რას გულისხმობდით, როდესაც თქვით, რომ ისედაც აპირებდით “მაესტროს” დატოვებას. ჩვენ გვახსოვს ოქტომბრის ბოლოს განვითარებული მოვლენები, როდესაც თეონა გეგელიამ და დიანა ტრაპაიძემ დატოვეს ტელეკომპანია, მაშინ თქვენ თქვით, რომ არხის ხელმძღვანელობისაგან სარედაქციო დამოუკიდებლობის, ასევე, იმის გარანტია მიიღეთ, რომ საინფორმაციო გამოშვება სატელევიზო ბადეში დარჩებოდა…

ამის შემდეგ ძალიან ბევრი რამ შეიცვალა არხზე. “მაესტროს” მენეჯმენტმა, მისმა ფაქტობრივმა მფლობელმა და მენეჯერმა კოტე გოგელიამ გადაწყვიტა, რომ ბადე შეცვლილიყო. მე დაახლოებით ერთი კვირის წინ შემატყობინეს, რომ “ცხრიანი” ბადეში აღარ ზის ახალი სეზონიდან და მის ნაცვლად იქნება კოკა ყანდიაშვილის საავტორო პროგრამა – “ლაპარაკობს თბილისი”. გარდა ამისა, შემატყობინეს, რომ არხის საინფორმაციო სამსახურის ხელმძღვანელი მე აღარ ვიქნებოდი და შემომთავაზეს ერთი ან ორი თოქ-შოუ. როდესაც ვკითხე ამ გადაწყვეტილების მიზეზი, მითხრეს, რომ ამას აქვს ბევრი მიზეზი, რომ მათ უფრო რეიტინგული პროექტის კეთება სურთ. ასევე მითხრეს, რომ საინფორმაციო სამსახურის როლი უფრო განსხვავებული იქნებოდა იმ თვალსაზრისით, რომ უფრო დატვირთული იქნება იდეოლოგიურად, უფრო ცენტრალიზებული და ინტეგრირებული სხვა გადაცემებთან, ანუ რაღაც სხვა ტიპის ნიუსი იქნებაო, რომელსაც ისეთი როლი არ ექნება და სჯობს, ჩემი რესურსი იმ სივრცეში გამოვიყენოთ, სადაც მე მუშაობა უკეთესად გამომდის – თოქ-შოუში.

გარდა ამისა, მინდა გითხრათ, რომ მე არხის მენეჯმენტში ვიყავი, ვიცი, რა დოზით იყო ჩართული [პროცესებში] იგივე კანცელარიის თანამშორმელი ყანდიაშვილი… სატელევიზიო ბადე პრაქტიკულად მისი დაწერილია. ის მუდმივ კონტაქტზე იყო ქალბატონ ბაია გადაბაძესთან, არხის დირექტორთან. მე ჩავთვალე, რომ “მაესტროზე” მიდგომები იცვლება, არის სურვილი, რომ რაღაც ტიპის მიმართულება გახდეს პრიორიტეტი, რაღაც იდეოლოგია, რაც უკვე თავისთავად არ არის კავშირში ჟურნალისტიკასთან. მე გადავწყვიტე, რომ არხთან თანამშრომლობას აღარ გავაგრძელებდი. გუშინწინ ვესაუბრე კოტე გოგელიას, ვერ ვიტყვი, რომ ის არ ეცადა დავერწმუნებინე, რომ არხზე არაფერი იცვლება განსაკუთრებული და ჯობდა მეც გამაკეთებინა [თოქშოუ], მაგრამ მე მას ვუთხარი, რომ დეკემბრის ბოლომდე არხზე ვიმუშავებდი, როგორც პასუხისმგებლიანი თანამშრომელი, ვიდრე “ცხრიანი” ეთერში იქნებოდა, ხოლო იანვრიდან არხს დავტოვებდი. ამის შემდეგ, ანუ გუშინ ჩატარდა საინფორმაციო სამსახურის თათბირი. რადგანაც მე მივდიოდი, გაჩნდა ეჭვი, რომ შემთხვევით ხომ არ არსებობს ტენდენცია, რომ სხვა ადამიანებმაც მიიღონ იგივე გადაწყვეტილება. გენერალურმა დირექტორმა ამის გაკრვევა სცადა. თათბირის დროს მას ბევრი კრიტიკული კითხვა დაუსვეს, მათ შორის ჩემგან მიიღო ბევრი კრიტიკული კომენტარი არხის გეგმებთან დაკავშირებით. ამ მწვავე საუბრის შემდეგ მან ძალიან ბევრ შეკითხვას პასუხი ვერ გასცა, თუმცა დაადასტურა, რომ ახალი ბადე არსებობს და “ცხრიანი” ნამდვილად აღარ იქნება ეთერში. დღეს ამბობს, რომ ეს გადაწყვეტილი არ არისო, მაგრამ გუშინ დაახლოებით 50 ადამიანი ესწრებოდა იმ თათბირს, სადაც მან თქვა, რომ უკვე გადაწყვეტილია, “ცხრიანის” ნაცვლად უფრო რეიტინგული პროექტის შექმნაო.

ამ თათბირიდან ნახევარ საათში მე დამირეკა კოტე გოგელიამ, რომელმაც მითხრა, რომ არხზე აღარ ვმუშაობ, ეს ძალიან რთული საუბარი იყო და დეტალების განხილვას არ დავიწყებ, იმიტომ, რომ ჩემთვის ძალიან მძიმე იყო იმ ტონის მოსმენა, რომელიც მოვისმინე. მან მითხრა: იმის გამო, რომ საინფორმაციო სამსახურში შეიქმნა ასეთი განწყობები, ამაში დიდი წვლილი მაქვს მე და, შესაბამისად, აღარ ვმუშაობ არხზე. ასეთია ჩემი ისტორია.

თვითონ კოკა ყანდიაშვილი უარყოფს პროცესებში იმ ფორმით მონაწილეობას, რაზეც თქვენ საუბრობთ…

მე მინდა გითხრათ, რომ ეს არის ტყუილი.

რითი შეგიძლიათ თქვენი სიტყვების დადასტურება?

ეს შემიძლია დავადასტურო იმით, რომ გუშინ გენერალურმა დირექტორმა 50-მდე ადამიანის თანდასწრებით განაცხადა, რომ ეს გადაწყვეტილი ამბავიაო. ყველა საუბარში განიხილავდა ამას. მე ამაზე უკვე დაახლოებით 3-4 თვეა ვდავობ, ვინაიდან მივიჩნევდი, რომ სახელმწიფო კანცელარიის კონკრეტულ პირებთან ასოცირებული ადამიანის მოყვანა პრაიმტაიმში ყოველდღიურად არხზე მაყურებლების ნდობას დააყენებდა [კითხვის ნიშნის ქვეშ].

3-4 თვის წინ დაიწყო ლაპარაკი კოკა ყანდიაშვილის თემაზე?

დიახ. ჩვენ რაღაც მომენტში ეს იდეა შევაკავეთ, ვინაიდან საინფორმაციო სამსახურმა მაშინაც სოლიდური წინააღმდეგობა გაწია. “მაესტროს” საინფორმაციო სამსახურის წარმომადგენლებს ერთი თვისება აქვთ, ძალიან გუნდურად მუშაობენ. მაშინ ჩვენ ეს არ გვითქვამს იმიტომ, რომ მიზანი მიღწეული იყო. თუმცა იმ კონკრეტული წინააღმდეგობის გამო, რომელიც მაშინ მენეჯმენტმა მიიღო ყადნიაშვილის მოყვანასთან დაკავშირებით, ჩვენ გვითხრეს, რომ დავისაჯეთ, იმიტომ, რომ ერთი თვე ჰონორარები დაუგვიანდათ ადამიანებს საინფორმაციო სამსახურში. მაშინ გვითხრეს, რომ თქვენ დაისაჯეთო, მაგრამ ჩვენ ეს გადავიარეთ და არხზე სარედაქციო დამოუკიდებლობა შევინარჩუნეთ.

ეს დასჯის ამბავი ვინ გითხრათ?

კოტე გოგელიამ… ჩვენ რაც შეგვეძლო გავაკეთეთ. პირადად ჩემი რესურსი ამოიწურა, ისედაც მოვდიოდი და თან გამომიშვეს. რაც შეეხება იმ ადამიანებს, რომლებიც ამ წუთებშიც მუშაობენ “მაესტროში”, არავინ იფიქროს, რომ ისინი რამეს შეეგუებიან, არავის ჰქონდეს ამის ილუზია. ეს არის პრინციპული ჟურნალისტიკის დესანტი “მაესტროში”, რომელიც მოვლენებს დააკვირდება. რასაც ვეღარ ვიტყვი მე, აუცილებლად იტყვიან ისინი. თანამშრომლების ნაწილმა გადაწყვიტა, რომ დღეს ეს უკვე მიუღებელია [და დატოვა არხი], ხოლო ნაწილმა გადაწყვიტა, ვნახოთ, რა მოხდებაო და მოვლენების განვითარებას დაველოდოთო.

ამ დროისთვის რამდენმა ადამიანმა დატოვა ტელეკომპანია?

ზუსტად ვერ ვიტყვი, მაგრამ დაახლოებით 20-მდე ადამიანმა.

ქალბატონო ნინო, როდესაც იდეოლოგიზებული მაუწყებლობა ახსენეს, თქვენ არ კითხეთ, რას გულისხმობდნენ ამაში?

ბუნებრივია, ვიკითხე, მაგრამ კონკრეტული პასუხი ვერ მივიღე. ერთი კონკრეტიკა იყო მხოლოდ ამ თემაში, რომ ეს იქნება პროქართულიო-გვითხრეს.

მე ამას იმიტომ გეკითხებით, რომ გავარკვიოთ რა ხდება ტელეკომპანიაში, რისი განხორციელება სურს გოგელიას, თქვენი აზრით?

რასაც მე ვიტყვი, სპეკულაცია იქნება. უნდა დაველოდოთ მოვლენების განვითარებას. მე, რა თქმა უნდა, ჩემი მოსაზრებები მაქვს, მაგრამ რადგან იქ დარჩნენ ადამიანები, ვისაც ძალიან ვუფრთხილდები და დამატებით კიდევ ძალიან ბევრი პერსონალური მომენტი მაქვს. თემები, რაზეც თქვენ მეკითხებით, მაინც დარჩება ჩემი სპეკულირების არეალში, ამიტომ თავს შევიკავებ ამ ეტაპზე რამის თქმისგან, მაგრამ ზუსტად შემიძლია გითხრათ, რომ აქ საუბარი იყო რაღაც იდეოლოგიაზე, რაც ზოგადად, ჩემი აზრით, სცდება ჟურნალისტიკას და სარედაქციო დამოუკიდებლობის ჩარჩოებს. ამაშია პრობლემა. უკვე ნიუსის რაღაც ტიპის კონტროლის ქვეშ მუშაობაზეა საუბარი…

რა სახის კონტროლის?

იდეოლოგიის რაღაც სამსახურზეა საუბრი, რომელიც საინფორმაციო სამსახურის დღის წესრიგშიც უნდა იყოს მუდმივად. ანუ დილით დაიგეგმება და შემდეგ ეს ყველამ უნდა გააკეთოს.

სტრუქტურული წარმონაქმნის სახე ექნება ამას?

ლაპარაკი იყო იმაზე, რომ იქნება რედაქტორი, რომელიც ამ თემატურ ნაწილს გააკონტროლებს, თუმცა ეს მხოლოდ საუბრები იყო, ზუსტად არ ვიცი. დანარჩენი უნდა კითხოთ იმათ, ვინც არხზე დარჩა. ამის იქით ვერაფერს გეტყვით. მართლა არ მინდა რამე იმაზე მეტი ვთქვა, ვიდრე ვიცი. მითხრეს, რომ ეს უნდა იყოს იდეოლოგიური სამსახური, არხის მიმართულებებს უნდა დაემთხვეს… ისე აღარ უნდა იყოს, როგორც აქამდე იყო. მანამდე რაც იყო, ალბათ, მაყურებელი კარგად ხედავდა, რომ მაესტრო არავის გავლენის ქვეშ არ ყოფილა.

ჩემთვის მაინც გაურკვეველია და ალბათ მკითხველის ნაწილისთვის გაურკვეველი იქნება ის, რაზეც თქვენ საუბრობთ… რა არის ეს იდეოლოგია, კონკრეტულად რას უნდა დაეფუძნოს ახალი იდეოლოგია, რა იცვლება და ასე შემდეგ…

ზუსტად ვერ გეტყვით, რა იგულისხმებოდა, რაღაც უფრო მეტ ანალიზზე, საგარეო მიმართულებებზე უნდა ყოფილიყო მეტი ფიქრი და ანალიზი, თემებზე, რომელიც არსად შუქდება, თემები, რომელიც “მაესტროს” დამფუძნებლის აზრით, კონიუნქტურაშია მოქცეული…. არ ვიცი, რას ნიშნავს პროქართული იდეოლოგია. კითხეთ მას [გოგელიას].

თქვენ არ გიკითხავთ?

ვკითხე, მაგრამ ზუსტი პასუხი არ მიმიღია, ამიტომ ყველაფერი მაინც დარჩა ჩემი ანალიზის ფარგლებში, თუ რა შეიძლება იყოს ეს. ალბათ, უნდა დაველოდოთ და ვნახოთ… ის, რომ არ ვესამხუროთ კონიუნქტურულ გარე გზავნილებს, რომ ეს იყოს საქართველოს მოქალაქეებისთვის შექმნილი [პროდუქტი]… ასე ჟღერდა, მაგრამ მე ვერ დავინახე, რა არ იყო საქართველოს მოქალაქეებისთვის და ჩვენი მაყურებლებისთვის “მაესტროზე”, რა უნდა შეცვლილიყო და რა იგულისხმება ამაში – მე ვერ გეტყვით.

ხელფასების გაცემის პრობლემა თუ იყო ტელევიზიაში, დაგვიანება და ასე შემდეგ.

დიახ, ეს უკვე არის მუდმივი პრობლემა ბოლო 3-4 თვის განმავლობაში.

გრეგორი ლეპსის კონცერტის ინციდენტზე მინდოდა რომ მეკითხა, არ ვიცი, შესაძლოა ნახევრად ხუმრობითაც, ხომ არ ხედავთ რაიმე სახის კავშირს ამ ორ ფაქტს შორის, ვინაიდან იქ მაესტროს ჟურნალისტი საუბრობდა, რომ მას დაემუქრნენ, რომ სამსახურს დაკარგავდა.

არა, არავითარ კავშირში არ არის. ფეისბუკზე წავიკითხე ერთი-ორი პოსტი ამასთან დაკავშირებით, ნეტავ, ამას უკავშირდებოდეს და გადავიტანდი, თუ მეტი არაფერი დევს ამის მიღმა.

თუმცა მართლა ამას რომ უკავშირდებოდეს, შესაძლოა გარკვეულ გავლენებზე მიანიშნებდეს, არა?

პრინციპში შემიძლია დაგეთანხმოთ, მაგრამ ჩემთვის ეს არავის უთქვამს და ძალიან დიდი ტყუილი უნდა ვთქვა, ეს თემა რომ საერთოდ განვიხილო.

იმ პერიოდის განმავლობაში, რა დროსაც თქვენ მაესტროში მუშაობდით, თუ გრძნობდით რაიმე სახის გავლენებს ან მცდელობებს…

არანაირი. მაესტროს ყველა მენეჯერმა იცის, რომ საინფორმაციო სამსახური არის ხელუხლებელი. ეს არის ყველაზე მთავარი მონაპოვარი ამ არხის, ამიტომ მცდელობა ვერც კი იქნებოდა ამ შემადგენლობასთან, რომელიც მუშაობდა. ამიერიდან თუკი რაიმე უნდა გაკეთდეს, გზა უფრო სუფთაა, ვიანიდან არც ერთი პროდიუსერი, რომელიც მაესტროს კონტენტს ქმნიდა, არასოდეს არც ერთი ჯგუფის, არც პოლიტიკური და არც ბიზნესის ჯგუფის გავლენებს არ ემორჩილებოდა. ძალიან გამიხარდება, თუ ეს ასეც დარჩება.