კირილე ზდანევიჩის ერთადერთი კედლის მხატვრობა თბილისში განადგურდა

რუსთაველის გამზირზე, “ოფიცერთა სახლის” შენობაში, სადაც მაღაზია “დეფაქტო” მდებარეობს, კულტურული მემკვიდრეობის ძეგლი, კირილე ზდანევიჩის შესრულებული კედლის მხატვრობა განადგურდა.

კულტურული მემკვიდრობის დაცვის ეროვნულ სააგენტოში აცხადებენ, რომ ამ ფაქტზე მასალები გააგზავნეს პროკურატურაში, რომელიც გამოიძიებს და დაადგენს- როდის, ვინ და რა ეტაპზე გაანადგურა კედლის მხატვრობა.

სააგენტოში აცხადებენ, რომ კედლის მხატვრობა, სავარაუდოდ, ემსხვერპლა მფლობელის მიერ წარმოებულ აღდგენით სამუშაოებს. სააგენტოდან მოწოდებული ინფორმაციის მიხედვით, მაღაზია “დეფაქტო”, რომელსაც იჯარით აქვს აღებული ეს ფართი, აცხადებს, რომ საიჯარო ხელშეკრულების დადების დროს კედლის მხატვრობა განადგურებული იყო.

კირილე ზდანევიჩის ნახატი

განადგურებული კედლის მხატვრობა პოლონელმა მხატვარმა კირილე ზდანევიჩმა 1918 წელს შეასრულა. ეს მის მიერ შესრულებული ერთადერთი კედლის მხატვრობაა, რომელიც საქართველოშია შემორჩენული. პანო შეეხებოდა ანტიკური ხანის ბერძენ მოგზაურებს – “არგონავტებს”.

კედლის მხატვრობა რესტავრაციას საჭიროებდა. 2016 წელს კულტურული მემკვიდრეობის დაცვის ეროვნულმა სააგენტომ სამხატვრო აკადემიის რესტავრატორებთან ერთად კედლის მხატვრობის სამეცნიერო კვლევა ჩაატარა, რომელიც მისი აღგენის საფუძველს იძლეოდა.

თბილისის მერიაში აცხადებენ, რომ “ოფიცერთა სახლის” რესტავრაცია მერიასთან არ ყოფილა შეთანხმებული, რაც ცალკე სამართლებრივ პასუხისმგებლობას ითვალისწინებს.

კირილე ზდანევიჩის კედლის მხატვრობა. ფოტო: კულტურული მემკვიდრეობის დაცვის ეროვნული სააგენტო

კირილე ზდანევიჩის კედლის მხატვრობა. ფოტო: კულტურული მემკვიდრეობის დაცვის ეროვნული სააგენტო

კირილე ზდანევიჩის კედლის მხატვრობა. ფოტო: კულტურული მემკვიდრეობის დაცვის ეროვნული სააგენტო

ნეტგაზეთის მასალების სხვა გამოცემებში გადაბეჭდვის წესი


ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com