თბილისის მერიის ცნობით, სექტემბრიდან ქალაქში ახალი ავტობუსები ივლის. შესაბამის ხელშეკრულებას ტენდერში გამარჯვებულ კომპანია „Man Truck and Bus AG“-სთან ხელი დღეს მოეწერა.

“ხელშეკრულების ხელმოწერიდან არაუგვიანეს 7 თვისა თბილისის ავტოპარკი, ჯამში, ეტაპობრივად 143 ერთეული ავტობუსით განახლდება. ევროსტანდარტების შესაბამისი  ავტობუსები სრულად იქნება ადაპტირებული შეზღუდული შესაძლებლობის მქონე პირებისთვის და აღჭურვილი იქნება CNG საწვავზე (ბუნებრივი აირი) მომუშავე ძრავებით, რაც დიზელთან შედარებით  უფრო მცირე რაოდენობის მავნე გამონაბოლქვს გამოყოფს, შემცირებულია ნახშირბადის მოცულობა, არ გააჩნია შავი კვამლი და უსიამოვნო სუნი,”- წერია მერიის გავრცელებულ განცხადებაში.

ქალაქის მერის, დავით ნარმანიას განცხადებით, ეს პროექტი  პირველი ნაბიჯია იმისკენ, რომ ევროპული ტიპის მუნიციპალურმა ტრანსპორტმა იაროს თბილისში და მოქალაქეები უსაფრთხოდ და კომფორტულად გადაადგილდნენ. მისივე მტკიცებით, ქალაქის ბიუჯეტი დაზოგავს თანხას ავტობუსების მომსახურებასა და საწვავით უზრუნველყოფაზე:

“პროექტის ფარგლებში, EBRD-ის დაფინანსებით გამოცხადებული ტენდერის შესაბამისად, გამარჯვებულმა კომპანიამ 143 ერთეული 12-მეტრიანი ადაპტირებული ავტობუსი უნდა შემოიყვანოს.  მოწოდება მოხდება ეტაპობრივად, 7 თვის განმავლობაში. მნიშვნელოვანია, რომ ავტობუსები არის სრულიად უსაფრთხო, ბუნებრივ აირზე მომუშავე, რაც განაპირობებს საწვავის ეკონომიას, ასევე, გარემოსდაცვითი თვალსაზრისით  მნიშვნელოვნად შემცირდება გამონაბოლქვი.  ასეთი ტიპის ავტობუსები ჩვენს ქალაქს არასდროს ჰყოლია, ამიტომ, ერთი მხრივ ,”- განაცხადა თბილისის მერმა დავით ნარმანიამ.

დედაქალაქის მერიამ თბილისის ავტობუსების პარკის შესწავლა გასულ წელს დაიწყო და დღის წესრიგში დადგა ავტოპარკის განახლების საჭიროება. EBRD-ის დახმარებით ჩატარდა წინასწარი კვლევა, რომელმაც აღწერა თბილისის ავტობუსების პარკში არსებული მდგომარეობა და პარკის განახლების შესაძლებლობები, რის შემდეგაც გამოცხადდა ტენდერი.

მერიის ინფორმაციით, სატენდერო დოკუმენტაცია 30-მდე კომპანიამ წარმოადგინა, ტენდერისადმი ინტერესი კი 7-მა კომპანიამ გამოხატა, რის შემდეგაც ეკოლოგიურობის, ეკონომიურობისა და უსაფრთხოების გათვალისწინებით საუკეთესო შეირჩა.  სატენდერო პირობებში აქცენტი გაკეთდა ხარისხსა და გამოცდილებაზე. შერჩევა-შეფასება EBRD-ის საერთაშორისო წესების შესაბამისად განხორციელდა.

“ევროსტანდარტების შესაბამისი, ახალი, ეკოლოგიურად სუფთა და ადაპტირებული ავტობუსები ივლის ქალაქის მასშტაბით არსებულ გრძელ დისტანციებსა და ფართო გამტარუნარიანობის ქუჩებზე. აღსანიშნავია, რომ თბილისის მერიას ავტობუსების პარკის განახლების 4-წლიანი გეგმა აქვს და აღნიშნული პროცესი მომავალშიც გაგრძელდება,”- ვკითხულობთ განცხადებაში.