გახარიას პარტია აქციებთან დაკავშირებული რეპრესიული კანონების გაუქმებას ითხოვს

“ადამიანის უფლებებზე დაფუძნებული გარემოს უზრუნველყოფის გარეშე შეუძლებელია ქვეყნის დემოკრატიული იმიჯის დაცვა და საგარეო ამოცანების მიღწევა. კონსტიტუციით გარანტირებული შეკრებისა და მანიფესტაციის თავისუფლების დაცვა ნებისმიერი არაპროპორციული ჩარევისგან არის როგორც დემოკრატიის აუცილებელი საფუძველი – ასევე, საზოგადოების თვითრეგულირების და ავტონომიურობის განუყოფელი ნაწილი.  უფლებებაყრილი საზოგადოება უკვე ვეღარ ემსახურება მის წევრთა საუკეთესო ინტერესებს და ზოგადად გადარჩენის იმუნიტეტს კარგავს”, – წერია პარტიის განცხადებაში.

ექსპრემიერ გიორგი გახარიას პარტიის ინიციატივას გამოეხმაურა იუსტიციის მინისტრის პირველი მოადგილე, ბექა ძამაშვილი. მან ინიციატივას ალოგიკური უწოდა, ამის საფუძვლად კი დაასახელა არა კანონპროექტის შინაარსი, არამედ მისი ავტორების ვინაობა. ძამაშვილი ამბობს, რომ ღიმილის მომგვრელია შეკრების შესახებ და მანიფესტაციის თავისუფლად ჩატარებაზე საუბარი იმ პარტიისგან, რომელიც 2019 წლის 20 ივნისის აქციის დარბევის დროს შინაგან საქმეთა მინისტრი იყო.

“ეს გაჟღერებული ინიციატივა გახარიას გუნდის მხრიდან არის ნამდვილად ალოგიკური, არარაციონალური და ღიმილის მომგვრელი, რადგან ინიციატორები არიან სწორედ ამ გუნდის წარმომადგენლები. საზოგადოებისთვის ცნობილია, რომ 20 ივნისის საქმეზე სახელმწიფომ სტრასბურგის სასამართლოში დაადასტურა, რომ ნამდვილად ჰქონდა ადგილი პარლამენტის შტურმს და ასეთ დროს სახელმწიფოს აქვს ლეგიტიმური უფლება, თავი დაიცვას. თუმცა იმის გამო, რომ მაშინ შს მინისტრი გიორგი გახარია ხელმძღვანელობდა ამ აქციის შეწყვეტის ოპერაციას, ისე დაიგეგმა ეს ოპერაცია, რომ სახელმწიფოს დაუდგინდა დარღვევა, მრავალი დაზარალებული მივიღეთ და სახელმწიფოს მოუწია ევროპული სასამართლოს წინაშე ამ დარღვევების გამოსწორებაზე ზრუნვა”, – განაცხადა ძამაშვილმა.