“დღეს ქვეყანაში მოხდა სამი მნიშვნელოვანი ამბავი: პირველი მნიშვნელოვანი ამბავი არის ის, რომ საზოგადოებამ გაიგო, რომ ჩვენს პოლიტიკურ ორგანიზაციას ქვია “ახალი პოლიტიკური ცენტრი – გირჩი”. მეორე მნიშვნელოვანი ამბავი ის გახლავთ, რომ ქვეყანას ესტუმრა აზერბაიჯანის პრეზიდენტი ბატონი ილჰამ ალიევი. ხოლო მესამე ამბავი მნიშვნელოვანი არის იმიტომ, რომ ძალიან სასაცილოა. ესე იგი, როგორც კი გაიგო საზოგადოებამ, რომ ჩვენ დავირქვით “გირჩი”, ნაციონალური მოძრაობის” წარმომადგენლები, მთავარი ოპოზიციური ძალის წარმომადგენლები გაიქცნენ “კავკასუს ონლაინში” და დომეინი girchi.ge დაირეგისტრირეს თავის თავზე, რომ ჩვენ არ ავიღოთ. აი, რა გინდათ? რამ გაგამწარათ? არც “ერთიანი” დავირქვით, არც “ნაციონალური” არც “მოძრაობა”. დავირქვით “გირჩი”. რაში გჭირდებათ ეს girchi.ge? რა გირჩის უნახავებივით იქცევით? რა გჭირთ, გამაგებინეთ,” – აცხადებს გოგა ხაჩიძე.

“კავკასუს ონლაინში” ნეტგაზეთს უთხრეს, რომ დომეინები girchi.ge და gircha.ge დღეს ნაციონალური მოძრაობის პრესამსახურის თანამშრომელმა გიორგი ქართველიშვილმა დაარეგისტრირა.

ქართველიშვილი გოგა ხაჩიძეს ფეისბუკზე პასუხობს და აცხადებს, რომ დომეინს ნებისმიერს მიჰყიდის, ვინც 15 ათას ლარს გადაუხდის. მისი თქმით, ეს ლეგალური ბიზნესია და ნაციონალურ მოძრაობას ამ ფაქტთან კავშირი არ აქვს.

გოგა ხაჩიძე აცხადებს, რომ გიორგი ქართველიშვილი ნაციონალური მოძრაობის პრესამსახურში მუშაობს და დომეინის შეძენაც სწორედ ამიტომ შედის ამ პარტიის ინტერესებში.

ხაჩიძის საპასუხოდ გიორგი ქართველიშვილმა კიდევ ერთი პოსტი გამოაქვეყნა, სადაც წერს, რომ 15 ათას ლარად დომეინის გაყიდვა ხუმრობა იყო. როგორც ნაციონალური მოძრაობის პრესამსახურის თანამშრომელი მორიგ პოსტში წერს, დომეინის შეძენით მან გოგა ხაჩიძეს მიანიშნა, რომ მოუმზადებლები იყვნენ.

“ახალი პოლიტიკური ცენტრის – გირჩის” ოფისის გახსნის შესახებ ინფორმაცია გუშინ გავრცელდა. ეს პოლიტიკური ორგანიზაცია ერთიანი ნაციონალური მოძრაობიდან 2015 წლის მაისში წასულმა დეპუტატებმა – ზურაბ ჯაფარიძემ, პავლე კუბლაშვილმა, გოგა ხაჩიძემ და გიორგი მელაძემ შექმნეს.