აზერბაიჯანში კარანტინი გამოცხადდა – 10-ზე მეტი პირის შეკრება იკრძალება

24 მარტიდან 20 აპრილამდე აზერბაიჯანში სპეციალური საკარანტინო რეჟიმი გამოცხადდა. კარანტინის დროს:

  1. საჯარო სივრცეებში 10-ზე მეტი ადამიანის შეკრება იკრძალება;
  2. 65 წელს გადაცილებულ მოქალაქეებს სახლების დატოვება ეკრძალებათ;
  3. ბაქო, სუმგაიტი და აფშერონის ნახევარკუნძულის სხვა რაიონები ჩაიკეტა და შესვლა-გამოსვლა მხოლოდ სასწრაფო დახმარების, სამაშველო და სატვირთო ავტომობილებისთვის არის ნებადართული;
  4. საქალაქთაშორისო ტრანსპორტი აიკრძალა;
  5. ბაქოში ავბოტუსების დამატებითი ხაზები გამოიყო დილის 6-დან საღამოს 10 საათამდე მეტროსადგურებს შორის; მოქალაქეებს მეტროთი გადაადგილებისგან თავის შეკავებას ურჩევენ;
  6. რეკომენდირებულია 2-მეტრიანი დისტანციის დაცვა მოქალაქეებს შორის;
  7. სავაჭრო ცენტრები დაიხურა — ფუნქციონირებს მხოლოდ აფთიაქები, სუპერმარკეტები და სასურსათო მაღაზიები;

„კორონავირუსი ქვეყნის შიგნით ვრცელდება, რაც სერიოზულ ზომებს მოითხოვს“, – თქვა ჯანდაცვის მინისტრის მოადგილემ სპეციალური რეჟიმის გამოცხადებისას.

ბოლო მონაცემებით, აზერბაიჯანში კორონავირუსით ინფიცირების 72 შემთხვევაა დადასტურებული. ერთი პაციენტი 12 მარტს გარდაიცვალა – 51 წლის ქალი, რომელსაც ჯანმრთელობის სხვა არაერთი მძიმე პრობლემა ჰქონდა.

„30-მდე ადამიანი საზღვარგარეთ დაინფიცირდა, დანარჩენები – ქვეყნის შიგნით“, – განაცხადა დღეს ჯანდაცვის მინისტრის მოადგილემ.

ამასთან, გადაიდო აზერბაიჯანის გრან-პრი, რომლის გახსნაც ბაქოში 7 ივნისს იყო დაგეგმილი.

24 მარტის მონაცემებით, საქართველოში COVID-19-ის 66 დადასტურებული შემთხვაა, სომხეთში – 235.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com