მიმდინარე წლის ივნისში საჯარო რეესტრს რეგისტრაციისთვის 5-მა პოლიტიკურმა პარტიამ მიმართა. მათ შორისაა ალეკო ელისაშვილის “მოქალაქეები’ და “ქართული ოცნების” ყოფილი წევრების მიერ დაფუძნებული პოლიტიკური გაერთიანება.
საჯარო რეესტრში 2020 წლის ივნისში 5 განცხადებაა რეგისტრირებული ახალი პოლიტიკური პარტიის დაფუძნებასთან დაკავშირებით, თუმცა, საბოლოოდ, ცვლილებები ჯერ არცერთი მათგანის შემთხვევაში არაა ასახული.
10 ივნისს ალეკო ელისაშვილის თაანაგუნდელმა, იურისტმა ივანე ნორაკიძემ განცხადებით მიმართა რეესტრს და ითხოვა პოლიტიკური გაერთიანების რეგისტრაცია, სახელწოდებით: “ალეკო ელისაშვილი – მოქალაქეები”. რეესტრში წარდგენილი ინფორმაციის თანახმად, პარტიის თავმჯდომარე ალეკო ელისაშვილია. საჯარო რეესტრს პარტია ოფიციალურად ჯერ არ დაურეგისტრირებია, რადგან, უწყების განმარტებით, “წარმოდგენილი დოკუმენტაცია არ აკმაყოფილებს რეგისტრაციის პირობებს. ამასთან, შედგენილია ტექნიკური ან/და რედაქციული ხასითის ხარვეზებით და საჭიროებს შესწორებას”. 22 ივნისს ივანე ნორაკიძემ რეესტრს დამატებითი დოკუმენტაცია წარუდგინა.
ალეკო ელისაშვილი აცხადებს, რომ ახალი პარტია, რომელსაც “სამოქალაქო მოძრაობის” ბირთვთან ერთად ქმნის, არჩევნებშიც მიიღებს მონაწილეობას. ის აზუსტებს, რომ ამ პარტიის წევრები არ იქნებიან ანა დოლიძე და ლევან კობერიძე, რომელთან ერთადაც მან პოლიტიკური პლატფორმის დაფუძნების შესახებ განაცხადა.
რაც შეეხება პარტიის იდეოლოგიას:
“იდეოლოგიაზე ბევრს მელაპარაკებიან, თუმცა ჩემთვის მთავარი იდეოლოგიაც და მიზანიც არის საქართველო, საქართველოს წინსვლა და საქართველოს გამდიდრება. ეს არის ყველაზე მნიშვნელოვანი იდეოლოგია. ამ მიზნამდე როგორ მივალთ: ცოტა მარცხენა ხედვებით, ცოტა მარჯვენა ხედვებით, ძაან მარჯვენა ხედვებით თუ ცენტრისტული ხედვებით, სიმართლე გითხრათ, ამას ჩემთვის მნიშვნელობა არ აქვს”, – აცხადებს ელისაშვილი.
როგორც ცნობილია, ელისაშვილმა “სამოქალაქო მოძრაობა” 2018 წელს დააფუძნა, მიუხედავად იმისა, რომ მოძრაობის წარმომადგენელმა ლევან იოსელიანმა 2019 წელს თბილისში, მთაწმინდის რაიონში რიგგარეშე მაჟორიტარულ არჩევნებში მიიღო მონაწილეობა, აქამდე ორგანიზაციას პოლიტიკური პარტიის სახე არ ჰქონია.
12 ივნისს საჯარო რეესტრს ახალი პარტიის რეგისტრირების თხოვნით პარლამენტის წევრმა მარიამ ჯაშმა მიმართა. ჩვენი საქართველო – სოლიდარობის ალიანსი – ასე ერქმევა ახალ პარტიას, რომელიც პარლამენტში არსებული “დამოუკიდებელი დეპუტატების” ფრაქციის ბაზაზე იქმნება და რომელშიც მარიამ ჯაში, ბექა ნაცვლიშვილი, გედევან ფოფხაძე, ზვიად კვაჭანტირაძე და სხვები წევრიანდებიან.
საჯარო რეესტრს ჯერჯერობით არც ამ პარტიის რეგისტრაციის თაობაზე მიუღია გადაწყვეტილება. მარეგისტრირებელი ორგანო მათ შემთხვევაშიც მიიჩნევს, რომ “წარმოდგენილი დოკუმენტაცია არ აკმაყოფილებს რეგისტრაციის პირობებს. ამასთან, შედგენილია ტექნიკური ან/და რედაქციული ხასითის ხარვეზებით და საჭიროებს შესწორებას”.
15 ივნისს რეესტრში პარტიის რეგისტრაციის თხოვნით საჯარო რეესტრს თორნიკე ჯანაშვილმა მისწერა. ის პოლიტიკური პარტია “რეფორმერის” რეგისტრაციას ითხოვს. “რეფორმერი”, როგორც საზოგადოებრივი მოძრაობა, გასულ წელს დაფუძნდა და სოციალურ ქსელებში აქტიური კამპანიით გამოირჩეოდა, განსაკუთრებით ახალგაზრდების მიმართულებით. ამ ორგანიზაციამ რამდენიმე პროექტიც განახორციელა, მათ შორის სოციალური და განათლების მიმართულებებით.
18 ივნისს რეესტრს გიორგი გაგნიძემ მიმართა. ის პოლიტიკური პარტიის “შეცვალე საქართველოს” რეგისტრაციას ითხოვს. პარტიის დასახელება რამდენიმე დღის წინ გააპროტესტა მოძრაობა “შეცვალემ”, ისინი პარტიას სახელის მითვისებაში ადანაშაულებდნენ.
“ჩვენ უნდა დაგვერქმია “გაასწორე საქართველო”, მაგრამ ჟღერადობა ისეთი ჰქონდა, რომ გადავიფიქრეთ და “შეცვალე საქართველოთი” შევცვალეთ. როგორც ვიცით, პოლიტიკური გაერთიანებების რეესტრში არ არის “შეცვალეს” პოლიტიკური გაერთიანება. მე არც გამიგია “შეცვალე საქართველო” და არსად მინახავს ტელევიზიით. მე ვარ საშუალო ბიზნესის წარმომადგენელი, რომელიც რეალურად არის მსხვერპლი ამ სისტემის და მე მინდა, რომ შევცვალო რაღაცები”, – ამბობს ბიზნესმენი გიორგი გაგნიძე “მთავარ არხთან” საუბარში.
20 ივნისს საჯარო რეესტრს ახალი პარტიის რეგისტრაციის თხოვნით ლელა გულედანმა მიმართა. ის პარტია “არჩევანი სამშობლოსთვის” რეგისტრაციას ითხოვს.
როგორც ცნობილია, 2020 წლის არჩევნები, ინიცირებული საკონსტიტუციო ცვლილებების მიხედვით, ახალი სისტემით ჩატარდება: პროპორციული წესით აირჩევა 120 დეპუტატი, ხოლო მაჟორიტარულით – 30. ბარიერი, რომელიც პარტიამ პარლამენტში მოსახვედრად უნდა გადალახოს, 1 პროცენტია. დღეისათვის საქართველოში 250-ზე მეტი პარტიაა რეგისტრირებული, თუმცა უცნობია, რამდენი მათგანი მიიღებს არჩევნებში მონაწილეობას.