ნეტგაზეთი | “განაწყენებული ვართ” – სპირიდონი ბენეფიციარზე, რომელიც საცხოვრებელში აღარ შეუშვეს “განაწყენებული ვართ” – სპირიდონი ბენეფიციარზე, რომელიც საცხოვრებელში აღარ შეუშვეს – Netgazeti
RU | GE  

“განაწყენებული ვართ” – სპირიდონი ბენეფიციარზე, რომელიც საცხოვრებელში აღარ შეუშვეს

მთავარეპისკოპოსი სპირიდონი აცხადებს, რომ განაწყენებულია იმ ბენეფიციარზე, რომელიც აცხადებს, რომ საპატრიარქოს უნივერსიტეტის ტერიტორიის დატოვება მოსთხოვეს. მანამდე ლუკა ხაჩიძემ ნინოწმინდაში ცხოვრების შესახებ პოლიციას ჩვენება მისცა.

ლუკა ხაჩიძის ამ განცხადებას მიტროპოლიტი სპირიდონი მამა-შვილი ფალავანდიშვილების ორგანიზაციის  „ბავშვთა უფლებების დაცვის საზოგადოება“ ფეისბუკ გვერდზე გამოქვეყნებულ ვიდეოში ეხმაურება.

„მოგეხსენებათ, საჯარო სივრცეში, მასობრივი მედიის საშუალებით გავრცელდა ინფორმაცია, რომ თითქოს პირველკურსელი გამოაგდეს უნივერსიტეტიდან, რაც არ შეესაბამება სინამდვილეს. ეს ახალგაზრდა არის ლუკა ხაჩიძე, რომელიც პანსიონატში მაშინ მიიღეს, როდესაც რამდენიმე დღის იყო და დედაეკლესიამ ის გაზარდა, თავს ევლებოდა, არ აკლდა არაფერი, არც ჩაცმა, არც დახურვა და არც კვება. უზრუნველყოფილი იყო ყველაფრით, სკოლა დაამთავრებინა დედაეკლესიამ და შემდეგ უნივერსიტეტში მოაწყო.

ისევ საპატრიარქოს უნივერსიტეტში, წმ. ტბელ აბუსერიძის სახელობის უნივერსიტეტში ხიჭაურში. პირველ კურსზე სწავლობდა. ჩვენ გაოცებული ვართ, რამ აიძულა და შეუცვალა ასე გონება, რომ ასე მოიქცა. თურმე ურეკავდა ლომჯარიას, სახალხო დამცველს, არასამთავრობო ორგანიზაციებს და მათთან ჰქონდა მოლაპარაკებები. გაოცებული ვართ და ძალიან შეწუხებული. რამ შეუცვალა გონება?“, – აცხადებს მღვდელმთავარი.

ამის შემდეგ ხაჩიძის „ცნობიერების შეცვლაში“ არასამთავრობო ორგანიზაციებსა და სახალხო დამცველის აპარატს ადანაშაულებს.

ნინოწმინდის ბავშვთა პანსიონის ყოფილი ბენეფიციარი აცხადებს, რომ პანსიონში ცხოვრებასთან დაკავშირებით პოლიციისთვის ჩვენების მიცემის შემდეგ, საპატრიარქოს უნივერსიტეტის ტერიტორიის დატოვება მოსთხოვეს.

“მე გამომიცხადეს, რომ ლუკა, შენ ბარგს აიღებ, ჩაალაგებ, დღეს ღამეს სხვაგან გაათევ და ხვალ წადი”, — აცხადებს პანსიონის ყოფილი აღსაზრდელი.

როგორც ის აღნიშნავს, აღმზრდელები ბავშვებს ხის ჯოხსაც ურტყამდნენ.

“უშუალოდ შემსწრე ვიყავი, როგორ არტყმევინა კარადაზე თავი ბავშვს. შემდეგ ეს მიიჩქმალა, რადგან არც ზედამხედველს გაუგია მაშინ”, — განაცხადა მან.

დღეს, 9 ივნისს, სახალხო დამცველმა, ნინო ლომჯარიამ განაცხადა, რომ ჩვენების მიცემის გამო ნინოწმინდის ყოფილ აღსაზრდელს, რომელიც ამჟამად საპატრიარქოს დაქვემდებარების ქვეშ არსებულ უნივერსიტეტში ირიცხება და ამავე უნივერსიტეტის საერთო საცხოვრებელში ცხოვრობს, დაწესებულების ტერიტორიაზე აღარ უშვებენ.


გაეროს ბავშვთა უფლებათა კომიტეტმა საქართველოს ხელისუფლება 7 მაისს დაავალდებულა, უზრუნველეყო მართლმადიდებელი ეკლესიის დაქვემდებარებაში მყოფი ნინოწმინდის ბავშვთა პანსიონის მონიტორინგი იმის გასარკვევად, თუ რა მდგომარეობაში არიან იქ ბავშვები.

ეკლესია ომბუდსმენს არ აძლევს უფლებას, პანსიონატში შევიდეს. ამასთანავე, 2 ივნისს სახალხო დამცველმა გამოთხოვილ ინფორმაციაზე დაყრდნობით განაცხადა, რომ 2016-2021 წლებში პანსიონში სისხლის სამართლის 4 გამოძიება მიმდინარეობს, მათ შორის ერთი – გაუპატიურების მუხლით, დანარჩენი კი ძალადობის.

არსებული ინფორმაციით, პანსიონში 150-მდე ბავშვი ცხოვრობს. სახელმწიფო ზრუნვის სააგენტოს თქმით, ეს რიცხვი სოცმუშაკის შესვლამდე (დაახლოებით, აპრილამდე) 53-ს უტოლდებოდა, შემდეგ კი ნელ-ნელა უწყებამ ბავშვების გამოყვანა დაიწყო. ეს პროცესი დღემდე გრძელდება.

პარალელურად, როგორც ჯანდაცვის სამინისტროში აცხადებენ, დაიწყო კონსულტაციები სამინისტროს, UNICEF-ს, ორგანიზაცია Worldvision-სა და საპატრიარქოს შორის, გამოსავლის მოსაძებნად. ვრცელდება ცნობები, რომ არსებობს შეთავაზება პანსიონის საოჯახო ტიპის სახლად გადაქცევის შესახებაც.

სახალხო დამცველის 2015 და 2018 წლის ანგარიშში ნათქვამია, რომ პანსიონში სხვა პრობლემებთან ერთად, გამოიკვეთა – „მკაცრი აღზრდის სტილი და სოციალიზაციის ნაკლებობა“. პანსიონში წარსულში მკაცრი პედაგოგების არსებობას ადასტურებს ერთ-ერთი დეკანოზიც.

ბავშვთა უფლებების დამცველი ორგანიზაციამ, „პარტნიორობა ადამიანის უფლებებისთვის“ (PHR) 5 ივნისს თქვა, რომ თბილისის საქალაქო სასამართლომ ნინოწმინდის ბავშვთა პანსიონიდან ბავშვების დაუყოვნებლივ გაყვანის გადაწყვეტილება მიიღო.

ორგანიზაციამ 4 ივნისს მიმართა სასამართლოს შუამდგომლობით და მოითხოვა, უზრუნველყოფის ღონისძიების სახით ნინოწმინდის ბავშვთა პანსიონიდან ყველა ბავშვი დაუყოვნებლივ გამოყვანილიყო. მოსამართლემ შუამდგომლობა ნაწილობრივ დააკმაყოფილა, რაც გულისხმობს თავშესაფრიდან მხოლოდ შშმ ბავშვების გაყვანას. თუმცა სახელმწიფო უწყებებმა თავშესაფრიდან სხვა ბავშვების გაყვანაც დაიწყეს. მათი ნაწილი ოჯახებში დააბრუნეს, ნაწილი — მცირე ზომის საოჯახო დაწესებულებებში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან