საქართველოში მცხოვრები ინდოელი სტუდენტები ექიმ ვაჟა გაფრინდაშვილის მხარდასაჭერად პარლამენტის შენობასთან შეიკრიბნენ.

სტუდენტებმა სოლიდარობის მიზნით თეთრი ხალათები ჩაიცვეს და გაფრინდაშვილის გათავისუფლების მოთხოვნით რუსთაველის გამზირზე პლაკატები მიიტანეს. მათ საერთაშორისო ორგანიზაციებს დახმარებისკენ მოუწოდეს:

“ჩვენი მიზანია ხმა გავაგონოთ მათ, ვისაც აქვს საშუალება ვაჟა გაფრინდაშვილის გასათავისუფლებლად რაიმე მოიმოქმედოს”, – ამბობს აქციის ორგანიზატორი დარისპან პრაშერი – “ჩვენს გვერდით დგანან სტუდენტები, რომლებიც მომავალში გახდებიან ექიმები და შესაძლოა ისინიც მსგავს სიტუაციაში აღმოჩნდენ”.

პრაშერის განმარტებით, მათ ინდოეთში უკვე გაავრცელეს ინფორმაცია ცხინვალის დე-ფაქტო რეჟიმის მხრიდან ქართველი ექიმის დაკავების შესახებ.

ცხინვალის დე ფაქტო სასამართლომ 9 ნოემბერს დაკავებულ ქართველ ექიმს, ვაჟა გაფრინდაშვილს, ორთვიანი პატიმრობა შეუფარდა. სასამართლო 15 ნოემბერს გაიმართა. გაფრინდაშვილს ადგილზე სახაზინო ადვოკატიც დაუნიშნეს.

“გაფრინდაშვილის მიმართ რუსეთის ფედერაციის სისხლის სამართლის კოდექსის 322-ე მუხლით [საზღვრის უკანონო კვეთა] დაიწყო გამოძიება. დადგენილია, რომ საქართველოს მოქალაქემ განზრახ გადაკვეთა რესპუბლიკის სახელმწიფო საზღვარი”, – ნათქვამია სამხრეთ ოსეთის დე ფაქტო უშიშროების კომიტეტის განცხადებაში.

19 ნოემბერს ცხინვალის КГБ-მ [უშიშროების სამსახური] გაავრცელა განცხადება, სადაც ნათქვამია, რომ დაკავებული ქართველი ექიმი ვაჟა გაფრინდაშვილი 2008 წლის აგვისტოს მოვლენებში მონაწილეობდა სამხედრო ექიმისა და საქართველოს შეიარაღებული ძალების სამხედრო-სამედიცინო სამსახურის კაპიტნის რანგში. აღნიშნულ ინფორმაციას სიცრუეს უწოდებს ქართული მხარე, მათ შორის გაფრინდაშვილის ოჯახი და მისი კოლეგები.

რუსი სამხედროების მიერ 9 ნოემბერს დაკავებული ქართველი ექიმი საქართველოს ორთოპედ-ტრავმატოლოგთა საზოგადოების პრეზიდენტია.