ტექნოლოგიები

“კავკასუს ონლაინის” საოპერაციო აქტივებს მაგთიკომი ყიდულობს

29 მარტი, 2016 • 2550
“კავკასუს ონლაინის” საოპერაციო აქტივებს მაგთიკომი ყიდულობს

შპს „მაგთიკომი“ და შპს „კავკასუს ონლაინი” ერთობლივ განცხადებას ავრცელბენ, რომლის მიხედვითაც მხარეებმა კავკასუსის საოპერაციო აქტივების მაგთიკომისთვის მიყიდვისათვის დაწყებული მოლაპარაკებები განაახლეს. როგორც ერთობლივ განცხადებაშია ნათქვამი, მხარეებს შორის უკვე მოეწერა ხელი ურთიერთგაგების მემორანდუმს.

 

მოხარულები ვართ, გაცნობოთ, რომ შეწყვეტილი მოლაპარაკება შპს „მაგთიკომსა“ და შპს „კავკასუს ონლაინს“ შორის მიმდინარე წლის მარტის თვეში კვლავ განახლდა და საბოლოოდ შევთანხმდით ურთიერთგაგების მემორანდუმზე, რომელიც საფუძვლად დაედება საოპერაციო აქტივების (კორპორაციული და საცალო მომსახურებისთვის საჭირო) ყიდვა-გაყიდვის ხელშეკრულებას.
დღეს შპს „მაგთიკომსა“ და შპს „კავკასუს ონლაინს“ შორის ხელი მოეწერა ურთიერთგაგების მემორანდუმს. მემორანდუმი მოიცავს შპს „მაგთიკომის“ მიერ შპს „კავკასუს ონლაინის“ საოპერაციო აქტივების (კორპორაციული და საცალო მომსახურებისთვის საჭირო) შეძენაზე ურთიერთშეთანხმების პირობებს. მემორანდუმით შპს „კავკასუს ონლაინთან“ მიღწეულია ექსკლუზიური შეთანხმება, რაც გულისხმობს შპს „კავკასუს ონლაინის“ მხრიდან ნებისმიერ სხვა მესამე მხარესთან მოლაპარაკების შეწყვეტას.

მოგეხსენებათ, რომ 2015 წლის 11 აგვისტოს შპს „მაგთიკომმა“ და შპს „კავკასუს ონლაინმა“ ერთობლივად მიმართეს საქართველოს კომუნიკაციების ეროვნულ კომისიას მაგთიკომის მხრიდან კავკასუს ონლაინის აქტივების ნასყიდობის დასაშვებობის თაობაზე. კომისიისაგან შესაბამისი წინასწარი თანხმობა მიღებულია 2015 წლის 19 ნოემბერს.

ყიდვა-გაყიდვის ხელშეკრულების გაფორმება მოხდება 2016 წლის 30 მაისამდე. აქტივების გადმოცემის, ანუ ინტეგრაციის პროცესი გასტანს რამდენიმე თვეს. მომხმარებლებს წინასწარ ეცნობებათ თარიღი, რის შემდეგ საკაბელო ინტერნეტის, ინტერნეტტელევიზიის და ფიქსირებულ ტელეფონიის მომსახურებას გაუწევს შპს „მაგთიკომი“, გადმორთვის პროცესი განხორციელდება უწყვეტ რეჟიმში”, – ნათქვამია განცხადებაში.

ამ განცხადებამდე, არსებული ინფორმაციით, კავკასუსი მოლაპარაკებებს მობიტელთან [ბილაინი] აწარმოებდა. კომპანიებს ერთობლივი განცხადებით უკვე მიმართული ჰქონდათ კომუნიკაციების ეროვნული კომისიისთვის, რომელიც საკითხს იხილავდა.

მასალების გადაბეჭდვის წესი