ბიზნეს-ტექნოლოგიების საინფორმაციო პორტალი Zdnet და ისრაელში ბაზირებული კიბერუსაფრთხოების ცენტრი Under the Breach საქართველოს ამომრჩეველთა ბაზის გაჟონვის შესახებ იუწყებიან.

მათი ინფორმაციით, შაბათს, 28 მარტს ჰაკერულ ფორუმზე აიტვირთა 1.04 GB MDB ფაილი, რომელიც შეიცავდა 4,9 მილიონზე მეტი საქართველოს მოქალაქის (გარდაცვლილთა ჩათვლით) ისეთ პერსონალურ მონაცემებს, როგორიცაა: სახელი, გვარი, დაბადების ადგილი, პირადი ნომერი და ტელეფონის ნომერი.

Under the Breach-ის ვარაუდით, მონაცემთა ბაზა დათარიღებულია 2011 წლით და აღებულია საქართველოს ცენტრალური საარჩევნო კომისიის ვებგვერდიდან. საიტზე ამომრჩეველთა ერთიანი სია ხელმისაწვდომი არ არის და სიაში მყოფი ცალკეული პირების შესახებ ინფორმაციის გადამოწმება მხოლოდ პირადი ნომრის შეყვანის შემდეგ შეიძლება.

Actor dumps entire voters database of Georgia (Country).

– Contains names, addresses and ID numbers of 4,000,000 citizens (out of a total 10M residents).
– Data seems to be taken from https://t.co/NvpXnwT5M7 but I can’t access it.
– Seems to date back to 2011.@governmentgeo pic.twitter.com/uLp3eWuiPZ

— Under the Breach ? (@underthebreach) March 29, 2020

თუმცა საქართველოს ცენტრალური საარჩევნო კომისიის ინფორმაციით, გავრცელებული ბაზა ფორმატითაც და მონაცემებითაც რადიკალურად განსხვავდება იმ ბაზისგან, რომელიც საარჩევნო ადმინისტრაციას აქვს.

“ჩვენს მონაცემთა ბაზაში არის 3.5 მილიონი ამომრჩეველი. ამ სიაში არ არის მოცემული გარდაცვლილების შესახებ ინფორმაცია. ასევე, აქ მითითებული აქვთ მოწმობის ნომერი, მამის სახელი – ეს ინფორმაცია საარჩევნო ადმინისტრაციის ბაზაში არ არის. ანუ შეიძლება ითქვას, ეს არ არის ამომრჩეველთა სია”, – განუცხადეს “ნეტგაზეთს” ცენტრალურ საარჩევნო კომისიაში.

შსს- თქმით კი, “ინფორმაცია, რომელიც უცხოურ პრესაში გავრცელდა, ცნობილია საქართველოს შინაგან საქმეთა სამინისტროსთვის, მიმდინარეობს საკითხის დეტალური შესწავლა და უახლოეს პერიოდში გაკეთდება დამატებითი განმარტებები”.