შინაგან საქმეთა სამინისტროს პრესსამსახურის ცნობით, ტელეკომპანია “იბერიის” წამყვანის, გიორგი გასვიანის განცხადების საფუძველზე გამოძიება ბორჯომის რაიონულ პოლიციაში მიმდინარეობს 126-ე მუხლით.
“ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ამ კოდექსის 120-ე მუხლით გათვალისწინებული შედეგი, – ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე, ანდა თავისუფლების აღკვეთით ვადით ერთ წლამდე”, – ვკითხულობთ სისხლის სამართლის კოდექსში 126-ე მუხლთან დაკავშირებით.
შსს-ში აცხადებენ, რომ საქმის შესწავლა გენერალურმა ინსპექციამაც დაიწყო. უწყების პრესსამსახურში დამატებით შეკითხვებს არ პასუხობენ. შესაბამისად, უცნობია, შეუწყდება თუ არა პოლიციელს უფლებამოისლება გამოძიების პროცესში.
“რამდნადაც ჩემთვის ცნობილია, ამ ეტაპზე უნდა დაკითხულიყო დაზარალებული, ეს ჟურნალისტი. მხოლოდ ამის შემდეგ გატარდება შესაბამისი ღონისძიებები. კიდევ ერთხელ გიმეორებთ, თუ საჭირო იქნება, ეს პოლიციელი ჩამოშორდება თავის სამსახურს, გათავისუფლდება და პასუხისგებაშიც მიეცემა, თუკი ეს [ბრალდება] დადასტურდება. ყველაზე მკაცრი სანქციები იქნება გამოყენებული, ამის პირობას გაძლევთ მე იმიტომ, რომ იმას, რასაც ახლა ის ჟურნალისტი ამბობს, არანაირ ჩარჩოში არ ჯდება აბსოლუტურად”, – განაცხადა შინაგან საქმეთა მინისტრმა გიორგი მღებრიშვილმა.
როგორც გასვიანმა ტელეკომპანია “იბერიას” განუცხადა, დაპირისპირება მოხდა წუხელ, როდესაც ბორჯომში მოყინული გზისა და ავტომობილის გაუმართაობის გამო მისი მანქანა მოსრიალდა. პირები, რომლებსაც გასვიანი ცემაში ადანაშაულებს, წამყვანის თქმით, სწორედ იმ ქუჩაზე იმყოფებოდნენ. გასვიანი ამბობს, რომ დაპირისპირება სწორედ მანქანის მოსრიალებას უკავშირდება. მისი თქმით, პოლიციელი და მისი მეგობრები უყვიროდნენ, რომ ავარიით მათი მოკვლა უნდოდა და არ აძლევდნენ ახსნა-განმარტების საშუალებას, რატომ მოსრიალდა ავტომობილი.
“ბორჯომში წუხელ ღამით ჩამოვედი, მოვდიოდი სასტუმრო ქრაუნ პლაზაში ჟურნალისტების სემინარზე , რომელიც ეხებოდა ადამიანის უფლებათა დაცვის გაშუქებას. იმის მაგივრად, რომ ეს სემინარი მომესმინა, ფაქტობრივად, ჩემს თავზე განვიცადე ადამიანის უფლებების დარღვევა სამართალდამცველის მხრიდან. მე გზა ამერია, ამ დროს ეს პირები აღმოჩნდნენ იმავე გზაზე, სადაც მე მომისრიალდა მანქანა გაუმართაობის გამო. შემდეგ ისინი მომადგნენ… გადმოვიდა მანქანიდან პოლიციელი, რომელმაც მანქანაში მჯდომს დამარტყა, ახნსა-განმარტების საშუალებაც კი არ მომცა. იარაღი მომაბჯინა თავზე. მუქარით, ფიზიკური და სიტყვიერი შერაცხყოფებებით, ფაქტობრივად, არ ამახსნევინეს, თუ რა მდგომარეობაში ვიყავი, რომ მანქანა გამოვიდა მწყობრიდან. შემდეგ გადმომიყვანეს მანქანიდან, მცემეს, მირტყამდნენ თავში, ყბაში ასევე- მხარში. მათ ვუთხარი, რომ ჟურნალისტი ვიყავი და სასტურმოში მივდიოდი. მათ მითხრეს, რომ შენ ფხიზელი არ იქნები და ახლა განყოფილებაში წაგათრევთ და ნახავ, რაც მოგივაო. ცემის შემდეგ მათ მითხრეს, რომ შენ რადგანაც ჟურნალისტი ხარ, ალბათ, ხვალიდან ამის გამო ამბავს ატეხავო. მათ მიმიყვანეს სასტუმროდე იმ პირობით, რომ მე არ ვიტყოდი ამის შესახებ და არ გავამხელდი. აღნიშნული პირებიდან ერთი იყო პოლიციელი მიშა ხუციშვილი. დანარჩენი ორი მისი მეგობრები იყვნენ. სამივე მათგანი- სამოქალაქო ფორმაში”, – განაცხადა გიორგი გასვიანმა.
შს მინისტრის, გიორგი მღებრიშვილის თქმით, თუ დადასტურდა “იბერიის” ჟურნალისტის, გიორგი გასვიანის ნათქვამი იმის შესახებ, რომ ბორჯომში პოლიციელმა სცემა, პოლიციელი უმკაცრესად დაისჯება.
“რა კომენტარი შეიძლება გავაკეთო? ერთი ის შემიძლია გითხრათ სრული პასუხისმგებლობით და პირობა მოგცეთ, იმას, რასაც ეს ადამიანი [გიორგი გასვიანი, ჟურნალისტი] ამბიბს, თუ დადასტურდა, უმკაცრესად აგებს პასუხს ის პოლიციელი, რომელმაც ეს ჩაიდინა.”
