ევროპის საბჭოს მაღალი რანგის ოფიციალური პირები გმობენ თბილისში 5 ივლისს მომხდარ ძალადობრივ მოვლენებს და სახელმწიფოს მოუწოდებენ გამოხატვისა და მშვიდობიანი შეკრების უფლების დაცვისკენ.
“ვგმობთ ძალადობრივ შეტაკებებს TbilisiPride21-ის ჩატარებამდე, რამაც გამოიწვია პრაიდის გაუქმება ლგბტქი თემზე მუქარისა და ჟურნალისტების მიმართ ძალადობრივი თავდასხმების შემდეგ. სახელმწიფომ უნდა უზრუნველყოს და დაიცვას გამოხატვის თავისუფლება და მშვიდობიანი შეკრების უფლება”, — ნათქვამია ევროპის საბჭოს გენერალური მდივნის სპიკერის, დენიელ ჰოლტგენის მიერ გავრცელებულ ტვიტერის პოსტში.
We condemn the violent clashes today ahead of #TbilisiPride21, leading to its cancellation after threats to the LGBTI community and attacks on journalists. Freedom of expression and peaceful assembly must be ensured and protected by the state @coe @MarijaPBuric
— Daniel Holtgen (@CoESpokesperson) July 5, 2021
ევროპის საბჭოს ადამიანის უფლებათა კომისრის, დუნია მიატოვიჩის განცხადებით, ხელისუფლება ვალდებულია, დასაჯოს თავდამსხმელი დამნაშავეები.
“ძალადობა აქტივისტებისა და ჟურნალისტების მიმართ TbilisiPride21 – ის დროს არის სავალალო ილუსტრაცია იმისა, რომ #LGBTI ადამიანები აწყდებიან განმეორებით მუქარებს საქართველოში. ხელისუფლების ვალდებულებაა დაიცვას ადამიანის უფლებები, მათი გამოხატვისა და შეკრების თავისუფლება, დაიცვას დემონსტრანტებისა და ჟურნალისტების უსაფრთხოება და დასაჯოს თავდამსხმელი დამნაშავეები”, — აცხადებს დუნია მიატოვიჩი.
The violence v activists &journalists in #TbilisiPride21 is a woeful illustration of repeated threats #LGBTI ppl face in #Georgia.Authorities have the #humanrights obligations to uphold freeexpression&assembly,ensure demonstrators& journalists’ safety & punish the perp of attacks
— Commissioner for Human Rights (@CommissionerHR) July 5, 2021
5 ივლისს თბილისში დაგეგმილი “ღირსების მარშის” წინააღმდეგ ძალადობრივი ჯგუფები ქალაქის სხვადასხვა უბანში თავს ესხმოდნენ მედიის წარმომადგენლებს. ასევე, დაარბიეს “სირცხვილიასა” და “თბილისი პრაიდის” ოფისები და კვერცხები დაუშინეს პარტია “გირჩის” ოფისს.
თავს დაესხნენ, სულ მცირე, მედიის 50-მდე წარმომადგენელს. ასევე ჟურნალისტებს მიაყენეს ფიზიკური და სიტყვიერი შეურაცხყოფა და დაუმტვრიეს ტექნიკაც.
ამ დროისთვის შინაგან საქმეთა სამინისტრომ 8 პირი ადმინისტრაციული წესით დააკავა.
