ასტრაზენეკას განცხადებით, 17 მილიონი ადამიანის მონაცემების გადამოწმების შედეგად, რომელთაც კორონავირუსის წინააღმდეგ მათ მიერ წარმოებული ვაქცინა მიიღეს, არ გამოვლენილა თრომბოემბოლიის გაზრდილი რისკის “რაიმე მტკიცებულება”. ინფორმაციას Reuters ავრცელებს.
ფარმაცევტულმა კომპანიამ, რომელმაც ვაქცინა ოქსფორდის უნივერსიტეტთან ერთად შექმნა, კვლევა გაერთიანებულ სამეფოსა და ევროკავშირის ქვეყნების მოქალაქეებში ჩაატარა.
“ევროკავშირისა და გაერთიანებული სამეფოს 17 მილიონზე მეტი მოქალაქის შედეგების ფრთხილად გადახედვამ აჩვენა, რომ ფილტვების ემბოლიის, ღრმა ვენის თრომბისა ან თრომბოციტოპენიის რისკი მომატებული არ არის მიუხედავად ასაკის, სქესის ან კონკრეტული ქვეყნის მიხედვით”, — აცხადებს ასტრაზენეკა.
ირლანდიის, დანიის, ნორვეგიის, ისლანდიისა და ნიდერლანების მთავრობებმა შეაჩერეს ასტრაზენეკას ვაქცინის გამოყენება შესაძლო გვერდითი ეფექტების გამო, რაც ძირითადად გამოიხატება თრომბის განვითარების მომატებულ რისკში, ხოლო ავსტრიამ შეაჩერა ასტრაზენეკას კონკრეტული პარტიით ვაქცინაცია.
ევროპის წამლის სააგენტოს განცხადებით, არ არსებობს იმის მტკიცებულება, რომ ეს “გვერდითი მოვლენები”, რომლებიც გამოვლინდა, გამოწვეულია ვაქცინაციით. აღნიშნული დამოკიდებულება გაიზიარა მსოფლიოს ჯანდაცვის ორგანიზაციამაც.
ასტრაზენეკას ცნობით, ამ დროისთვის დაფიქსირდა ღრმა ვენის თრომბის 15 და ფილტვების ემბოლიის 22 შემთხვევა, რაც ძირითადად მსგავსია სხვა ავტორიზებული ვაქცინების შემთხვევაშიც.
“ასტრაზენეკასთან” დაკავშირებით გაჩენილი კითხვებით “ჯანდაცვის მსოფლიო ორგანიზაციაც”(WHO) დაინტერესდა და მისი შესაბამისი დეპარტამენტი უკვე სწავლობს ხსენებულ ცნობებს.
თუმცა, როგორც ორგანიზაციის პრესსპიკერმა მარგარეტ ჰარისმა პარასკევს გამართულ ბრიფინგზე თქვა, “ასტრაზენეკა შესანიშნავი ვაქცინაა” და არ დადგენილა მიზეზობრივი კავშირი მასსა და ჯანმრთელობის ზემოხსენებულ პრობლემებს შორის.
“ძალიან მნიშვნელოვანია, გავიგოთ, რომ დიახ, ჩვენ უნდა განვაგრძოთ ასტრაზენეკას ვაქცინის გამოყენება”, — აღნიშნა მან.
ჰარისმა ასევე თქვა, რომ ორგანიზაციას ჯერ არ გამოუვლენია გარდაცვალების შემთხვევა, რომელიც ვაქცინაციასთან იყო დაკავშირებული.
სახელმწიფოებს “ასტრაზენეკას” გამოყენების შეჩერებას არც “ევროპის მედიკამენტების სააგენტო”(EMA) ურჩევს. ორგანიზაცია დასძენს, რომ არ გამოვლენილა ნიშანი, რომელიც ვაქცინასა და მისი გამოყენებით აცრილ ადამიანთა შორის თრომბის განვითარებას ერთმანეთთან დააკავშირებს.
“ვაქცინის სარგებელი აჭარბებს მის რისკებს და თრომბოემბოლიური შემთხვევების გამოძიების პროცესში მისი ადმინისტრირერების გაგრძელება შესაძლებელია”, — დასძენს EMA.
ხსენებულ ორგანიზაციებს ეთანხმება დიდი ბრიტანეთის “მედიკამენტებისა და ჯანდაცვის პროდუქტების მარეგულირებელი სააგენტოც”(MHRA). უწყების თქმით, “ასტრაზენეკა” კვლავ უსაფრთხოა და ადამიანებმა უნდა განაგრძონ აცრა.
ამავე პოზიციაზეა გერმანიაც: ქვეყნის ჯანდაცვის მინისტრი ასევე აღნიშნავს, რომ თრომბის განვითარების შემთხვევებსა და ვაქცინაციას შორის პირდაპირი მტკიცებულება არ არსებობს.
“რეალურად, დაკვირვებებით ასეთი ტიპის მოვლენების რაოდენობა მნიშვნელოვნად ნაკლებია ვაქცინირებულებში, ვიდრე, მოლოდინის თანახმად, იქნებოდა ზოგადად მოსახლეობაში”, — აღნიშნავს “ასტრაზენეკა”.
Booking.moh.gov.ge: ვაქცინაციაზე რეგისტრაციისთვის ონლაინ პორტალი ამოქმედდა
