„ფორმულას“ მაუწყებლობის უფლება მიენიჭა

კომუნიკაციების ეროვნული კომისიის ინფორმაციით, „ფორმულას“ მაუწყებლობის უფლება მიენიჭა. მათივე ცნობით, ტელეკომპანია  მაუწყებლობას საქართველოს მთელ ტერიტორიაზე პირველი ოქტომბრიდან შეძლებს. თუმცა ჯერ არ არის გადაწყვეტილი ზუსტი დრო, ახალი არხი როდის გავა ეთერში.

“კომპანიას მაუწყებლობის  ავტორიზაციისთვის კანონით განსაზღვრული მთელი რიგი სავალდებულო ინფორმაცია სრულად არ ჰქონდა წარმოდგენილი, შესაბამისად, კომუნიკაციების კომისიამ „ფორმულას“ განაცხადში დაფიქსირებული ხარვეზების გამოსწორება მოსთხოვა. დოკუმენტაციის კანონთან შესაბამისობაში მოყვანის შემდეგ, კომისიამ კომპანიას მაუწყებელობის ავტორიზაცია მიანიჭა”, – აცხადებენ მარეგულირებელში.

“ფორმულა კრეატივის” გუნდმა 2019 წლის 19 ივლისს დააარსა შპს “ფორმულა”. ახალი ტელეკომპანიის სახელი სწორედ ეს იქნება და ის მაუწყებლობას ოქტომბრიდან გეგმავს.

ტელეკომპანიის გენერალური დირექტორი ზუკა გუმბარიძე ნეტგაზეთთან განმარტავს, რომ არხი საერთო მაუწყებლობას გეგმავს, რაც გულისხმობს იმას, რომ ის დაფარავს როგორც სოციალურ და პოლიტიკურ, ასევე, გასართობ თემატიკასაც.

ტელევიზიის შექმნის შესახებ ინფორმაციის გავრცელებიდან მალევე ცნობილი გახდა, რომ კომპანია ახალ ტელევიზიას თავდაცვის ყოფილ მინისტრთან, დავით კეზერაშვილთან თანამშრომლობით აფუძნებს.

“ფორმულა კრეატივი” ტელეგადაცემებს მანამდე “რუსთავი 2”-სთვის ამზადებდა. მათ შორისაა სერიალი “ჩემი ცოლის დაქალები”. აღიშნული კომპანია ასევე არის ინტერნეტგამოცემა On.ge-ს მეწილე. “ფორმულა კრეატივი” მართავს ტელეარხ “მესამესაც”, თუმცა ამ არხის ქონება და სიხშირე “რუსთავი 2-ის” საკუთრებაა.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.