“გამოიკვეთა რიგი დარღვევები, რომელსაც ითვალისწინებს ტექნიკური რეგლამენტი. კონკრეტული სტანდარტია დარღვეული, რომელიც საჭიროა სადემონტაჟო საქმის შესასრულებლად, მუშახელი იქნება ეს თუ ტექნიკური პერსონალი – მათ ეს საქმე უნდა შეასრულონ არა ხელით, კუსტარული იარაღებით, არამედ შესაბამისი ტექნიკით, რომელიც დასანგრევი კედლიდან მისი სიმაღლის პროპორციული მანძილით იქნება დაშორებული. პირველი მოკვლევით, სამწუხაროდ, ჩანს, რომ ეს ნორმები დარღვეულია და ამიტომაც მოყვნენ მუშები ნანგრევებში.”

შრომის ინსპექტორები აცხადებენ, რომ თანამშრომლობენ გამოძიებასთან. ისინი დაშავებულების კლინიკაში მონახულებას გეგმვენ.

ჯგერნაიას თქმით, პასუხისმგებლობა შრომით პირობებზე რამდენიმე უწყებას შორის ნაწილდება. შრომითი უსაფრთხოება ჯანდაცვის სამინისტროს კომპეტენციაა, ხოლო სამშენებლო ობიექტზე უსაფრთხოება- მერიის ზედამხედველობის სამსახურის. ასევე დაწყებულია გამოძიება. მისი თქმით, შესაბამისი სანქციები ყველა მხრიდან დაუწესდება კომპანიას.

“იქნება მკაცრი ზომები გატარებული,” – აცხადებს ჯგერნაია.

დღეს დილით თბილისში, წერეთლის #37/35-ში სახლის დემონტაჟის დროს 5 მუშა ნანგრევებში მოჰყვა. სასწრაფო დახმარების ინფორმაციით, 1 მუშა ადგილზე გარდაიცვალა, ხოლო 3 მათგანი სხვადასხვა სახის დაზიანებებით საავადმყოფოში არიან გადაყვანილები.

დიდუბე-ჩუღურეთის გამგებლის ცნობით, დემონტაჟს აწარმოებდა სამშენებლო კომპანია “როიალ გრუპი”, რომელსაც უსაფეთხოების პირობების დაცვის აუცილებლობის შესახებ ბოლოს ორშაბათს გააფრთხილა თბილისის მერიის ზედამხედველობის სამსახურმა. პროექტის თანახმად, “როიალ გრუპი” ამ ადგილას 33-სართულიანი ცათამბრჯენის “დიდუბე თაუერის” აშენებას გეგმავს. კომპანიაში ამ დრომდე არ პასუხობენ ზარებს.