ახალქალაქის, კუმურდოსა და კარის მიტროპოლიტ ნიკოლოზის განცხადებით, ორი წელია სამების საკათედრო ტაძარში მატრონა მოსკოველის ხატს უყურებს, თუმცა ამ ხატზე სტალინის ფრაგმენტი ვერ შეამჩნია. ამის შესახებ მან „ტვ პირველთან“ ისაუბრა.

მიტროპოლიტის თქმით, ის, რომ სტალინი მატრონასთან მივიდა სახლში და დახმარება სთხოვა, გამოგონილი ისტორია და, როგორც ჩანს, ვიღაცას მატრონა მოსკოველის ხატის წერისას ეს ფრაგმენტი „გაეპარა“.

„მაგალითად, მე ორი წელია ამ ხატს ვუყურებ და [სტალინი] ვერ შევამჩნიე საერთოდ. იცით, რატომ ვერ შევამჩნიე? – იმიტომ, რომ ეს არის დიდი ხატი, რომელსაც რომ უყურებ, ჯერ წმინდა მატრონას გამოსახულებას უყურებ, რომელიც უდიდესი წმინდანია, და შემდეგ თუ გაინტერესებს, ძალიან ახლოს უნდა მიხვიდე და დაათვალიერო მისი ცხოვრების სცენები გარშემო, რომელიც, როგორც წესი, ხატებზე რომ გამოიხატება, თუ არ იცი თვითონ ცხოვრება, ამ სცენების მიხედვით ისე ვერ აღიქვამ.

ეს არის ხატწერა და არა მხატვრობა. სტალინის ისტორია, რომ სტალინი მატრონასთან მივიდა სახლში და დახმარება სთხოვა, ეს არის გამოგონილი ისტორია. ის, რაც ამას მოჰყვა, არის ნამდვილი ვანდალიზმი. ეს არ შეიძლება, ეს არ არის საუბრის და ურთიერთობის გზა. თუ ასეთი რამ მოხდა და ვიღაცას გაეპარა [სტალინის გამოსახულება], ამაში სასკანდალო და საჩხუბარი არაფერი არ არის. შემომწირველებმა განაცხადეს, რომ წაიღებენ. იმხელა ხატს ასე ხელს ხომ ვერ მოკიდებ და წაიღებ, მომზადება სჭირდება. წაიღებენ აუცილებლად და გადაწერენ”, – განაცხადა მიტროპოლიტმა ნიკოლოზმა.

11 იანვარს, საქართველოს საპატრიარქომ გაავრცელა განცხადება, რომლის თანახმად, სტალინის გამოსახულებიან ხატში „ცვლილებების შეტანას“ გეგმავენ, ამის მიზეზი კი, წმინდა მატრონასთან სტალინის შეხვედრის დამადასტურებელი არასაკმარისი მტკიცებულებებია.

• ხატზე სტალინის გამოსახვას პოლონეთის საელჩო საბჭოთა რეჟიმის მსხვერპლთა სტატისტიკით ეხმაურება
• სოვლაბი საპატრიარქოს მოუწოდებს, გაიტანოს ხატი სტალინის გამოსახულებით სამებიდან
• “სტალინის გამოსახულებით ხატი მზაკვრული ჩანაფიქრის ნაწილია” – ინტერვიუ მირიან გამრეკელაშვილთან