ემუქრება თუ არა უკვე მეორედ ჩაგდება საარჩევნო სისტემასთან დაკავშირებულ საკონსტიტუციო ცვლილებებს იმ ფონზე, როდესაც “ნაციონალური მოძრაობა” და “ევროპული საქართველო” 8 მარტის შეთანხმების შესრულების წინაპირობად პოლიტიკური პატიმრების გათავისუფლებას აყენებენ, ხელისუფლება კი აცხადებს, რომ საქართველოში პოლიტპატიმრები არ არიან და ელჩების შუამავლობით გამართულ მოლაპარაკებებზე არავის გათავისუფლების პირობა არ დაუდიათ?

საკონსტიტუციო ცვლილებების განხორციელებას პარლამენტის სრული შემადგენლობის არანაკლებ სამი მეოთხედის, ე.ი. 113 დეპუტატის მხარდაჭერა სჭირდება. ამ დროისთვის საქართველოს პარლამენტში 149 დეპუტატი ირიცხება, აქედან 93 წევრი – “ქართული ოცნების” საპარლამენტო უმრავლესობაში. მაშასადამე, დაპირებული საკონსტიტუციო ცვლილებების მისაღებად “ქართულ ოცნების” ხმების გარდა დამატებით 20 დეპუტატის მხარდაჭერაა საჭირო.

“ერთიანი ნაციონალური მოძრაობა” აცხადებს, რომ 8 მარტის შეთანხმების სრულად შესრულების გარეშე, რაც “ითვალისწინებს როგორც პოლიტიკური პატიმრების გათავისუფლებას, ასევე, პოლიტიკური დევნის შეწყვეტას”, საარჩევნო სისტემასთან დაკავშირებულ საკონსტიტუცო ცვლილებებს მხარს არ დაუჭერს.

“ევროპული საქართველოში” აცხადებენ, რომ საარჩევნო სისტემა 120/30 თანაფარდობით არის კომპრომისული ვარიანტი, რომელსაც პარტია მხოლოდ პოლიტიკური პატიმრების გათავისუფლების გამო დათანხმდა და ამ პირობის შეუსრულებლობის შემთხვევაში, “ოცნების” უფრო მწარედ დასამარცხებლად სჯობს, არჩევნები დღეს არსებული 77/73-ზე სისტემით ჩატარდეს.

“120/30-ზე თანაფარდობა არ მიგვაჩნია სისტემურ ცვლილებად, მაგრამ დავთანხმდით სწორედ პოლიტპატიმრების ნაწილის გამო, კომპრომისული ვარიანტი იყო. რატომ უნდა წავიდე კომპრომისულ ვარიანტზე, თუ კომპრომისის საფუძველი არ იქნება შესრულებული?! ამიტომ, ბუნებრივია, ჩვენ მხარს არ დავუჭერთ ამ სისტემისთვის არცთუ ისე მნიშვნელოვან ცვლილებას”, – განუცხადა “ნეტგაზეთს” დეპუტატმა აკაკი ბობოხიძემ.

მისი თქმით, თუ იქნებოდა 130/20-ზე თანაფარდობა, ასეთ შემთხვევაში, ოპოზიცია იზრუნებდა პოლიტპატიმრების გათავისუფლებაზე, მაგრამ “არ მიაბამდა” ამ საკითხს საარჩევნო სისტემის ცვლილებას, ვინაიდან 130/20-ზე უკვე პრაქტიკულად სისტემური ცვლილებაა.

“თუ სისტემური ცვლილება არ არის, ჩემთვის 77/73-ზე და 120/30-ზე პრაქტიკულად ერთი და იგივე სისტემაა. თუ ჩააგდებს [ხელისუფლება], ჩააგდოს. ოპოზიციაზე პასუხისმგებლობას ვერ გადმოიტანს, იმიტომ, რომ ხმის მიცემის გადაწყვეტილება ეფუძნებოდა პირველი ნაწილის შესრულებას (პატიმრების გათავისუფლებას). თუ ხელისუფლება მარცხდება, დამარცდხება 120/30-ის პირობებში და კიდევ უფრო მწარედ დამარცხდება 77/73-ის პირობებში, იმიტომ, რომ ეს არის სისტემა, სადაც დამარცხებული მწარედ მარცხდება, ხოლო გამარჯვებულს იმაზე მეტი ხვდება, ვიდრე მას ეკუთვნის. თუ ჩვენ ვიმარჯვებთ, 77/73-ში იმაზე მეტი შეგვხვდება, ვიდრე გვეკუთვნის”. როცა “ოცნების” დამარცხება/არდამარცხებაზეა მხოლოდ საუბარი, ამ შემთხვევაში გარწმუნებთ, რომ 120/30-ს 77/73 ჯობია. ოღონდ თუ სისტემური ცვლილება იქნება და ქვეყანა ნორმალურ საარჩევნო რეჟიმს დაუახლოვდება, მაშინ ამისთვის, ბუნებრივია, ღირს ნაბიჯის გადადგმა”, – განაცხადა აკაკი ბობოხიძემ.

საპარლამენტო უმრავლესობა აცხადებს, რომ „ქართული ოცნების“ გუნდი სრულად დაუჭერს მხარს იმ სისტემას, რომელიც შეთანხმდა მხარეებს შორის და საკონსტიტუციო ცვლილებების ჩავარდნის შემთხვევაში პასუხისმგებლობას ოპოზიციას აკისრებს.

“ჩვენ შეგვიძლია გარანტირებულად ვილაპარაკოთ, რომ „ქართული ოცნების“ საპარლამენტო გუნდი მხარს დაუჭერს პროექტს და იმის იქით, ოპოზიციიდან ვინ მხარს დაუჭერს და ვინ არა, გამოჩნდება. თუ ისინი ჩააგდებენ პროექტს და მათი მხარდაჭერის არარსებობის პირობებში ჩავარდება, ყველა დაინახავს, ვის გამო ჩავარდა ეს პროექტი და ვისი სპეკულაციების ფონზე“, – განაცხადა საპარლამენტო უმრავლესობის ლიდერმა მამუკა მდინარაძემ.

ენმ-ისა და “ევროპული საქართველოს” ფრაქციების გარდა, პარლამენტში ორი ოპოზიციური ფრაქციაა: “დამოუკიდებელი დეპუტატები” 6 წევრით და ” პატრიოტთა ალიანსი და სოციალ-დემოკრატები” 7 წევრით. ორივე მათგანში “ნეტგაზეთს” განუცხადეს, რომ კენჭისყრაზე საკონსტიტუციო ცვლილებების სასარგებლოდ მისცემენ ხმას.

თეორიულად თუ ჩავთვლით, რომ “ქართული ოცნება”, “პატრიოტთა ალიანსი” და “დამოუკიდებელი დეპუტატები” კენჭისყრის დღეს სრული შემადგენლობით იქნებიან მობილიზებულნი და 106 ხმას შეაგროვებენ, საკონსტიტუციო ცვლილებების მისაღებად დამატებით უფრაქციო, დამოუკიდებელი დეპუტატების 7 ხმა იქნება საჭირო. პარლამენტში ამჟამად 17 დეპუტატია (გიორგი ბეგაძე, ეკა ბესელია, გიგა ბუკია, ბიძინა გეგიძე, ნინო გოგუაძე, ალექსანდრე ერქვანია, გიორგი მოსიძე, ბექა ნაცვლიშვილი, რამაზ ნიკოლაიშვილი, ირინე ფრუიძე, თამარ ჩუგოშვილი, ნატო ჩხეიძე, დიმიტრი ცქიტიშვილი, ზვიად ძიძიგური, დავით ჭიჭინაძე, თამარ ხულორდავა და ზაზა ხუციშვილი), რომელიც არცერთ ფრაქციაში არ არის გაერთიანებული და მათი უმრავლესობა უფრო მეტად პროპორციული საარჩევნო სისტემის მომხრეა. შესაბამისად, ამ სცენარით საკონსტიტიტუციო ცვლილებისთვის საჭირო ხმები იმ შემთხვევაშიც მიიღწევა, თუ ენმ და ევროპული საქართველო კენჭისყრაში მონაწილეობას არ მიიღებენ.

საქართველოს პარლამენტის წევრის, გია ჟორჟოლიანის აზრით, საკონსტიტუციო ცვლილებებისთვის საჭირო ხმები შესაძლებელია მოგროვდეს “ნაციონალური მოძრაობის” და “ევროპული საქართველოს” გარეშეც, “ქართული ოცნების” წევრი 93 და სხვა დეპუტატებისგან, რომელთა უმრავლესობამ საჯაროდ არაერთხელ დააფიქსირა, რომ მხარს უჭერენ საკონსტიტუციო ცვლილებებს.

“მე მგონია, მთლიანობაში, დღევანდელი წამოჭრილი დისკუსია არის ქარიშხალი ჭიქაში. როგორც ერთი, ისე მეორე მხარე, ცდილობს, ერთმანეთს წაუყენოს ბრალდებები. შესაძლოა, არცერთი მათგანი არ არის მოსურნე, რომ ეს ცვლილებები იქნას მიღებული”, – განაცხადა ჟორჟოლიანმა.

დამოუკიდებელი დეპუტატი თამარ ხულორდავა “ქართულ ოცნებას” მოუწოდებს, საკონსტიტუციო ცვლილებების პროექტი პარლამენტში შეიტანოს და ხმა მისცეს მას, მიუხედავად იმისა, თუ რას აცხადებენ ნაციონალურ მოძრაობაში.

“ქართული ოცნების სრული მხარდაჭერის შემთხვევაში, დამოუკიდებელი დეპუტატების ჯგუფთან ერთად, საკონსტიტუციო ცვლილებების მიღება შესაძლებელი იქნება. წინააღმდეგ შემთხვევაში, უკვე მეორედ დადებული პირობის არშესრულება ძალიან ძვირი დაუჯდება საქართველოს ხელისუფლებას. ამას ვერც ოპოზიციის სიჯიუტით გაამართლებენ და ვერც კორონავირუსით დაჩრდილავენ. პირობის მეორედ არშესრულება არის ქვეყნის იზოლაციაში მოქცევის და არა განვითარების გზა. და ეს სულაც არ მახარებს”, – აცხადებს ხულორდავა.

დაახლოებით მსგავსი პოზიცია აქვს კიდევ ერთ დამოუკიდებელ დეპუტატ თამარ ჩუგოშვილს, რომელიც ხულორდავას მსგავსად ასევე უჭერს მხარს საარჩევნო სისტემის ცვლილებას.