ევროსაბჭოს მინისტრთა კაბინეტმა მერაბიშვილის საქმის აღსრულება დააჩქარა – კახიძე

საპარლამენტო უმცირესობის ლიდერის, ოთო კახიძის განცხადებით, ევროსაბჭოს მინისტრთა კომიტეტმა მარტის შეკრებაზე ვანო მერაბიშვილის საქმის აღსრულება დაჩქარებული პროცედურით გადაწყვიტა.

კახიძის განმარტებით, საქმეების აღსრულება ხდება ორი გზით – სტანდარტული და დაჩქარებული. მისივე ინფორმაციით, სტანდარტულად აღსრულდება გადაწყვეტილებათა აბსოლუტური უმრავლესობა.

როგორც დეპუტატი განმარტავს, დაჩქარებული აღსრულების წესს ირჩევენ მხოლოდ მაშინ, როდესაც სასწრაფოდ მისაღებია ინდივიდუალური ზომები ან საქმე გვაქვს მნიშვნელოვან სისტემურ პრობლემებთან.

“იდეაში, ეს უკვე სიგნალია მთავრობისთვის, რომ თვალი გაუსწოროს მძიმე რეალობას და გაათავისუფლოს მერაბიშვილი, მაგრამ არ მაქვს იმედი, რომ ოცნება ადეკვატურობას გამოიჩენს. როგორც ჩანს, ეშინიათ სტრასბურგში გამარჯვებული მერაბიშვილის, მაგრამ მოუწევთ გამოშვება, მალე,” – წერს სოციალურ ქსელში ოთო კახიძე.

2017 წლის დეკემბერში 9 ევროპარლამენტარმა ქართულ მხარეს მერაბიშვილის გათავისუფლებისკენ მოუწოდა. განცხადებას ხელი მოაწერეს ევროპის სახალხო პარტიის, სოციალ-დემოკრატიული ფრაქციისა და ლიბერალური პარტიის წარმომადგენლებმა. გასული წლის 28 დეკემბერს აღმოსავლეთ საქართველოს მეორე ადგილობრივმა საბჭომ (ე.წ. უდოს კომისიამ), რომელიც მსჯავრდებულის პირობით ვადაზე ადრე გათავისუფლების საკითხს წყვეტს, ყოფილი პრემიერს შეწყალებაზე უარი უთხრა.

რისთვის იხდის სასჯელს ვანო მერაბიშვილი?

ვანო მერაბიშვილი, რომელსაც 2012 წელს, ხელისუფლების შეცვლამდე პრემიერ-მინისტრის თანამდებობა ეკავა, მანამდე კი შინაგან საქმეთა მინისტრი იყო, 2013 წლის 21 მაისს დააკავეს. ის რამდენიმე საქმეზეა მსჯავრდებული, მათ შორის, ყველაზე მაღალი სასჯელი პარლამენტარ ვალერი გელაშვილის ცემის საქმეზე აქვს.

  • 2014 წლის 17 თებერვალს ქუთაისის საქალაქო სასამართლომ ვანო მერაბიშვილს 5 წლით თავისუფლების აღკვეთა მიუსაჯა. ყოფილ პრემიერ-მინისტრს ასევე აეკრძალა თანამდებობის დაკავება 1 წლის და 6 თვის ვადით. ვანო მერაბიშვილი სასამართლომ დამნაშავედ ცნო სისხლის სამართლის კოდექსის 160-ე მუხლის მესამე ნაწილით წარდგენილ ბრალდებაში, რაც გულისხმობს ბინის ან სხვა მფლობელობის ხელშეუხებლობის დარღვევას. სასამართლომ ყოფილი პრემიერი ასევე დამნაშავედ ცნო სისხლის სამართლის კოდექსის 182-ე მუხლის მეორე ნაწილის “დ” ქვეპუნტით (მითვისება-გაფლანგვა). მერაბიშვილი სასამართლომ დამნაშავედ ცნო სისხლის სამართლის კოდექსის 1641 მუხლით (ამომრჩევლის მოსყიდვა) წარდგენილ ბრალდებაშიც.
  • 2014 წლის 27 თებერვალს 2011 წლის 26 მაისის მიტინგის დაშლის საქმეზე თბილისის საქალაქო სასამართლომ ყოფილ შს მინისტრს 6 წლით თავისუფლების აღკვეთა მიუსაჯა, თუმცა ამნისტიის შედეგად ეს ვადა შემცირდა და 4 წლით და 6 თვით განისაზღვრა. ვანო მერაბიშვილს 26 მაისის საქმეზე ბრალი 2013 წლის 28 მაისს წაუყენეს სისხლის სამართლის კოდექსის 333-ე მუხლის მესამე ნაწილის „ბ” და „გ” ქვეპუნქტებით, რაც სამსახურებრივი უფლებამოსილების გადამეტებას გულისხმობს ძალადობით ან იარაღის გამოყენებით და დაზარალებულის პირადი ღირსების შეურაცხყოფით. მოსამართლემ “გ” ქვეპუნქტით განსაზღვრული ბრალდების ნაწილში ყოფილი შს მინისტრი უდანაშაულოდ, ხოლო „ბ” ქვეპუნქტით დამნაშავედ ცნო.
  • 2014 წლის 20 ოქტომბერს სასამართლომ ვანო მერაბიშვილი სანდრო გირგვლიანის საქმეზე ცნო დამნაშავეთ. შედეგად, ყოფილ პრემიერს 3 წლით თავისუფლების აღკვეთა მიესაჯა და 3 წლის ვადით ჩამოერთვა თანამდებობის დაკავების უფლება. ამ საქმეზე მერაბიშვილს ბრალი წარდგენილი ჰქონდა სისხლის სამართლის კოდექსის 332-ე მუხლის მეორე ნაწილით, რაც გულისხობს სამსახურებრივი უფლებამოსილების ბოროტად გამოყენებას, და 341-ე მუხლით, რაც გულისხმობს სამსახურებრივ სიყალბეს.
  • 2016 წლის 22 სექტემბერს თბილისის საქალაქო სასამართლომ ყოფილი შს მინისტრი პარლამენტარ ვალერი გელაშვილზე განხორციელებული თავდასხმის საქმეში გაამტყუნა, ხოლო ორ დღეში ეს გადაწყვეტილება ძალაში დატოვა სააპელაციო სასამართლომაც. 2017 წლის 1 ნოემბერს გელაშვილის ცემის საქმეზე ვანო მერაბიშვილი უზენაესმა სასამართლომაც გაამტყუნა. ვანო მერაბიშვილი დამნაშავედ ცნეს სისხლის სამართლის კოდექსის 333-ე მუხლის მე-3 ნაწილის “ბ” ქვეპუნქტით, 117-ე მუხლის მეხუთე ნაწილის “ე” ქვეპუნქტით ჩადენილი დანაშაულისთვის. 2012 წლის 28 დეკემბრის “ამნისტიის შესახებ” საქართველოს კანონისა და სასჯელის შთანთქმის პრინციპის გამოყენებით, საბოლოოდ სასჯელის ზომად ყოფილ შს მინისტრს 6 წლისა და 9 თვის ვადით თავისუფლების აღკვეთა მიესაჯა.
  • 2017 წლის  3 მაისს თბილისის საქალაქო სასამართლომ “აკურას” ღვინის ქარხნის საქმეზე ვანო მერაბიშვილი დამნაშავედ ცნო სამსახურებრივი უფლებამოსილების გადამეტებისთვის. სასამართლოს გადაწყვეტილებით, ყოფილი პრემიერი სისხლის სამართის კოდექსის 333-ე მუხლის მეორე ნაწილით გათვალისწინებული დანაშაულის ჩადენისთვის განესაზღვრა 3 წლით თავისუფლების აღკვეთა, რაც “ამნისტიის შესახებ” კანონის გამოყენებით შეუმცირდა და განესაზღვრა 2 წლით და 3 თვით თავისუფლების აღკვეთა. მას დამატებითი სასჯელის სახით დაეკისრა თანამდებობის დაკავების უფლების ჩამორთმევა 1 წლის და 6 თვის ვადით.

ვანო მერაბიშვილი მის დაპატიმრებას პოლიტიკურად მოტივირებულად მიიჩნევს და აცხადებს, რომ ხელისუფლებამ ამ გზით ის, როგორც “ნაციონალური მოძრაობის” ერთ-ერთი ლიდერი, ჩამოაშორა პოლიტიკურ პროცესებს და შესაძლებლობა არ მისცა, მონაწილეობა მიეღო 2013 წლის საპრეზიდენტო არჩევნებში.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.