წალკისა და დმანისის მაჟორიტარმა დეპუტატმა კახა ოქრიაშვილმა, ბიზნესმენ და ყოფილ პარლამენტარ ცეზარ ჩოჩელთან ერთად, ახალი პარტია დააარსა.
„ნეტგაზეთს“ ახალი პარტიის პრესსამსახურში დაუდასტურეს, რომ პარტიის სახელმწოდებაა „პროგრესი და თავისუფლება“ . ის ცესკოში 2020 წლის საპარლამენტო არჩევნებისთვის უკვე დარეგისტრირდა.
კახა ოქრიაშვილსა და ცეზარ ჩოჩელთან ერთად, პარტიის დამაარსებელია ცეზარ ჩოჩელის ძმა, ლაშა ჩოჩელი.
კახა ოქრიაშვილი, — სააფთიაქო ქსელ PSP-ს დამფუძნებელი, — რომელიც პროპორციულ საარჩევნო სისტემაზე გადასვლის ერთ-ერთი მთავარი მოწინააღმდეგე იყო, „ქართული ოცნების“ მაჟორიტარი დეპუტატების კანდიდატებს შორის არ დაუსახელებიათ.
როგორც „ქართული ოცნების“ ერთ-ერთმა ლიდერმა, გია ვოლსკიმ განაცხადა, ოქრიაშვილის „პიროვნების მიმართ არავითარი პრეტენზია“ არ არსებობდა, მაგრამ „როგორც პოლიტიკოსი, იგი დაშორდა … გუნდს“.
ცეზარ ჩოჩელი ბიზნესმენია, რომელიც 2004-08 წლებში პარლამენტარი იყო. ის 2016 წლის საპარლამენტო არჩევნებშიც იყრიდა კენჭრს მცხეთის დამოუკიდებელ მაჟორიტარად, თუმცა „ქართული ოცნების“ კანდიდატ დიმიტრი ხუნდაძესთან მეორე ტურში დამარცხდა — 60 ხმით.