IRI-ს კვლევის თანახმად, მომავალ კვირას რომ საპარლამენტო არჩევნები ტარდებოდეს, გამოკითხულთა 31% „ქართულ ოცნებას“ მისცემდა ხმას, 16% — „ნაციონალურ მოძრაობას“, ხოლო 4% — გიორგი გახარიას პარტიას „საქართველოსთვის“.
2%-იანი მხარდაჭერა აქვთ, ელენე ხოშტარიას „დროას“, „სტრატეგია აღმაშენებელს“, „ლეიბორისტულ პარტიას“, ანა დოლიძის პარტიას „ხალხისთვის“ და „ლელოს“.
ყველაზე მაღალი ნეგატიური რეიტინგი „ნაციონალურ მოძრაობას“ აქვს — გამოკითხულთა 35$ აცხადებს, რომ ამ პარტიას არცერთ შემთხვევაში არ მისცემდა ხმას. 27%-ს აქვს იგივე დამოკიდებულება „ქართული ოცნების“ მიმართ, ხოლო 19%-ს — „პატრიოტთა ალიანსისადმი“.
კვლევის თანახმად, ქვეყანაში გამძაფრებულია პოლიტიკური პოლარიზაციის შეგრძნება. კითხვაზე, ჩვენი ქვეყნის პოლიტიკა საზოგადოების დაყოფისკენ არის მიმართული თუ გაერთიანებისკენ, გამოკითხულთა 71% ამბობს, რომ საქართველო სულ უფრო მეტად პოლარიზებულია. მზარდი პოლარიზაციის ფონზე, საქართველოს მოქალაქეების 60%-ს სურს, რომ მომავალ არჩევნებზე ახალი პოლიტიკური პარტიები იხილოს.
ამასთან, გამოკითხულთა 49% მტკიცედ ან ნაწილობრივ მხარს უჭერს ვადამდელ არჩევნებს, 36% წინააღმდეგია, ხოლო 10% მიიჩნევს, რომ ვადამდელი არჩევნების ჩატარებას აზრი არ აქვს და არაფერს შეცვლის.
კვლევა 2022 წლის 4-24 მარტის პერიოდში, საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ ჩატარდა. კვლევის საველე სამუშაოები ჩატარებულია IPM-ის მიერ. მონაცემები შეგროვდა პირისპირ ინტერვიუს გზით. შერჩევა მოიცავდა საარჩევნო ხმის უფლებისა და ასაკის მქონე 1 486 რესპონდენტს. მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5 %, გამოპასუხების მაჩვენებელი 64%-ია. კვლევა აშშ-ის საერთაშორისო განვითარების სააგენტოს დაფინანსებით ჩატარდა.
