გიორგი კვირიკაშვილი ©  EPA/YANNIS KOLESIDIS

პრემიერმა ორი გუბერნატორის შეცვლის საკითხი “ახალი გამოწვევებით” ახსნა

გიროგი კვირიკაშვილი გურიისა და რაჭა–ლეჩხუმ–ქვემო სვანეთის გუბერნატორების შეცვლის საკითხს “ახალი გამოწვევებით” ხსნის. პრემიერი იმედოვნებს, რომ გია სალუქვაძე და პაპუნა მარგველიძე მმართველი გუნდის სხვა პოზიციებზე განაგრძობენ მუშაობას, ხოლო ახალი გუბერნატორების წარდგნას რამდენიმე დღეში აანონსებს.

“ჩვენ შევდივართ ფაზაში, როდესაც არის ახალი გამოწვევები, გვაქვს სივრცითი განვითარების ძალიან ამბიციური გეგმა და ასეთი ცვლილებები ძალიან ბუნებრივია. მინდა, დიდი მადლობა გადავუხადო გურიისა და რაჭა-ლეჩხუმ-ქვემო სვანეთის სახელმწიფო რწმუნებულ-გუბერნატორებს გია სალუქვაძესა და პაპუნა მარგველიძეს ძალიან კარგი მუშაობისთვის. ისინი არიან ძალიან კარგი ადამიანები, ჩვენი გუნდის წევრები და დარწმუნებული ვარ, განაგრძობენ ჩვენს გუნდში უკვე სხვა პოზიციებზე მუშაობას. რამდენიმე დღეში წარმოგიდგენთ ახალ რწმუნებულ-გუბერნატორებს ამ ორ რეგიონში,” – აცხადებს კვირიკაშვილი.

საქართველოს პრემიერ–მინისტრის განცხადებით, კაპიტალური დანახარჯები ბიუჯეტში წელს 30%-ზე მეტით გაზრდილია. მისი თქმით, მომავალი წლიდან მთავრობა გაცილებით უფრო დიდ მასშტაბს გეგმავს.

“ძალიან ბევრი პროექტი, რომელიც 2018 წელს დაიწყება, დღეს უკვე მომზადების ეტაპზეა. 2018 წლის მეორე კვარტლიდან სავარაუდოდ ჩვენ გვექნება მასშტაბი, რომელიც ჩვენს ქვეყანაში დღემდე არ ყოფილა. ეს არ არის პოლიტიკური განაცხადი, ეს არის ნამდვილად რეალობა, რომელსაც ვგეგმავთ. ვფიქრობ, ამ სამუშაოების შედეგად, ჩვენი ქვეყნის ინფრასტრუქტურა თვისობრივად შეიცვლება და ამ გამოწვევებში განსაკუთრებული მუშაობა მართებს მთავრობის ყველა სტრუქტურას. ეს არ არის ერთი სამინისტროს საკითხი, აქ აუცილებელია მთელი გუნდის ძალიან კოორდინირებული მუშაობა და ვფიქრობ, ჩვენი გუნდი ამისთვის აბსოლუტურად მზად არის,” – ამბობს გიორგი კვირიკაშვილი.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ საკითხებს და სხვა მიმდინარე მოვლენებს.