„ქართული ოცნების“ პარლამენტის პირველი ვიცე-სპიკერის, გია ვოლსკის განცხადებით, ეჭვი ეპარება, რომ წერილი, რომელიც პროპაგანდისტული მედიის მტკიცებით, თორნიკე რიჟვაძემ თვითმკვლელობის მცდელობამდე დაწერა, ნამდვილად მისი დაწერილია.

გია ვოლსკის „ტვ პირველის“ ჟურნალისტმა ჰკითხა, ეჭვი ეპარება თუ არა, რომ ეს წერილი თორნიკე რიჟვაძის დაწერილია.

„ხო, ეჭვი მეპარება“, – უპასუხა ვოლსკიმ.

დამაზუსტებელ კითხვაზე, თუ ვის შეიძლებოდა დაეწერა წერილი, მაგალითად, იმას ხომ არა, ვინც რიჟვაძესთან ერთად იყო სუფრაზე, ვოლსკი პასუხობს:

„ნუღარ ჩამეკითხებით, არ ვიცი. ხო, სუფრაზე იქვე დაწერა წერილი…ნუ მიბაიბურებთ პასუხს… ეგ არავინ არ იცის, ვინ რა წერილი დაწერა. მე არც არაფერს უარვყოფ, არც არაფერს ვამტკიცებ… მე ვერ ვიტყვი, რომ ეს შემდგარი ფაქტია, რომ ეს წერილი არსებობს ისეთი, როგორც თქვენ უწოდებთ, ჩვენმა მედიამ გაავრცელა. გამოძიება მიმდინარეობს და ყველაფერს თავის სახელს დაარქმევს. გამოძიება ვალდებულია, რომ დაადასტუროს, არის ეს წერილი თორნიკეს დაწერილი თუ არ არის. თუ მისი დაწერილია, მაშინ გაარკვიოს, ვინ რას აბრალებდა და საერთოდ რა მოხდა იქ“.

განახლება:

მოგვიანებით გია ვოლსკიმ მტკიცება დაიწყო, რომ მისი კომენტარი, სადაც ეჭვს გამოთქვამს წერილთან დაკავშირებით, „მწარე ირონია“ იყო.

„ეს უბადრუკები ცდილობენ ჩემი მწარე ირონიით ნათქვამი პასუხი ამ ალოგიკურ შეკითხვაზე – „ანუ ვიღაცამ თორნიკეს მაგივრად იქვე დაწერა წერილიო“ – ისე წარმოაჩინონ, თითქოს წერილის არსებობა დავაყენე ეჭვქვეშ… მიმდინარეობს გამოძიება, ექსპერტიზა იტყვის კომპეტენტურ პასუხს! და ზოგადად, აქოთებულია კონკრეტული მედიასივრცე ამ სისხლმოწყურებულთა ინტერპრეტაციებით“, – დაწერა ვოლსკიმ Facebook-ზე.