საზოგადოება

პარლამენტმა II მოსმენით მიიღო კანონი აზარტულ თამაშებზე

17 დეკემბერი, 2021 • 2028
პარლამენტმა II მოსმენით მიიღო კანონი აზარტულ თამაშებზე

პარლამენტმა მეორე მოსმენით მიიღო საკანონმდებლო ცვლილებები, რომელიც აზარტული თამაშების რეკლამას კრძალავს, თამაშს მილიონამდე ადამიანს უზღუდავს და ითვალისწინებს ონლაინ აზარტულ თამაშების ორგანიზატორი კომპანიების ახლებურად დაბეგვრას.

ცვლილებების ნაწილი, – კერძოდ, აზარტული თამაშების რეკლამის აკრძალვა, – 2022 წლის პირველი იანვრიდან იყო დაგეგმილი, თუმცა კრიტიკის შემდეგ, 2022 წლის პირველ მარტამდე გადავადდა.


13 დეკემბერს საქართველოს პარლამენტში წარადგინეს კანონპროექტთა პაკეტი, რომელიც სათამაშო ბიზნესს ახალ რეგულაციებს უწესებს სხვადასხვა მიმართულებით.

კერძოდ:

  • სრულად იკრძალება როგორც ონლაინ, ასევე ფიზიკურ სივრცეში არსებული სათამაშო ბიზნესის რეკლამირება (თუმცა სპონსორობა კვლავ დაშვებული იქნება);
  • სრულად იკრძალება 25 წლამდე პირებისთვის თამაში;
  • ონლაინ სათამაშო ბიზნესის დაბეგვრის მექანიზმი იცვლება.

ცვლილებები რამდენიმე კანონში შედის, მათ შორის, ახალი შეზღუდვების პარალელურად, ამ შეზღუდვების დარღვევისთვის დაწესებული ჯარიმები იზრდება ადმინისტრაციულ სამართალდარღვევათა კოდექსში.

პარლამენტმა ცვლილებები დაჩქარებულად განიხილა.

ვრცლად:


ოპოზიციონერი პარლამენტარების ნაწილი, – გიორგი ვაშაძე, „ლელოს“ წარმომადგენლები, – აცხადებს, რომ ემხრობიან ლუდომანიის პრობლემის მოგვარებას, თუმცა გამოხატავენ შეშფოთებას იმ შესაძლო დარტყის გამო, რაც მედიას მიადგება აზარტული თამაშების აკრძალვით.

„ლელოს“ ერთ-ერთი ლიდერი ბადრი ჯაფარიძე გამოვიდა ინიციატივით, რომ – რადგან, მისი თქმით, აზარტული თამაშების რეკლამა ტელევიზიების შემოსავლების 25%-ს შეადგენს და ტელემედიისთვის დიდი დარტყმა იქნება, – მოხდეს რეკლამის ეტაპობრივი აკრძალვა:

  • აზარტული თამაშების რეკლამა 1 მარტიდან, სამი თვით, ტელევიზიებში აიკრძალოს დილის 6-დან საღამოს 9 საამდე;
  • პარალელურად მოხდეს ტელევიზიების დავალდებულება, გაუშვან სოციალური რეკლამა, რომელიც აზარტული თამაშების მავნე ზეგავლენას აჩვენებს;
  • თუ წინა ორი შეთავაზება არ იქნება მოწონებული, დაწესდეს დროებითი საგადასახადო შეღავათები მედიებისათვის, სანამ სარეკლამო ბიზნესი არ აღდგება.

ცვლილებების ნაწილი, – რეკლამის აკრძალვა, – პირველი იანვრიდან იყო დაგეგმილი, თუმცა კრიტიკის შემდეგ, დღეს კანონპროექტის მომხსენებელმა დავით სონღულაშვილმა განაცხადა, რომ ამოქმედების ვადა პირველ მარტამდე გადავადდება.

მასალების გადაბეჭდვის წესი