“ქართული მარშის” ერთ-ერთი ლიდერი, ლადო სადღობელაშვილი პოლიციამ თბილისის მერობის სახელისუფლებო კანდიდატის, კახა კალაძის ცენტრალურ საარჩევნო შტაბთან დააკავა, სადაც ნაციონალისტებმა აქცია გამართეს.
საქართველოს შინაგან საქმეთა სამინისტროში ნეტგაზეთს განუცხადეს, რომ ლადო სადღობელაშვილი ადმინისტრაციული სამართალდარღვევათა კოდექსის 166-ე და 173-ე მუხლების საფუძველზეა დაკავებული, რაც პოლიციელის კანონიერ მოთხოვნაზე დაუმორჩილებლობასა და წვრილმან ხულიგნობას გულისხმობს.
“მივმართავ “ქართული ოცნების” გენერალურ მდივან ბატონ კახა კალაძეს, “ქართული ოცნების” თავმჯდომარე გიორგი კვირიკაშვილს და საპარლამენტო უმრავლესობის ლიდერ ბატონ თალაკვაძეს, გამოვიდნენ ხალხთან და დადონ პირობა, რომ ქართული მიწა არ გაიყიდება. ეს არის ჩვენი მოთხოვნა”, – განაცხადა აქციის ერთ-ერთმა ორგანიზატორმა სანდრო ბრეგაძემ აქციაზე.
მარშის მონაწილეები აპროტესტებენ საკანონმდებლო ინიციატივას, რომლის მიხედვითაც ცვლილება შედის „სასოფლო-სამეურნეო დანიშნულების მიწის საკუთრების შესახებ“ საქართველოს კანონში. თუ ამჟამად მოქმედი მორატორიუმის მიხედვით უცხოელებს საქართველოში სასოფლო-სამეურნეო დანიშნულების მიწის ყიდვის უფლება არ აქვთ, ცვლილებები ასეთ უფლებას მიანიჭებს ბანკებს.
საპროტესტო აქციის მონაწილეები კალაძის შტაბთან მისვლამდე ფონდ “ღია საზოგადოება-საქართველოს” ოფისთან მივიდნენ და ფონდის დახურვას მოითხოვდნენ, თუმცა გაუგებარია, რა კავშირშია ამ საკითხთან ჯორჯ სოროსის მიერ დაფუძნებული ფონდი. პოლიციამ მათ შენობასთან ახლოს მისვლის შესაძლებლობა არ მისცა.
“ქართული მარშის” წევრებს თან ჰქონდათ ტრასპარანტები, წარწერით “კობახიძე, ჩუგოშვილი, თალაკვაძე – სოროსის მონები”.
აქციას დასაწყისშივე შეუერთდა დეპუტატი ადა მარშანიაც, თუმცა ის ფონდის საქმიანობის აკრძალვას არ ითხოვს.
“ქართული მარშის” ერთ-ერთი ლიდერი ლადო სადღობელაშვილი თბილისის მერობის სახელისუფლებო კანდიდატის კახა კალაძის ოფისის წინ სიტყვით გამოდის. 12.09.2017. სქრინი: ნეტგაზეთი
- 2017 წლის 16 ივნისს საქართველოს პარლამენტმა უცხო ქვეყნის მოქალაქეების მიერ სასოფლო-სამეურნეო მიწის ყიდვაზე მორატორიუმი გამოაცხადა, რაც იმას ნიშნავს, რომ ასეთი დანიშნულების მიწას უცხოელები ვეღარ შეიძენენ. თუმცა, ახლა პარლამენტში ინიცირებული კანონპროექტის მიხედვით, მორატორიუმი აღარ გავრცელდება კანონმდებლობით განსაზღვრულ კომერციულ ბანკებზე. კომერციულ ბანკებს ექნებათ ვალდებულება, სასოფლო-სამეურნეო დანიშნულების მიწის ნაკვეთზე საკუთრების უფლების მოპოვებიდან 2 წლის ვადაში გაასხვისონ შესაბამის უფლებამოსილ პირზე.
- სოროსის დაფუძნებულმა ფონდმა, რომლის შენობის წინაც დღეს აქცია იმართება, 2014 წლამდე 80 მილიონ დოლარზე მეტი დახარჯა საქართველოში სხვადასხვა პროგრამების განხორციელებისთვის. ფონდის მიერ დაფინანსებულ პროექტებს შორისა ეკლესიებისა და ფრესკების რესტავრაციაც – მათ შორის, ყინწვისის ანგელოზის ცნობილი ფრესკა, დავით გარეჯის მხატვრობა და ასე შემდეგ. ამჟამად ფონდს რამდენიმე პროგრამა აქვს – ადამიანის უფლებები, საზოგადოებრივი ჯანმრთელობა, მედია, ევროინტეგრაცია და ა.შ
- ფონდი “ღია საზოგადოება – საქართველო” ღია საზოგადოების ფონდების ქსელის წევრი ორგანიზაციაა, რომელიც 1994 წელს ნიუ-იორკის “ღია საზოგადოების ინსტიტუტმა” დააფუძნა. ღია საზოგადოების ფონდების ქსელი ჯორჯ სოროსის მიერ დაარსებული ფონდების, პროგრამებისა და ინსტიტუტების ქსელია, რომელიც მიზნად ისახავს ღია საზოგადოების ჩამოყალიბებასა და განვითარებას მსოფლიოში, განსაკუთრებით კი – ცენტრალური და აღმოსავლეთ ევროპის ყოფილ კომუნისტურ ქვეყნებში.
