ინგლისის საფეხბურთო პირველობის ტოპ-დივიზიონის — პრემიერ-ლიგის ფეხბურთელებს მაისურზე უკან, გვარების ნაცვლად Black Lives Matter ეწერებათ, იუწყება BBC.
ლოზუნგი Black Lives Matter (შავკანიანთა სიცოცხლე მნიშვნელოვანია) განსაკუთრებით გამოყენებადი გახდა 25 მაისს აშშ-ში მომხდარი შემთხვევის შემდეგ, როცა პოლიციელმა აფროამეარიკელი მოქალაქის, ჯორჯ ფლოიდის დაკავებისას მას ყელზე მუხლი დააჭირა, რის შედეგადაც, აუტოფსიის თანახმად, ფლოიდი გარდაიცვალა. ამის შემდეგ აშშ-ში უკვე 3 კვირაა, საპროტესტო აქციები მიმდინარეობს.
BBC-ის ცნობით, ლოზუნგი ფეხბურთელების გვარების ნაცვლად დარჩება სეზონის დარჩენილი ნაწილის — 12 შეხვედრის განმავლობაში.
გარდა ამისა, ფეხბურთელებმა გამოაქვეყნეს განცხადება: „ჩვენ, მოთამაშეები, ერთად ვდგავართ საერთო მიზნისთვის — რასობრივი წინასწარგანწყობების აღმოფხვრისთვის“. ფეხბურთელების თქმით, ემხრობიან „ინკლუზიას, პატივისცემასა და ყველასთვის თანასწორი შესაძლებლობების სამყაროს, მიუხედავად მათი კანის ფერისა“.
ამავე თემაზე გირჩევთ:
- „მინესოტაში შავკანიანი მოქალაქის მკვლელობისთვის პოლიციელთა დასჯას ითხოვენ“
- „რა შედეგები მოიტანა აშშ-ში მიმდინარე პროტესტებმა 2 კვირაში“
- „არეულობა აშშ-ში — თეთრ სახლთან აქციის გამო ტრამპი ბუნკერში გადაიყვანეს“
- „ბოსტონში კოლუმბის ქანდაკებას თავი მოაჭრეს“
- „აშშ-ში კოლუმბის ძეგლი ჩამოაგდეს, ბელგიაში ლეოპოლდ მეორის მონუმენტი აიღეს“