მზად ვართ, მტკივნეული გადაწყვეტილებები მივიღოთ – მინისტრი ფედერაციაში გამოძიებაზე

განათლების, მეცნიერების, კულტურისა და სპორტის მინისტრი მიხეილ ბატიაშვილი აცხადებს, რომ სამინისტრო მზად არის “ნებისმიერი, მათ შორის მტკივნეული გადაწყვეტილებებიც” მიიღოს მას შემდეგ, რაც დასრულდება ჭიდაობის ეროვნული ფედერაციის პრეზიდენტის საქმის გამოძიება.

ფედერაციის პრეზიდენტს, გეგა გეგეშიძეს ბერძნულ-რომაული სტილით მოჭიდავეთა ნაკრების კაპიტანი ზურაბ დათუნაშვილი რკინის ბლაგვი საგნით თავის გატეხვასა და კორუფციაში ადანაშაულებს.

ზურაბ დათუნაშვილი გეგა გეგეშიძის თანამდებობიდან გადადგომას ითხოვს და კოლეგებს მოუწოდებს, ღიად ისაუბრონ საქართველოს ჭიდაობის ფედერაციაში არსსებულ პრობლემებზე.

მინისტრმა 18 იანვარს განაცხადა, რომ “ამასთან დაკავშირებით … შიდა სამუშაო შეხვედრა” ჰქონდათ.

“ეს არ შეეფერება ქართულ სპორტს და იმ წარმატებებს, რომელიც გასულ წელს გვქონდა. ასეთი ფაქტები ჩრდილს აყენებს არა მარტო ამ სფეროს, არამედ ზოგადად სპორტს”, – თქვა ბატიაშვილმა.

ზურაბ დათუნაშვილი. 11.01.2019. ფოტო: popsport.com

“გამოძიების შემდეგ მზად ვართ ნებისმიერი, მათ შორის მტკივნეული გადაწყვეტილებებიც მივიღოთ”, – განაცხადა ბატიაშვილმა.

ნეტგაზეთს შინაგან საქმეთა სამინისტროში განუცხადეს, რომ გამოძიება სისხლის სამართლის კოდექსის 126-ე მუხლით (ძალადობა) მიმდინარეობს. შსს-ს ცნობით, მიმდინარეობს საგამოძიებო მოქმედებები.

დათუნაშვილისა და გეგეშიძის საქმის დეტალების გაცნობა აქ შეგიძლიათ:

ფედერაციის პრეზიდენტმა გეგა გეგეშიძემ თავში რკინა ჩამარტყა – მოჭიდავე ზურაბ დათუნაშვილი

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია 2018 წლის 1 სექტემბრიდან არის ნეტგაზეთის რეპორტიორი. ის ადრეც მუშაობდა ნეტგაზეთში — 2016 წლის მაისიდან 2017 წლის თებერვლამდე. Email: lukapertaia@gmail.com