ახალი ამბები

„საქართველოსთვის“ შოვზე საგამოძიებო კომისიის შექმნას მხარს დაუჭერს

26 სექტემბერი, 2023 •
„საქართველოსთვის“ შოვზე საგამოძიებო კომისიის შექმნას მხარს დაუჭერს

პარტია „საქართველოსთვის“ აცხადებს, რომ პარლამენტში შოვის საკითხზე საგამოძიებო კომისიის შექმნას მხარს დაუჭერს, თუმცა, თუ კომისია შეიქმნება, პარტიის წევრები მის შემადგენლობაში არ შევლენ. ამის შესახებ პარტიამ „საქართველოსთვის“ განცხადება დღეს, 26 სექტემბერს, გაავრცელა.

როგორც პატრიის განცხადებაშია აღნიშნული, შინაგან საქმეთა მინისტრის ინტერპელაციამ და მათი გუნდის მიერ გაგზავნილ კითხვებზე კონსტიტუციის დარღვევით მიღებულმა პასუხებმა ნათელი გახადა, რომ ხელისუფლება მზად არ არის, ადეკვატური პასუხები გაეცეს მომხდარ სავარაუდო სამოხელეო გულგრილობას.

„ოცნების“ ხელისუფლება მზად არ არის, აიღოს პასუხისმგებლობა, რათა მომავალში მსგავსი ტრაგედიები თავიდან ავიცილოთ. „ოცნებისა“ და „ნაცმოძრაობის“ პირობებში, მაშინ, როდესაც ეს 2 დესტრუქციული ძალ  ამ ტრაგედიის ერთმანეთის დასაზიანებლად და პოლიტიკური დივიდენდების მოსაღებად გამოყენებას ცდილობს, საგამოძიებო კომისია ვერ იქნება ეფექტიანი მექანიზმი ჭეშმარიტების დასადგენად.

თუმცა, სანამ საზოგადოების ნაწილი (მათ შორის, შოვის მოსახლეობის ნაწილი) ჯერ კიდევ ფიქრობს, რომ საგამოძიებო კომისიას შეუძლია პოზიტიური როლის შესრულება სიმართლის დადგენაში, ჩვენი საპარლამენტო გუნდი არ იქნება ბარიერი და კომისიის შექმნას კენჭისყრისას ჩვენი ხმები ექნება, მაგრამ აქვე ხაზგასმით ვაცხადებთ, რომ კომისიის შექმნის შემთხვევაში, ჩვენ კომისიის წევრები არ ვიქნებით და მის საქმიანობაში მხოლოდ საექსპერტო ადამიანური რესურსებით ან სხვა საჭირო ფორმით მივიღებთ მონაწილეობას“, – აცხადებს პარტია „საქართველოსთვის“.

პარტიის „საქართველოსთვის“ გადაწყვეტილებას მიესალმებიან „ნაციონალურ მოძრაობაში“.

„თქვენ ყველამ ნახეთ წინა კვირაში მინისტრი, რომელიც იყო დაბარებული ინტერპელაციით და მისმა პასუხებმა შეკითხვებზე დატოვა უფრო მეტი ბუნდოვანება, რომელიც არის შოვის ტრაგედიასთან დაკავშირებით, ვიდრე შემოიტანა სიცხადე. თქვენ ნახეთ, რომ შს მინისტრი და მთელი მმართველი უმრავლესობა დაიხარჯა ხოტბაში და ქებაში, რომ შსს-ს და ადგილობრივი თვითმმართველობის ორგანოებმა თითქოს ეფექტურად იმოქმედეს როგორც კრიზის თავიდან არიდების პროცესში, ასევე თვითონ კრიზის შემდგომ პერიოდში. ეს ნამდვილად არ იყო ასე, არის მთელი რიგი პრობლემები, რომელსაც სჭირდება ძირეული გამოკვლევა და ანალიზის დადება, ამიტომ საგამოძიებო კომისიის შექმნა დღის წესრიგიდან ნამდვილად არ მოხსნილა და მივესალმებით ამ პოზიციას გახარიას პოლიტიკური ჯგუფისგან“, – განაცხადა ენმ-ის წევრმა დავით კირკიტაძემ.


შოვში მომხდართან დაკავშირებით საპარლამენტო საგამოძიებო კომისიის შექმნის ინიციატივა „ნაციონალურმა მოძრაობამ“ დააყენა. შოვში მომხდართან დაკავშირებით საგამოძიებო კომისიის შექმნა მოითხოვა პარტიის „ხალხისთვის“ ლიდერმა ანა დოლიძემაც.

თუმცა თავდაპირველად პარტია „საქართველოსთვის“ საგამოძიებო კომისიის შექმნას მხარს არ უჭერდა და აცხადებდა, რომ შოვთან დაკავშირებით პრემიერ-მინისტრისა და შინაგან საქმეთა მინისტრისთვის გაგზავნილ სადეპუტატო კითხვებზე პასუხს დაელოდებოდა.

მეწყერი შოვში 3 აგვისტოს ჩამოწვა. ამ დროისთვის ნაპოვნია შოვში სტიქიის შედეგად დაღუპული 32 ადამიანის ცხედარი. ეძებენ ერთ ადამიანს. შს მინისტრის თქმით, საძიებო სამუშაოები გაგრძელდება მანამ, სანამ იარსებებს მისი პოვნის თეორიული შანსი.

მასალების გადაბეჭდვის წესი