ახალი ამბები

PSP-ს დამფუძნებელი წამლის ფასების ზრდაზე მთავრობის განცხადებებს პასუხობს

27 მარტი, 2023 • 1031
PSP-ს დამფუძნებელი წამლის ფასების ზრდაზე მთავრობის განცხადებებს პასუხობს

PSP-ს დამფუძნებელი და დეპუტატი კახა ოქრიაშვილი პასუხობს მთავრობის წარმომადგენლებისა და ჯანდაცვის სამინისტროს განცხადებას.

საქართველოს მთავრობამ ფარმაცევტული კომპანიების ნაწილი ფასების ხელოვნურ ზრდაში დაადანაშაულა ონკოლოგიური დანიშნულების ძვირადღირებულ მედიკამენტებზე რეფერენტული ფასების ამოქმედების შემდეგ.

ამის შემდეგ საქართველოს კონკურენციის ეროვნულმა სააგენტომ ფარმაცევტულ ბაზარზე ოთხი კომპანიის მიმართ მოკვლევის პროცესი დაიწყო, რომლითაც უნდა დადგინდეს, ხომ არ გაზარდეს აფთიაქებმა წამლებზე ფასი ხელოვნურად, “კარტელური გაირგების” შედეგად.

“ბატონი ღარიბაშვილის შემდეგ მედიკამენტების ფასების სამართლიანობაზე საუბარი ჯანდაცვის მინისტრმა, ბატონმა აზარაშვილმა განაგრძო. მან განაცხადა, რომ დაადგენს, სამართლიანია თუ არა ფასები ონკოლოგიურ მედიკამენტებზე. რა სამართლიანობაზეა საუბარი – სახელმწიფო აფინანსებს ონკოლოგიურ პროგრამას და თქვენ გაქვთ ორი ინსტრუმენტი:

1. მედიკამენტების და არა მარტო მედიკამენტების კონსოლიდირებული შესყიდვა, რისთვისაც ჯერ კიდევ სერგეენკოს მინისტრობის დროს, ჩემი რეკომენდაციით, დაარსდა სპეციალური სააგენტო, რომლის მეშვეობით თქვენ შეგიძლიათ გამოაცხადოთ საერთაშორისო ტენდერი და მიიღოთ უდაბლესი ფასები მედიკამენტებზე, რადგან მოხმარების სტატისტიკა არსებობს. სწორედ ეს უდაბლესი ფასი იქნება ყველაზე სამართლიანი.

2. მეორე ინსტრუმენტი არის რეფერენტული ფასების დაწესება, რომლის შემოღებასაც საქართველოს ფარმაცევტული ინდუსტრია 10 წელიწადზე მეტია ითხოვს, რათა დასრულდეს საუბარი ფასების სამართლიანობაზე.
აქვე, რეფერენტული ფასების დაწესება, ანუ ფასების დარეგულირება იმგვარად უნდა მოხდეს, რომ აფთიაქებში დასაქმებული ფარმაცევტები, რომლებიც მთავრობას მაღაზიის გამყიდველები ჰგონია, იღებდნენ ღირსეულ ანაზღაურებას, რომელიც 1 500 ლარს უნდა აღემატებოდეს.

სამწუხაროდ, დღეს ასეთი ხელფასები არ არის, დარგში არსებული ზეკონკურენციის გამო. ამავდროულად, კომპანიებსაც უნდა ჰქონდეთ ევროპული სტანდარტის მოგება, რათა უზრუნველყონ ყველა ტიპის მედიკამენტის ხარისხიანი შენახვა და გეოგრაფიული ხელმისაწვდომობა”, – ნათქვამია ოქრიაშვილის მიერ გავრცელებულ განცხადებაში.

მისი თქმით, სრულიად გაუგებარია მინისტრის მხრიდან საბოტაჟზე საუბარი.

“ვინ აწყობს საბოტაჟს – ფარმაცევტული სექტორი უწყობს საკუთარ მომხმარებელს? თუ ისაა საბოტაჟი, რომ „ოცნების“ ხელისუფლების წარმომადგენლები ბიზნესის მიმართ იყენებენ მსგავს რიტორიკას: „საბოტაჟი“, „მოღალატე“, „დესტრუქციული“?! მათი ტოტალური უცოდინრობა, გავრილოვის ჩამოყვანა, აგენტების შესახებ რუსული კანონი, ანაკლიის პორტის, ნამახვან-ჰესის, ჩვენი დიდი ფარმაცევტული წარმოების პროექტის შეჩერება და ა.შ. – აი, ეს არის საბოტაჟი! საქართველოს ფარმაცევტული ქსელები, განვითარების დონით, ლიდერები არიან პოსტსაბჭოთა სივრცეში და შესაძლოა, ევროპაშიც. ჩვენი ქვეყნის ხელისუფლება კი, მათ შორის, ჯანდაცვის სამინისტრო, ვერ იტყვის, რომ კარგი მმართველები და მენეჯერები არიან. ამას შედეგები გვიჩვენებს – საქართველოს სრული რეგრესი ყველა მიმართულებით! სხედხართ და მხოლოდ „ნაციონალურ მოძრაობას“ ადარებთ თავს, რომელსაც რთული ურთიერთობა ჰქონდა საქართველოს ბიზნესთან, ე.ი. ეკონომიკასთან, და თქვენ მათ ამ ნაწილშიც გაასწარით!
ქვეყანას ბიზნესი აშენებს და ხელისუფლება ვალდებულია, ხელი შეუწყოს ბიზნესის განვითარებას. სამწუხაროდ, თქვენ ეს არ გესმით! ვეცადე, რბილი ვყოფილიყავი ჩემს შეფასებებში”, – აცხადებს ოქრიაშვილი.

ამავე თემაზე

კონკურენციის სააგენტო იკვლევს, აქვს თუ არა ადგილი “კარტელურ გარიგებას” 4 აფთიაქს შორის

მასალების გადაბეჭდვის წესი