“ქართული პარტია” დატოვეს თბილისის რაიონული ორგანიზაციების თავმჯდომარეებმა, თუმცა პარტიის პრესსამსახურში აცხადებენ, რომ შესაბამისი განცხადებით პარტიისთვის მათ ამ დრომდე არ მიუმართავთ.

“ჩვენ ვაკეთებთ განცხადებას “ქართული პარტიიდან” წამოსვლის თაობაზე. ამის მიზეზია გუშინწინ მომხდარი ფაქტი – ეროსი კიწმარიშვილის შეჭრა თავისუფალ მედიაში, “მაესტრო”–ში. ასევე, მინდა ავღნიშნო, რომ პარტიაში ჩვენ ვიყავით სოზარ სუბარის გამო. შესაბამისად, ჩვენი წამოსვლა “ქართული პარტიიდან” უკავშირდება სოზარ სუბარის წამოსვლასაც. მან სამი კვირის წინ დატოვა პარტია და ჩვენც მასთან ერთად ვართ წამოსულები. უბრალოდ საჯაროდ განცხადება აქამდე არ გაგვიკეთებია. ყველა ჩვენმა თანამშრომელმა დატოვა პარტია. პარტია ჩვენთან ერთად ბევრმა წევრმა დატოვა და უახლოეს დღეებში მსგავს განცხადებას რეგიონული ორგანიზაციების თავმჯდომარეებიც გააკეთებენ,” – განაცხადა ისანი–სამგორის რაიონის პარტიის ორგანიზაციის თავმჯდომარემ დათო ჩართოლანმა.

“ქართული პარტია” დატოვეს ვაკე–საბურთალოს რაიონის პარტიის ორგანიზაციის თავმჯდომარე – თამარ ფიოლიამ, მთაწმინდა–კრწანისის რაიონის პარტიის ორგანიზაციის თავმჯდომარე – ზურაბ ღონღაძემ, გლდანი–ნაძალადევის რაიონის პარტიის ორგანიზაციის თავმჯდომარემ იაგო შაიშმელაშვილმა, ისანი–სამგორის რაიონის პარტიის ორგანიზაციის თავმჯდომარემ დათო ჩართოლანმა და დიდუბე–ჩუღურეთის რაიონის პარტიის ორგანიზაციის თავმჯდომარემ ლელა დანგაძემ.