სამების საკათედრო ტაძარში შინაგან საქმეთა სამინისტროს სასაზღვრო პოლიციის ვერტმფრენის ჩამოვარდნის შედეგად გუდაურთან დაღუპული მფრინავების, მაშველებისა და ექიმების სამოქალაქო პანაშვიდი გაიმართა.
პარასკევს, 29 ივლისს, გუდაურში პარაპლანით ფრენის დროს, 2 პირი კლდოვან ფერდობზე ჩამოვარდა. სამაშველო ოპერაციაში ჩაერთო სასაზღვრო პოლიციის კუთვნილი ვერტმფრენი, რომელმაც ღონისძიების მიმდინარეობისას მართვა დაკარგა, ჩამოვარდა და აფეთქდა.
ბორტზე იმყოფებოდა ეკიპაჟის 4 წევრი, 2 მაშველი და 2 ექიმი, ჯამში, რვა ადამიანი. ვიდეოებში ჩანს, როგორ ეხება ვერტმფრენი უკანა პროპელერით კლდეს, პროპელერი სძვრება, ტრიალს იწყებს და ხევში ვარდება, რის შემდეგაც ფეთქდება. მომხდარის შედეგად ბორტზე მყოფი 8-ვე ადამიანი დაიღუპა.
მათ შორის იყვნენ მაშველები კახა ტორჩინავა და გიორგი მარგიანი, მფრინავები ზაზა ლორია, ანდრო ქუჯოშვილი, ლევან ჩოხელი და დიმიტრ ქააძე და ექიმები ქეთი გულაღაშვილი და გიორგი ვენეციკი.
საქართველოს პრეზიდენტმა სალომე ზურაბიშვილმა რვავე მათგანი „სამოქალაქო თავდადებისათვის“ სიკვდილის შემდეგ დააჯილდოვა.
სამოქალაქო პანაშვიდის შემდეგ დაღუპულებს საგვარეულო სასაფლაოზე გადაასვენებენ, სადაც სამხედრო პატივით დაკრძალავენ.
