საქართველოს ნაკრებზე დადებული ფსონით იღბლიანმა მოთამაშემ SkyBet-ს £5000 მოუგო

მადრიდში ესპანეთი – საქართველოს მატჩის დაწყებამდე ბუკმეკერებისა და ფეხბურთის მოყვარულების აბსოლუტური უმრავლესობა ფავორიტად მასპინძელ ესპანეთს მიიჩნევდა. მით უმეტეს, იმ ფონზე, რომ მატჩამდე ცოტა ხნით ადრე საქართველომ ჯერ სლოვაკეთთან წააგო 1-3, ხოლო შემდეგ -რუმინეთთან 1-5. თუმცა ფავორიტთან დაკავშირებით სხვანაირად ფიქრობდა ფსონების ერთი მოყვარული, რომელმაც ბრიტანულ ბუკმეკერულ კანტორა SkyBet-ში 100 ფუნტი საქართველოზე დადო.

ამ ინფორმაციას თვითონ SkyBet აქვეყნებს ტვიტერზე და იღბლიან მოთამაშეს საჯაროდ ულოცავს. როგორც ირკვევა, მოთამაშემ საქართველოზე ფსონი იმ დროს გააკეთა, როდესაც მისი გამარჯვების კოეფიციენტი 50/1-თან იყო, რაც იმას ნიშნავს, რომ ფსონის დამდებმა საქართველოს გამარჯვებით 5000 ფუნტი მოიგო.

საქართველოს ნაკრებმა მადრიდში გამართულ ამხანაგურ დაპირისპირებაში ესპანეთი 0-1 დაამარცხა და თავის ისტორიაში ალბათ ყველაზე სენსაციური გამარჯვება მოიპოვა. ერთადერთი გოლი პირველ ტაიმში თორნიკე ოქრიაშვილმა გაიტანა ჯაბა ჯიღაურის პასით.

ნეტგაზეთის მასალების სხვა გამოცემებში გადაბეჭდვის წესი


ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com