40 ახალი ფოტო, რომელიც Google-ის რუკების ბაზას დაემატა, კუკის კუნძულების მახლობლად და ბალის სანაპიროსთანაა გადაღებული. ფოტოებზე ასახულია მარჯნის დიდი რიფი, კუზიანი ვეშაპები და წყალქვეშა ეკოსისტემა.
პროექტი Google Earth Outreach-ის ფარგლებში დაიგეგმა, რომელიც 2012 წლიდან მიმდინარეობს. Google-ის ოფიციალურ ბლოგზე წერია, რომ პროექტის მთავარი მიზანი საზოგადოებისათვის ოკეანის უკეთ გაცნობაა.
“ოკეანის რუკების შექმნა მისი გადარჩენის საშუალებაა. მარჯნის რიფის ნახვა და იმ საფრთხეების გააზრება, რის წინაშეც ის დგას, ეკოსისტემის რღვევის პრობლემის საზოგადოებამდე მიტანას შეუწყობს ხელს,”- ნათქვამია Google-ის განცხადებაში.
პირველად მსოფლიო ოკეანის დღის კონცეფცია 1992 წელს კანადის მთავრობამ წარადგინა რიო დეჟანეიროს “დედამიწის ყოველწლიურ სამიტზე”. 2008 წლიდან კი გაერთიანებული ერების ორგანიზაციის ინიციატივით ოკეანის დღე ყოველ 8 ივნისს აღნიშნება. ამ დღის მიზანი საზოგადოების ცნობიერების ამაღლებაა. მსოფლიოს სხვადასხვა წერტილში ეწყობა გამოფენები, დისკუსები და შემეცნებითი ტურები ოკეანის და მისი ეკოსისტების პრობლემების გასაცნობად.
