თბილისის ინფექციური საავადმყოფოს დირექტორის, თენგიზ ცერცვაძის განცხადებით, კომპანია “გილიადის” მიერ შექმნილი პრეპარატი remdesivir რომელსაც ამჟამად კორონავირუსის წინააღმდეგ ტესტავენ, შესაძლოა, მწარმოებლისგან გამონაკლისის სახით მიიღოს მანამ, სანამ პრეპარატი ოფიციალურად ჩაეშვება გაყიდვაში. ამ საკითხზე ცერცვაძემ იმედის ეთერში ისაუბრა.

მან  ისაუბრა კორონავირუსის წინააღმდეგ ვაქცინის შექმნის შესაძლებლობაზე, რაც პრეპარატთან შედარებით უფრო გრძელვადიანი პერსპექტივაა. რაც შეეხება ახალ მედიკამენტებს, რომელსაც ამჟამად სცდიან კორონავირუსის წინააღმდეგ, ცერცვაძემ ამ კუთხით გამოჰყო remdesivir, გილიადის პრეპარატი, რომელიც ამჟამად კლინიკური ტესტირების მე-3 ეტაპს გადის.

“ერთადერთი მედიკამენტი, რომელიც ახლოს არის ოფიციალურ აღიარებასთან, ეს არის remdesivir, რომელსაც ამერიკაში სწავლობენ. სხვათაშორის ებოლას ვირუსის სამკურნალოდ შეიქმნა ის და იქ არ იმუშავა, მაგრამ აქ, მგონი მუშაობს… ყოველშემთხვევაში ძალიან სერიოზული ხალხი სწავლობს ამას. ამერიკის ჯანდაცვის ერთ-ერთი ინსტიტუტის დირექტორი ჩვენი პარტნიორია და მისგან ვიცით, რომ  შესაძლოა, ეს მედიკამენტი იყოს ახლო მომავალში რეკომენდებული.  ჩვენც გავაგზავნეთ უკვე თხოვნა, რომ სანამ რეკომენდებული არაა და გაყიდვაში არ არის, შესაძლოა გამონაკლისის სახით მოგვაწდონ”, – განაცხადა ცერცვაძემ.

პრეპარატის შესახებ:

კომპანია: გილიადი

ტიპი: პრეპარატი

ეტაპი: კლინიკური ტესტირების მე-3 ეტაპი

სახელწოდება: remdesivir

“გილიადს” პრეპარატების დამზადების დიდი ისტორია აქვს. კომპანია ცნობილია ისეთი მედიკამენტების დამზადებით, როგორიცაა ც ჰეპატიტის სამკურნალო პირველი და ყველაზე ფართოდ გავრცელებული წამალი – “სოვალდი”. კომპანიას ასევე აქვს ისტორია აივ-ის პრევენციული მედიკამენტების (PrEP) შემუშავების სფეროში.

“გილიადს” უკვე დაწყებული აქვს მედიკამენტ remdesivir-ის გამოცდა კორონავირუსის სამკურნალოდ როგორც აშშ-ში, ისე ვუჰანში, ჩინეთში, სადაც ეპიდემიამ თავ დაპირველად იფეთქა. remdesivir გილეადმა ებოლას ვირუსთან საბრძოლველად რამდენიმე წლის წინ შექმნა.

როგორც კომპანია აცხადებს, ის ამ დროისთვის 3 სხვადასხვა ტიპის ცდას ატარებს:

1. აშშ-ის ალერგიისა და ინფექციური დაავადებების ინსტიტუტმა მიმდინარე წლის 21 თებერვალს remdesivir-ის კვლევისთვის პაციენტების აღრიცხვა დაიწყო. შემთხვევითი, ორმაგი ბრმა მეთოდით და პლაცებოს ეფექტის კონტროლით გათვალისწინებული კვლევა მსოფლიოს 50 ქვეყანაში COVID-19-ით ინფიცირებულ 394 ადამიანს მოიცავს. კვლევის ეს მეთოდი გულისხმობს, რომ პაციენტთა ნაწილს აძლევენ საკვლევ მედიკამენტს, მეორე ნაწილს კი სხვა წამალს, რათა გააკონტროლონ პლაცებოს (თვითდარწმუნების) ეფექტი. მკვლევარმა არ იცის, უშუალოდ რომელი პაციენტი იღებს საცდელ მედიკამენტს. ასევე, არც პაციენტმა არ იციან, ისინი იღებენ უშუალოდ საცდელ მედიკამენტს, თუ   სხვა წამალს;
2. “გილეადმა” 3 მარტს განაცხადა, რომ იწყებს შემთხვევითი შერჩევით, ღია კვლევას COVID-19-ით ინფიცირებულ, საშუალო სიმძიმის 600 პაციენტზე. კვლევის ეს მეთოდი იმით განსხვავდება “ორმაგი ბრმა მეთოდით” ჩატარებული კვლევისგან, რომ პაციენტებმა იციან, რომ ისინი საცდელ მედიკამენტებს იღებენ, ასევე, მკვლევრისთვისაც ცნობილია საცდელი ობიექტის ვინაობა. აღნიშნული კვლევა მიმდინარე წლის მარტში დაიწყება და პირველი შედეგები მალევე, უკვე მაისში იქნება ცნობილი;
3. “გილეადი” შემთხვევითი შერჩევით, ღია კვლევას COVID-19-ით ინფიცირებულ, მძიმე მდგომარეობაში მყოფ 400 პაციენტზეც გამოცდის. მეორე კვლევის მსგავსად, აღნიშნილი შედეგებიც მაისში იქნება ხელმისაწვდომი.

მიუხედავად იმისა, რომ პრეპარატს ჯერ არ გაუვლია ოფიციალურად აღიარების პროცედურები, “გარდიანის” ინფორმაციით, ჩინეთში, იტალიასა და აშშ-ში მას ყველაზე მძიმე მდგომარეობაში მყოფი პაციენტების მცირე წრის სამკურნალოდ იყენებენ (ცდების ფარგლებში).

ამავე თემაზე

კორონავირუსის ვაქცინასა და წამალზე 9 კომპანია მუშაობს – გეგმები და ვადები