“აღნიშნული პროექტის პლენარულ სხდომაზე განხილვის შესაძლებლობა ყველა საპარლამენტო პოლიტიკურ ძალას მისცემდა შესაძლებლობას, საჯაროდ დაეფიქსირებინათ საკუთარი პოზიცია შემოთავაზებულ ცვლილებებთან დაკავშირებით. ამასთან, მსჯელობისა და გადაწყვეტილების მიღების პროცესი და არგუმენტები იქნებოდა გამჭვირვალე და ხელმისაწვდომი საზოგადოებისათვის. კანონპროექტის სესიაზე განხილვა დამატებით შესაძლებლობას ქმნიდა საჭირო ხმების შეგროვების, ხოლო საკითხის საერთოდ მოხსნამ დღის წესრიგიდან პრაქტიკულად ნულამდე დაიყვანა სისტემის შეცვლის შესაძლებლობა. ”

6 ივნისს გამართული პარლამენტის ბიუროს სხდომის შემდეგ “რესპუბლიკური პარტიის”  ფრაქციის თავმჯდომარემ, დავით ბერძენიშვილმა განაცხადა, რომ 8 ივნისს ჩანიშნულ პარლამენტის პლენარულ სხდომაზე ე.წ. გერმანულ საარჩევნო მოდელს არ განიხილავენ. ამის მიზეზად დეპუტატმა მხარდამჭერ პარტიებს შიგნით კონსულტაციების გამართვის საჭიროება დაასახელა:

“ოთხშაბათის დღის წესრიგში კანონპროექტი იმ მოტივით არ შევიტანეთ, რომ შიდაპარტიული კონსულტაციების ჩატარების საშუალება ყველას ჰქონდეს. ამის შემდეგ გავიტანთ კანონპროექტს პლენარულ სხდომაზე. ამა თუ იმ პარტიაში ვიღაცები, ეტყობა, ხელს უშლიან იმ დეპუტატებს, ვისაც კანონპროექტის მხარდაჭერა საჯაროდ აქვთ დეკლარირებული. ჩვენ გვინდა კანონპროექტი კანონად ვაქციოთ და ყველას ვუწყობთ ხელს ამაში.”

მისივე თქმით,”ნაციონალურ მოძრაობას” შიდაპარტიული პრობლემები ოდესიდან ექმნება:

“ეროვნული ფორუმი, თავისუფალი დემოკრატები, გირჩი, რესპუბლიკელები მხარს უჭერენ კანონპროექტს, ასევე, არასამთავროები და არასაპარლამენტო ძალები. ჩვენ ევროპულ არჩევანს ვთავაზობთ და ვნახოთ, ნაციონალური მოძრაობა ქვეყნის გარედან შექმნილ შიდაპარტიულ პრობლემებს მოერევა, დაძლევს, თუ აღმოჩნდება ოდესის გუბერნატორის მძევალი.”

“რესპუბლიკური პარტიის” მიერ ინიცირირებულია ე.წ. გერმანული მოდელი, რომლის მიხედვით, შერეული საარჩევნო სისტემის პირობებში სპეციალური ფორმულით გამოითვლება იმ პარტიის საპარლამენტო მანდატების რაოდენობა, რომელიც გადალახავს 5%-იან ბარიერს.