ 2020 წლის საპარლამენტო არჩევნებზე:

• საპარლამენტო არჩევნები 31 ოქტომბერს გაიმართა და ცესკოს მონაცემებით სათანადო ბარიერი 8 პოლიტიკურმა სუბიექტმა გადალახა. 
• არჩევნების შედეგებს არალეგიტიმურად მიიჩნევს ყველა ოპოზიციური პარტია, რომლებმაც ოფიციალური მონაცემებით, არჩევნებზე 1%-იანი ბარიერი გადალახეს. 
• ისინი უარს აცხადებენ პარლამენტში შესვლაზე და ხელახალ კენჭისყრას ითხოვენ. 
• საპარლამენტო მანდატებზე უარს 8 ოპოზიციური პარტია ამბობს. ესენი არიან: “ერთიანი ნაციონალური მოძრაობა – ძალა ერთობაშია”, “ევროპული საქართველო”, “სტრატეგია აღმაშენებელი”, “ლელო”, “პატრიოტთა ალიანსი”, “გირჩი”, “მოქალაქეები”, “ლეიბორისტული პარტია”.

ცესკოს მონაცემებით, 2020 წლის პროპორციულ არჩევნებში პარტიებმა ხმების შემდეგი რაოდენობა მიიღეს: 

1. „ქართული ოცნება“ – 48.22% / 928004 ხმა [61 მანდატი]
2. ნაციონალური მოძრაობა- “ძალა ერთობაშია” – 27.18% /523123 ხმა  [34 მანდატი + 1 გაუნაწილებელი მანდატი] 
3. ევროპული საქართველო – (3.79%, 72986 ხმა) 4 მანდატი + 1 გაუნაწილებელი მანდატი]
4. სტრატეგია აღმაშენებელი –  3.15%/60671 ხმა –  [4 მანდატი]
5. ლელო –  3.15%/ 60712 ხმა – [4 მანდატი ]
6. პატრიოტთა ალიანსი – 3.14%/60480 ხმა – [4 მანდატი]
7. გირჩი – 2.89%/55598 ხმა- [3 მანდატი + 1 გაუნაწილებელი მანდატი]
8. ალეკო ელისაშვილის „მოქალაქეები“ – 1.33%/25508 ხმა – 1 მანდატი + 1 გაუნაწილებელი მანდატი; 
9. ლეიბორისტები –  1% /19314 ხმა –  [1 მანდატი ]

ოპოზიციური პარტიები ამ შედეგებს გაყალბებულს უწოდებენ.