მსვლელობა ქალთა მიმართ ძალადობის წინააღმდეგ თბილისში

25 ნოემბერს ქალთა მიმართ ძალადობის აღკვეთის საერთაშორისო დღე აღინიშნება. ამ დღესთან დაკავშირებით ქალთა მოძრაობა მსვლელობას მართავს. მსვლელობა პუშკინის სკვერიდან დაიწყო და თაბუკაშვილის ქუჩაზე, პოლიციის შენობასთან დასრულდება.

მსვლელობის მონაწილეებმა ძალადობის მსხვერპლი ქალების სახელით დროშების მაგივრად კაბები აღმართეს და თაბუკაშვილის ქუჩის მიმართულებით დაიძრნენ.

2015 წელს „112“-ზე ოჯახურ კონფლიქტთან დაკავშირებით 15 910 გამოძახება დაფიქსირდა. პოლიციამ გამოძიება მხოლოდ 949 საქმეზე დაიწყო და მხოლოდ 2 727 შემთხვევაზე გასცა შემაკავებელი ორდერი. დანარჩენ შემთხვევებს გაგრძელება არ მოჰყოლია, ამიტომ მსვლელობის მონაწილეები მოითხოვენ, შსს-ში შეიქმნას სპეციალური დანაყოფი, რომელიც გენდერულად მოტივირებულ დანაშაულებზე იმუშავებს:

“ჩვენი სახელმწიფო ბრმაა გენდერულად მოტივირებულ დანაშაულთა მიმართ, რადგან მას აკლია კომპეტენცია და ნება: დღემდე არც ერთი ფემიციდის/ქალთა მკვლელობის საქმეში სახელმწიფოს არ დაუდგენია გენდერული დისკრიმინაციის მოტივი. ჩვენ შინაგან საქმეთა სამინისტროსგან მოვითხოვთ სპეციალური დანაყოფის შექმნას, რომელიც გენდერულად მოტივირებულ დანაშაულებზე იმუშავებს და რომელსაც ექნება შესაფერისი ცოდნა და მანდატი.”

25 ნოემბრიდან იწყება მსოფლიოში გენდერული ძალადობის წინააღმდეგ 16–დღიანი აქცია. მას ასევე უწოდებენ “თეთრი ლენტის კამპანიას”, რომელიც 10 დეკემბრის ჩათვლით გაგრძელდება.