ISFED: თიანეთის 20-ე საარჩევნო უბანზე განმეორებითი კენჭისყრა უნდა გაიმართოს

“სამართლიანი არჩევნები” (ISFED) მიიჩნევს, რომ თიანეთის სადავო უბანზე, რომელმაც არჩევნების შედეგები შეცვალა, ხელახლა უნდა გაიმართოს კენჭისყრა.

ორგანიზაციის ცნობით, 22 ოქტომბერს, დაახლოებით დილის 5-6 საათზე #19 თიანეთის საოლქო საარჩევნო კომისიამ ჩაატარა სხდომა და პ/გ „ქართული ოცნება-დემოკრატიული საქართველოს“ წარმომადგენლის განცხადების საფუძველზე გახსნა #20 საარჩევნო უბნის ბათილი ბიულეტენების დალუქული პაკეტი და გადათავალა ბათილი ბიულეტენები. დადგინდა, რომ 5 ბიულეტენი, რომლიდანაც 4 ბიულეტენზე ერთი კანდიდატი იყო შემოხაზული, ერთზე კი ერთი კანდიდატი გადახაზული იყო, ხოლო მეორე შემოხაზული, საუბნო კომისიას ბათილად ჰქონდა მიჩნეული. ხუთივე შემთხვევაში ხმა მიცემული იყო ქართული ოცნების მერობის კანდიდატისთვის. საოლქო კომისიამ აღნიშნული ბიულეტენები ნამდვილად ჩათვალა, რის შედეგადაც თიანეთის თვითმმართველ თემში ქართული ოცნების მერობის კანდიდატმა გაიმარჯვა.

ISFED-ის ცნობით, საოლქო კომისიაში სხდომას ესწრებოდა „სამართლიანი არჩევნების“ დამკვირვებელი. თიანეთის #20 უბანზე კენჭისყრის, ხმის დათვლისა და შემაჯამებელი ოქმის შედგენის პროცესს ასევე აკვირდებოდა „სამართლიანი არჩევნების“ დამკვირვებლი.

“მის მიერ მოწოდებული ინფორმაციით, როგორც კენჭისყრის, ისე ხმის დათვლის პროცესი მშვიდ ვითარებაში მიმდინარეობდა. ხმის დათვლის დროს არც ერთი დამკვირვებელ ორგანიზაციისა და პოლიტიკური პარტიის წარმომადგენელს არ დაუფიქსირებია განსხვავებული აზრი ბათილ ბიულეტენებთან დაკავშირებით. კომისიამ პრაქტიკულად ყველა შემთხვევაში ერთსულოვნად გადაწყვიტა საეჭვო ბიულეტენების ბედი და არც ერთ დამსწრე პირს, მათ შორის, „ქართული ოცნება-დემოკრატიული საქართველოს“ წარმომადგენელს, არ გამოუთქვამს პროტესტი, რომ ნამდვილი ბიულეტენები საუბნო კომისიამ ბათილად მიიჩნია. „სამართლიანი არჩევნების“ დამკვირვებლის განცხადებით, ყველა ბათილი ბიულეტენი სწორად იქნა მიჩნეული ასეთად და არც ერთი ბიულეტენი არ იყო, რომელზეც აშკარად იყო გამოხატული ამომრჩევლის ნება და კომისიამ ბათილად ჩათვალა.

აღნიშნულიდან გამომდინარე, გაურკვეველია და ეჭვს იწვევს ის გარემოება, თუ როგორ მოხვდა 5 ნამდვილი ბიულეტენი, რომელზეც აშკარად იკითხებოდა ამომრჩევლის ნება ბათილ ბიულეტენებს შორის. განსაკუთრებით საეჭვოა ის ფაქტი, რომ ხმის დათვლის პროცესში უბანზე პოლიტიკური პარტიის წარმომადგენელს აღნიშნული ფაქტი არ გაუპროტესტებია”, – აცხადებს სამართლიანი არჩევნები.
მათივე განცხადებით, არასტანდარტულია თავად საოლქო კომისიის მიერ ასეთი დაუყოვნებელი რეაგირება „ქართული ოცნება-დემოკრატიული საქართველოს“ წარმომადგენლის განცხადებაზე დალუქული პაკეტის გახსნის და ბათილი ბიულეტენების გადათვლის შესახებ, რომელიც კომისიამ განიხილა წარდგენიდან 1-2 საათში, 22 ოქტომბერს გამთენიისას.
“წარსულში არ ყოფილა შემთხვევა, რომ რომელიმე საოლქო კომისიას „სამართლიანი არჩევნების“ საჩივარზე ასეთი მყისიერი რეაგირება მოეხდინა. ნიშანდობლივია, რომ საოლქო კომისიები თითქმის არასდროს აკმაყოფილებენ დალუქული პაკეტების გახსნის და ხმების გადათვლის მოთხოვნას, მაშინაც კი, როცა მაღალი ალბათობა არსებობს იმისა, რომ დარღვევას ჰქონდა ადგილი.
საოლქო კომისიის გადაწყვეტილება კიდევ უფრო გასაკვირია იმის გათვალისწინებით, რომ „ქართული ოცნების“ წარმომადგენლის განცხადება სრულიად დაუსაბუთებელია, არანაირ ინფორმაციას შეიცავს იმის შესახებ, თუ რა დარღვევას ჰქონდა ადგილი ხმის დათვლის დროს და მხოლოდ გაურკვეველ ვარაუდს ემყარება: „თიანეთის #19 საოლქო საარჩევნო კომისიაში შემავალი #20 საუბნო საარჩევნო კომისიის ბათილი ბიულეტენების გადამოწმების მიზნით მოგმართავთ თხოვნით, გახსნათ და გადაამოწმოთ დალუქული პაკეტი, რომელშიც ბიულეტენებია მოთავსებული, ვინაიდან შესაძლოა სადავო ბათილი ბიულეტენების შედეგად გადაწყდეს მთლიანი არჩევნების ბედი“.
მოყვანილი გარემოებები ეჭვის ქვეშ აყენებს მოცემულ ოლქში მერის არჩევნების შედეგებს, რომელშიც „ქართული ოცნების“ კანდიდატმა მხოლოდ ოთხი ხმით გაიმარჯვა. საზოგადოების ნდობისა და არჩევნების ლეგიტიმურობის უზრუნველსაყოფად, აუცილებელია თიანეთის #20 საარჩევნო უბანზე შედეგები ბათილად იქნას ცნობილი და გაიმართოს განმეორებითი კენჭისყრა”, – აცხადებს სამართლიანი არჩევნები.
ცესკოს წინასწარი მონაცემებით, არჩევნების შედეგად თიანეთში თამაზ მეჭიაურმა მიიღო 3077 ხმა, ხოლო ლელა ქიტესაშვილმა (ქართული ოცნება) 3081 ხმა (50.03%).
დღეს, 15:00 საათზე მცხეთის რაიონული სასამართლო განიხილავს თამაზ მეჭიაურის სარჩელს, რომლითაც აპროტესტებს საოლქო საარჩევნო კომისიის გადაწყვეტილებას, რამაც ქართული ოცნების სასარგებლოდ მიიჩნია 5 ბიულეტენი და ამით გამარჯვება ქართული ოცნების კანდიდატმა 4 ხმის უპირატესობით მიიღო.
ნეტგაზეთის მასალების სხვა გამოცემებში გადაბეჭდვის წესი
ავტორი