რუსულმა არხმა ცრუ ინფორმაცია გაავრცელა PACE-ში უკრაინელი დეპუტატების მიერ ჰიმნის შესრულებაზე

რადიო თავისუფლების რუსულენოვანი პროექტის, Настоящее Время-ს ცნობით, რუსული ტელეკომპანია Россия 1-მა ცრუ ინფორმაცია გაავრცელა, თითქოს ევროკავშირის საპარლამენტო ასამბლეაზე უკრანელი დეპუტატები Россия 1-ის წამყვანს ეუბნებოდნენ: “სიკვდილი რუსეთს, სიკვდილი შენ”.

სინამდვილეში დეპუტატებმა ტელეკომპანიას კომენტარებზე უარი უთხრეს, უკრაინის ჰიმნი შეასრულეს და შემდეგ ნაციონალისტური სლოგანები შემოსძახეს, თუმცა ჟურნალისტს არ დამუქრებიან.

ვიდეოში ჩანს, რომ მას შემდეგ, რაც ჰიმნს ასრულებენ, დეპუტატები ნაციონალისტურ ფრაზებს ამბობენ ხმამაღლა: “დიდება უკრაინას! დიდება გმირებს! დიდება ერს! სიკვდილი მტერს! უკრაინა უპირველეს ყოვლისა! სირცხვილი რუსეთის ფედერაციას! სირცხვილი! სირცხვილი პროპაგანდისტებს”.

მათ არ უთქვამთ ის ფრაზები, რასაც ჟურნალისტი არაზუსტად აწვდის მაყურებელს: “სიკვდილი მტერს, სიკვდილი რუსეთს, სიკვდილი შენ, ეს უკრაინული ძალაა”.

გუშინ ეს შემთხვევა — თუ როგორ მღერიან უკრაინელი დეპუტატები PACE-ში რუსეთის სასარგებლო რეზოლუციის ჩაგდების შემდეგ ტელეკომპანია “რასიას” ჩართვისას უკრაინის ჰიმნს — “იმედის” ჟურნალისტმა ნატა მახვილაძემაც გადაიღო. ნახეთ მისი ვიდეო “ნეტგაზეთზე“:

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.