“ჩვენ, ზნაურის რაიონის საზღვრისპირა სოფლების მოსახლეობა დაჟინებული თხოვნით მოგმართავთ, მოაშოროთ საკონტროლო გამშვები პუნქტები ე.წ. სასაზღვრო ზონაში, რომლებიც ჩვენს სოფლებში შემოსასვლელად არის დადგმული”, – ასე იწყება მიმართვის წერილი, რომლის ადრესატი სამხრეთ ოსეთის დე ფაქტო რესპუბილიკის პრეზიდენტი ლეონიდ თიბილოვია.

წერილში, რომელსაც ამ ეტაპზე ზნაურის რაიონის რამდენიმე ასეული მოსახლე აწერს ხელს, ნათქვამია, რომ აღნიშნული პუნქტები, რომლებიც 2015 წლის ნოემბრის დადგენილებით, ცხინვალის კონტროლირებად ტერიტორიაზევე, საზღვრისპირა სოფლებში შესასვლელად გაკეთდა, არღვევს მათ კონსტიტუციურ უფლებებს და ეწინააღმდეგება სამხრეთ ოსეთის რესპუბლიკის კონსტიტუციის 24-ე მუხლს: ყველა, ვინც სამხრეთ ოსეთის რესპუბლიკის ტერიტორიაზე კანონიერად იმყოფება, აქვთ თავისუფალი გადაადგილების უფლება მის ტერიტორიაზე.

“აღნიშული რეჟიმი წყვეტს ამ სოფლების მოსახლეობას დანარჩენი ქვეყნისგან, ცხინვალისგან. გარდა ამისა, ის დამატებით ფსიქოლოგიურ ემოციურ პრობლემებს ქმნის ადამიანებისთვის, როდესაც, მაგალითად, მოხუცი მშობლების სანახავად მათ ე.წ. საშვის აღება უწევთ. ასეთი შეურაცხმყოფელი მოპყრობა, როდესაც საკუთარ მიწაზე ვერ გადაადგილდები და მთელ დროს საპასპორტოში კარგავ, უნდობლობას იწვევს ხელისუფლების მიმართ”.