რის გამო გახდა თავდაცვის ყოფილი მინისტრი, „ფორმულას“ დამფუძნებელი დავით კეზერაშვილი წყალგამყოფი „ნაციონალური მოძრაობის“ ლიდერებს შორის? რა როლის აქვს მას ენმ-ის ფუნქციონირებაში? პარტიაში და მის გარშემო მიმდინარე მოვლენების ფონზე, „ნეტგაზეთი“ ესაუბრა „ნაციონალური მოძრაობის“ ერთ-ერთ ლიდერს, პოლიტსაბჭოს წევრს, პარლამენტარ ლევან ხაბეიშვილს.
ბატონო ლევან, „ნაციონალური მოძრაობის“ თავმჯდომარე ნიკა მელიამ „მოოლიგარქო ტიპი“ უწოდა დავით კეზერაშვილს. ამავე დროს გახმიანდა „ბრალდება“, რომ თქვენ [და თქვენს დაფუძნებულ „ანტიკორუფციულ მოძრაობას“] გაფინანსებთ დავით კეზერაშვილი. პირველ რიგში გკითხავთ, თუ შეგიძლიათ, ეს ინფორმაცია დაგვიდასტუროთ ან უარყოთ?
დავიწყოთ სიტყვა ოლიგარქის განმარტებით: კონკრეტული ადამიანი, რომელიც არაფორმალური გავლენებითა და თავისი ფინანსებით მართავს მთავრობას, ერევა სამთავრობო გადაწყვეტილებებში, არის ოლიგარქი.
ასეთი საქართველოში არის ბიძინა ივანიშვილი; ასევე, ვანო ჩხარტიშვილი, რომელიც ასევე ერევა სამთავრობო გადაწყვეტილებებში, რომლის პროტეჟეები არიან სხვადასხვა სამინისტროსა და საჯარო უწყებებში წარმოდგენილნი; იგივე უჩა მამაცაშვილი. [რედ: ჩხარტიშვილი და მამაცაშვილი უარყოფენ მსგავს ბრალდებებს და ამას ცილისწამებას უწოდებენ].
დავით კეზერაშვილი ოლიგარქი ვერ იქნება, რადგან ის ხელისუფლებას ვერ ახორციელებს საქართველოში. ის ხელისუფლებაზე ზეგავლენის მომხდენი ბუნებრივად ვერ იქნება, რადგან არის დამფუძნებელი ოპოზიციური, კრიტიკული მედიისა, რომელიც ასევე იდევნება პოლიტიკური ნიშნით.
თვითონ კეზერაშვილიც იდევნება პოლიტიკური ნიშნით, – თუმცა არცერთი საერთაშორისო სასამართლო საქართველოს ბრალდებას არ აღიარებს; აშშ-ის სახ.დეპ-ის ანგარიშში, ასევე ევროპარლამენტის რეზოლუციაში, მოხსენიებულია დავით კეზერაშვილისა და მისი დაფუძნებული ტელეარხის მიმართ პოლიტიკური დევნა. ასეთი ადამიანი, რომელიც ოპოზიციაში უდგას ხელისუფლებას და არის დევნილი, ვერ იქნება ოლიგარქი.
რაც შეეხება მეორე ნაწილს დაფინანსების შესახებ, რაც ყბადაღებული საკითხი გახდა: პირველ რიგში, „ანტიკორუფციულ მოძრაობას“ ოფისი აქვს ისნის რაიონში. საუბარია დაახლოებით 80 კვადრატულ მეტრ საოფისე ფართზე. „ნეტგაზეთის“ წარმომადგენლებს, რომლებსაც გაინტერესებთ ჩვენი ოფისი, შეგიძლიათ, ნებისმიერ დროს მობრძანდეთ და ნახოთ, მათ შორის, ჩვენი ოფისის მდებარეობაც, – მარტივად აღიქვამთ, რა შეიძლება ღირდეს ჩვენი ოფისის [ქირაობა], – და ასევე ნახავთ ჩვენს „ოლიგარქიულ ინტერიერს“, სადაც წარმოდგენილია მეორადი კომპიუტერები და ა.შ..
რაც შეეხება ოფისის ქირას, ტექნიკურ [საკითხებს]: დიახ, ჩვენ მივიღებთ ყველას დახმარებას, ვინც ოლიგარქებთან ბრძოლაში მოგვეხმარება. შესაბამისად, თუ გვეხმარება დავით კეზერაშვილი, არ მგონია, რომ საპრობლემო იყოს.
„დაფინანსება“, ცოტა არ იყოს, ხმამაღალი ნათქვამია. 1500 ლარად ოფისს რომ ვქირაობთ და ერთმანეთს ყველანი ვეხიდებით აქ, არ ვიცი, კიდევ თუ ვინმე მოგვეხმარება და კონკრეტული ადამიანები გაიგებენ, რომ ამ კეთილ საქმეში, რასაც ოლიგარქიის დამარცხება და ქვეყნის განვითარება ჰქვია, ვინმე დაგვეხმარება, ჩვენ აუცილებლად სიამოვნებით მათთან ვითანამშრომლებთ, ვინც ივანიშვილს, ჩხარტიშვილს და ამ კრიმინალებს დაუპირისპირდება.
ეს კითხვები „ნეტგაზეთის“ წარმომადგენლების უბრალო ინტერესი არ არის, საქმე ისაა, რომ თანაგუნდელებისგან და საჯარო პირებისგან ჟღერდება ეს კითხვები.
ცხადია, თქვენ რა კითხვას დამისვამთ, თქვენი საქმეა. მე გიპასუხებთ.
ამ დახმარების ოდენობაზეც თუ შეიძლება, რომ გკითხოთ, რადგან თქვენ რაც ახსენეთ, ოფისის ხარჯი, 1500 ლარიო, ამაზე 10-ჯერ უფრო დიდი თანხა იყო დასახელებული.
დასახელებული თანხები, მოგონილი, შეთითხნილი ბრალდებები, მათ შორის ჩვენი ფინანსები, – თუ რაიმე საბანკო გადარიცხვები არსებობს, – ეს არის საჯარო და ნებისმიერ ადამიანს შეუძლია ნახვა. მსგავსი არ არსებობს.
სად? საჯაროდ სად არის მისაწვდომი?
შეგიძლიათ გადაამოწმოთ, თუ იქნება ხელმისაწვდომი, rs.ge-ზე იტვირთება ჩვენი გადარიცხვები. ნებისმიერ გადარიცხვის ადვილად ნახვა შეგიძლიათ, რაც არის განხორციელებული.
არა, საჯაროდ ჩვენ ვერ ვნახავთ მაგას, ეგ ხომ [კონფიდენციალური ინფორმაციაა].
მაშინ შემიძლია გითხრათ, რომ არანაირი შემოწირულება, ოფიციალური სახით გადმორიცხვა არ არსებობს, არც ჩვენთან, „ანტიკორუფციულ მოძრაობაში“, და არც ჩემთან. მე პარლამენტის წევრი ვარ, დეკლარაციას ვავსებ და ჩემი ყველა საბანკო ანგარიში ხელმისაწვდომია ხელისუფლებისთვის. მეტიც, ისინი ვალდებულნი არიან, ეს აკონტროლონ და ნებისმიერი გადაცდომის შემთხვევაში, ცხადია, მე დამეკისრება სისხლის სამართლის პასუხისმგებლობა და ბუნებაში მსგავსი რამე ვერ მოხდება.
შემდეგი კითხვა ასეთია: ეს პროექტი „ანტიკორუფციული მოძრაობა“ ფუნქციონირებს, როგორც „ნაციონალური მოძრაობის“ პროექტი, თუ როგორც თქვენი და თქვენი თანამოაზრეების, ვინც ამ ჯგუფში არიან, მათი პროექტია? ანუ პარტიასთან, მაგალითად, პოლიტსაბჭოსთან შეთანხმებით თუ?..
არა. ცოტა შეურაცხმყოფელია რაიმე შეთანხმებაზე ლაპარაკი. აქ ზრდასრული, ჩამოყალიბებული ადამიანები არიან, არავის არაფერს არ უთანხმებენ, ეს არის დამოუკიდებელი არასამთავრობო ორგანიზაცია, თავისი გამგეობა ჰყავს, თავისი ხელმძღვანელი ჰყავს. მისი დაარსება იყო საჯარო, – მოწვეული იყო ყველა მედიის წარმომადგენელი, – და იქვე ვთქვით, რომ ყველა ადამიანი იქნება ჩვენი თანაგუნდელი, ვინც კორუფციასთან, რუს ოლიგარქთან იბრძოლებს და ამას არ ექნებოდა პარტიული ნიშანი. ნებისმიერ ადამიანს, ვინც გადაწყვეტს, რომ უნდა ებრძოლოს კორუფციას და ბიუჯეტის მფლანგველებს, ჩვენი კარი ღიაა.
ეს ადამიანები, ცხადია, დამოუკიდებლად მუშაობენ, თუმცა ჩვენ ვართ თანაგუნდელები და ამ შემთხვევაში ვმუშაობთ ერთად. ოღონდ აქ პარტიის გადაწყვეტილება არაფერ შუაში არ იქნება ტექნიკურადაც და იურიდიულადაც, რადგან ხელმომწერნი აბსოლუტურად სხვა ადამიანები არიან, პარტიისგან დამოუკიდებლები.
ამ საკითხთან დაკავშირებით ამ კუთხით კითხვის ნიშნები არ არსებულა იქამდე, სანამ პარტიის თავმჯდომარემ, – იმ პარტიისა, რომლის ერთ-ერთი ლიდერიც თქვენ ბრძანდებით, – საჯაროდ, საზოგადოებრივი მაუწყებლის ეთერში არ განაცხადა, რომ დავით კეზერაშვილთან ერთად თანამშრომლობის პერსპექტივას ვერ ხედავს და ფუნდამენტური საკითხებია, რაზეც ვერ თანხმდებიან…
ეს მისი პირადი პოზიციაა. ადამიანებს აქვთ პირადი პოზიციის უფლება. „ნაციონალურ მოძრაობაში“ ბევრი ლიდერია, არის განსხვავებული პოზიციები, ეს აბსოლუტურად ნორმალურია. მაგრამ მიზანი გვაქვს ერთი. რაღაცებზე შეიძლება ვერ შევთანხმდეთ.
მეორე: მე მგონია, რომ როდესაც 2022 წელია კალენდარზე და დავით კეზერაშვილი 10 წელია, საქართველოში არ ყოფილა და პოლიტიკური ნიშნით იდევნება. ამას საერთაშორისო რეზოლუციები ამბობს, თორემ მე მას არ ვიცნობდი და არანაირი კონტაქტი არ მქონდა მისი მთავრობაში ყოფნის დროს, წინა ხელისუფლების წევრი არც ვყოფილვარ, თუმცა ეს არ ნიშნავს, რომ პასუხისმგებლობას გავურბივარ, მე ეგეთი ადამიანი არ ვარ.
2022 წელს, მაშინ, როცა სახელმწიფო უსაფრთხოების სამსახურის უფროსი [ვახტანგ გომელაური] მისმა მოადგილემ [სოსო გოგაშვილმა] ამხილა FSB-ს აგენტებთან და ალექსანდრე ბორტნიკოვთან ურთიერთობაში [რედ: გომელაური ამას უარყოფს], როცა ბიძინა ივანიშვილი საყდრისის შემდეგ ბოლნისში აპირებს შვიდი სოფლის აფეთქებას, როცა ასიათასობით თანამოქალაქე გარბის ქვეყნიდან, ცოტა არ იყოს, უცნაურია, ვლაპარაკობდეთ დავით კეზერაშვილზე და დროს ვკარგავდეთ სისულელეში.
რომც დავეთანხმო ახლა ამ ყველაფერს და ვთქვა, რომ „დავით კეზერაშვილი არის ცუდი“, საიდან გადავაყენოთ დავით კეზერაშვილი? და თუ გადადგება, მერე რა ეშველება ჩვენს მოქალაქეს? ფასები დაიკლებს? ზეთი და წიწიბურა გაიაფდება? პურის ფასი დაიკლებს თუ საწვავის? სრული აბსურდია, ყველაფერი გადავიდა არანორმალურ [ფორმებში]. ვფიქრობ, ცოტა არ იყოს და, უსაქმურმა ადამიანებმა დაიწყეს ამაზე საუბარი. ოღონდ გუნდის შიგნითო, ახსენეთ, – ამ შემთხვევაში მელიას არ ვგულისხმობ, – სხვადასხვა ადამიანმა. მგონი, საქმე უნდა აკეთონ და დრო არ დახარჯონ, 10 წლის წინ რომ ხელისუფლებაში იყო, იმ ადამიანის კრიტიკით. ამდენი ემიგრანტი რომ გვყავს, ეს ვისი დამსახურებაა? ბიძინა ივანიშვილის. და ამ დროს ამდენი ხანი უნდა ვისაუბროთ დავით კეზერაშვილზე. უცნაურად მეჩვენება. თუმცა, ცხადია, თქვენს კითხვებს პასუხს გავცემ.
კიდევ ერთხელ, ეს კითხვები იმიტომ ჩნდება, რომ პარტიიდან დაიწყო…
არა. პარტიიდან მელიამ თქვა მხოლოდ ის, რომ ის კეზერაშვილთან არ ითანამშრომლებს და მეტი არაფერი. დანარჩენი. რასაც ლაპარაკობთ, დაიწყეს, ჩემი აზრით, ძალიან ბინძურმა ადამიანებმა, რომლებიც თავიანთ თავს „ჟურნალისტებს“ არქმევენ…
შეიძლება გკითხოთ, თუ დააკონკრეტებთ, ვის გულისხმობთ?
მე არ მსურს ამ ადამიანებზე საუბარი. საზოგადოებამ კარგად იცის. მათ შორის უახლოესი განცხადებები, რაც გაკეთდა. ჩემი აზრია, რომ მისამართი უნდა გაასწორონ. მე ოლიგარქიულ რეჟიმს ვებრძვი, ივანიშვილს, მამაცაშვილს, ჩხარტიშვილს ვებრძვი და შეგახსენებთ, მე, ლევან ხაბეიშვილს, მიჩივლა სუს-ის უფროსმა. უპრეცედენტო შემთხვევაა, როცა სუსი უჩივის პარლამენტარს. მაშინ, როცა ეს კაცი ვამხილე „ქოლ-ცენტრების“ სქემაში, უჩა მამაცაშვილმა უჩივლა „ანტიკორუფციულ მოძრაობას“ და 15 000 ლარით დაგვაჯარიმეს იმიტომ, რომ ვამხილეთ ეს კაცი, მათ შორის „ქოლ-ცენტრების“ სქემაში, ასევე, ელექტროენერგია რომ გაძვირდა და შუამავალი კომპანია რომ მისია.
ვანო ჩხარტიშვილის განცხადება შეგიძლიათ ნახოთ, როცა ის დასასანქცირებელთა სიაში შევიდა, თქვა, ლევან ხაბეიშვილმა იმუშავა ამ მიმართულებითო, რასაც ვადასტურებ. და ჩხარტიშვილი ამბობს, რომ მე ბრიტანეთში მიჩივლებს; ასევე, ირაკლი რუხაძე, „იმედის“ ხელმძღვანელი, რომელიც ამავე სიაში შეიყვანეს და ამ მიმართულებითაც ბევრი ვიმუშავეთ და მტკიცებულებებიც გადავეცით დასავლელ პარტნიორებს.
მე ვებრძვი ოლიგარქებს და 2022 წელს თუ ვინმემ გადაწყვიტა ჩემთან ბრძოლა, მისი საქმეა. ოღონდ, კიდევ ერთხელ ვამბობ, ვერსაიდან ვერც მე ვერ გადავდგები, ვერც საქართველოში არმყოფი კეზერაშვილი. რომც გადავწყვიტოთ გადადგომა, ქვეყნის პრობლემები ასე არ გვარდება. ამიტომ მე ვიბრძვი ოლიგარქიული რეჟიმის წინააღმდეგ სანამ ამ საქმეს ბოლომდე არ მივიყვან.
ბატონმა ნუგზარ წიკლაურმა გუშინ საღამოს „ტვ პირველზე“ ისაუბრა – ხაზი გაუსვა, რომ მისი აზრით ქვეყანაში ერთი ოლიგარქია ივანიშვილის სახით, დავით კეზერაშვილზე კი თქვა, რომ მისი ინფორმაციით, პარტიას მასთან „ფუნდამენტურ საკითხებზე“ აქვს შეუთანხმებლობა და იმედს იტოვებს, რომ მომავალში კვლავ იქნება თანამშრომლობა შესაძლებელი. თუმცა თქვა, რომ არ სურს ამ საკითხების დაკონკრეტება. თქვენ მაინც თუ შეგიძლიათ, რა საკითხებია ის, რაზეც ეს შეუთანხმებლობა არსებობს?
გულწრფელად გეტყვით, რომ მსგავს გაუგებრობებში არასოდეს არ ვერევი და არც მაინტერესებს. ჩემი მთავარი სამიზნეა ოლიგარქები. თუ გადაავლებთ თვალს ჩვენ აქტივობებს, – დღეს გვქონდა პარლამენტთან, სადაც რუსულ ნავთობზე ვსაუბრობდით, ჩვენები „ანტიკორუფციული მოძრაობიდან“ დღეს იყვნენ ბათუმში, საჯარო სკოლაში, სადაც მილიონები დაიხარჯა და დასრულებული არ არის პროექტი, ქუთაისში ჩვენს ორგანიზაციას ჰქონდა განცხადება, რომ ჭავჭავაძის რეაბილიტაცია რომ დასრულდა, იქიდან ფილებს ყიდიან. ჩვენ ვმუშაობთ, ვებრძვით ოლიგარქებს და გაუგებრობებში მონაწილეობას არ ვიღებთ.
რაც შეეხება კეზერაშვილის მონაწილეობას – 10 წელია ეს კაცი არ არის საქართველოში, არის დევნილი და ემუქრებიან დაპატიმრებით, არცერთი საერთაშორისო სასამართლო მის წინააღმდეგ ბრალდებებს არ აღიარებს და გადაადგილდება მსოფლიოში აბსოლუტურად თავისუფლად.
ასევე, კარგად უნდა გაიგოს საზოგადოებამ, რომ ოპოზიციას მილიარდერთან ბრძოლის დროს რესურსები სჭირდება, მათ შორის ტექნიკური საშუალება ჰქონდეს. ამიტომ გეუბნებით, ჩვენზე არანაირი გადმორიცხვა არ კეთდება და ეს მთავრობამ მარტივად შეიძლება გადაამოწმოს.
ტექნიკურ უზრუნველყოფას თუ ვინმე გაგვიკეთებს, რომ A წერტილიდან B წერტილში ჩავიდეთ, პირიქით, ძალიან კარგია და, ვფიქრობ, ქვეყნისთვის უმჯობესია, ბევრი თუ მოგვემსახურება ასე.
რა ტექნიკურ უზრუნველყოფაზეა საუბარი?
აი, მაგალითად, დღეს „ანტიკორუფციულ მოძრაობას“ გვჭირდებოდა მოლბერტები, რომ გვქონოდა პარლამენტთან, რომ ბანერები ზედ გაგვეკრა, ბანერების დაბეჭდვა გვჭირდებოდა… აი, ეს ტექნიკური დახმარება შეიძლება მოხდეს მისი მხრიდან.
გაგიკვირდებათ-და, ოპოზიციაში მყოფ ადამიანს სჭირდება რესურსები იმ პირობებში, როცა რუს ოლიგარქს ვებრძვით.
პირადად მე, ლევან ხაბეიშვილმა, პარლამენტის წევრმა, ავტომობილში დავამონტაჟე თხევადი გაზი, რათა კიდევ უფრო მეტი ვიარო, და თუ ვინმე ამაში გვეხმარება, დასაძრახი ფიზიკურად ვერ იქნება. შეიძლება დაძრახონ ადამიანი, ვინც ხელისუფლებასთან შევა გარიგებაში, მას აღარ ახსენებს და გაჩუმდება.
თქვენ წეღან ახსენეთ, რომ „ნაციონალური მოძრაობა“ არის დიდი პარტია და სხვადასხვა ადამიანი სხვადასხვანაირად შეიძლება ფიქრობდეს. თუმცა ამ შემთხვევაში გამოდის, რომ პარტიის თავმჯდომარე ამბობს, რომ ადამიანი, რომელიც თქვენ გეხმარებათ, არის „მოოლიგარქო ტიპი“…
არა, აქ ჯერ ხაზი გავუსვათ, რომ „მე მეხმარება“ არა, ეხმარება ოპოზიციურ ფლანგზე ბევრს. ოპოზიციურ ფლანგზე ძალიან ბევრს და არ არის ეს დასამალი, და მათ შორის, არის კრიტიკული მედიასაშუალების დამფუძნებელი…
კი ბატონო, ბევრ ოპოზიციურ აქტორს. ნებისმიერ შემთხვევაში, – ამ დროს „ნაცმოძრაობის“ თავმჯდომარე აცხადებს, რომ ამ ადამიანის ინტერესებში ეჭვი ეპარება და, კიდევ ერთხელ გავიმეორებ, „მოოლიგარქო ტიპს“ უწოდებს. იმ დროს, როდესაც პირადად წარმოადგენთ იმავე პარტიას, რომელსაც ნიკა მელია, რომელსაც ამ შემთხვევაში თავმჯდომარის პოზიცია უკავია, როგორ შეიძლება ამომრჩეველი დაელოდოს მოვლენების განვითარებას? უხერხულობას ხომ არ ქმნის [ეს ამბავი]?
მე და პარტიაში არავის აქვს მოსაზრება, რომ ჩვენ ყველას ნებისმიერ თემაზე ერთი პოზიცია შეიძლება გვქონდეს. ეს ასე არ ხდება.
„ფუნდამენტურ საკითხზე შეუთავსებლობაზე“ რახან ვსაუბრობთ…
რატომ არის ფუნდამენტური საკითხი კონკრეტულ ადამიანთან ურთიერთობა? მე არ ვსვამ ამ საკითხს ასე და თუ ვინმე დასვამს… ეს ასე არ დაუსვამს ვინმეს, რომ ფუნდამენტურად მნიშვნელოვანია და ასე რომ იყოს, მაშინ გუნდი იკრიბება და იღებს კონკრეტულ გადაწყვეტილებას. მე გუნდური მოთამაშე ვარ და გუნდური გადაწყვეტილების მომხრე, როგორც მელია. მან თავისი პირადი პოზიცია დააფიქსირა, ჩვენ, მისმა თანაგუნდელებმა, ჩვენი. მაგრამ ეს რომ იყოს წყალგამყოფი, ამაზე გუნდი იმსჯელებდა. მაგრამ კიდევ ერთხელ ვამბობ, არ შეიძლება ვიმსჯელოთ, რომ ეს არის ისეთი წყალგამყოფი, რომ „იქით ან აქეთ“.
ივანიშვილი, მისი გარემოცვა, გაჭირვება, სიდუხჭირე, ჩვენი ევროპული მომავალი, ესაა მთავარი საკითხები, რაზეც ვთანხმდებით, ვიდრე ტექნიკური მიმართულება, ვის შეიძლება ლოჯისტიკურად რამეში მოგვეხმაროს. და ვთქვათ, რომ ყველაფერს სჭირდება ლოჯისტიკა – აქციებს, ოპოზიციის მუშაობას…
ერთხელაც გეტყვით: თხევადი გაზი ჩავაყენე მანქანაში, რომ მეტი ვიარო. მეტ მოსახლეობას შევხვდე… მე, თქვენი წარმოდგენით, რასაც გარკვეული სუბიექტები ბოდავენ, 15 მანქანაც უნდა მყოლოდა. ასე თქვეს თავიდან. და მართლა სასაცილოა.
მე აქ უნდა დავაფიქსირო, რომ მსგავსი ინფორმაცია ჩვენგან არ გახმიანებულა…
50 000 ლარია ლამის და არ ვიცი, ამდენი რომ ჰქონდეს „ანტიკორუფციულ მოძრაობას“, ისანში კი არ დავსხდებოდით, ვაკეში ავიღებდით ოფისს, მეორადი კომპიუტერების ნაცვლად ახლები გვექნებოდა, მაგრამ ესეც გვყოფნის ჩვენ ოლიგარქებთან ბრძოლისათვის და თამამად შემიძლია ვთქვა, რომ დასასანქცირებელთა სიაში რომ ის ხალხი შეიყვანეს, ვისზეც მთელი ზაფხულის განმავლობაში ვსაუბრობდით, – 6 ადამიანი, სხვებზე არ გვიმუშავია, – არის ჩვენი დამსახურება. მე ამით ვამაყობ, რომ სამშობლოს ვეხმარები კრიმინალებისგან გათავისუფლებაში.
დავუბრუნდეთ კითხვას შემდეგი ფორმულირებით: თქვენ ახსენეთ, რომ დავით კეზერაშვილი ორგანიზაციას და სხვადასხვა ოპოზიციურ აქტორს ეხმარება, რათა მათ მოახერხონ რეჟიმთან ბრძოლა. და კიდევ ერთხელ, იგი არის ოპოზიციური ტელეარხის მფლობელი. იმ დროს, როცა ენმ-ის თავმჯდომარე მიიჩნევს, რომ მას არ აქვს გულწრფელი ზრახვები პოლიტიკასთან დაკავშირებით, ფიქრობთ თუ არა, რომ შეიძლება გაჩნდეს კითხვის ნიშნები იმასთან დაკავშირებით, რა მიზნით ეხმარება იგი ამ ოპოზიციურ აქტორებს, მათ შორის „ანტიკორუფციულ მოძრაობას“.
კონკრეტული კითხვა, რა მიზნით ეხმარება, ალბათ თავად დავით კეზერაშვილთან არის. ოპოზიციურ ველზე რომ ბევრ ადამიანს ეხმარება, ნიშნავს, რომ ზოგადად ოპოზიციას ეხმარება და ფიქრობს ოპოზიციის გაძლიერებაზე, და კრიტიკული მედიის დამფუძნებელია, რაც ნიშნავს, რომ ქვეყნის დემოკრატიას ეხმარება.
თუმცა მას ფორმალური პოზიცია არ უკავია რომელიმე პარტიაში…
დიახ, სწორია, თქვენც ხომ იცით, რომ არ იკავებს არანაირ თანამდებობას, ოღონდ ოპოზიციურ აქტივობებს აფინანსებს.
საქმე სწორედ ეს არის…
დასაძრახი ამაში რა არის? თანაც, რასაც თავად უსვამთ ხაზს, ეგ ინფორმაცია იძლევა იმის თქმის საშუალებას, რომ მას კონკრეტული პარტია კი არ აინტერესებს, არამედ ზოგადად ოპოზიციურ ფლანგზე რუს ოლიგარქთან ბრძოლაში ეხმარება ოპოზიციას და ერთადერთი ბიზნესმენია, რომელიც ხელისუფლებაზე არ არის დამოკიდებული.
ხელისუფლება, ვინც ადგილობრივი ბიზნესმენია, ყველას პრობლემას უქმნის. ჩვენ ხომ ვიცით, ყველა ბიზნესს, ვინც არ ემორჩილება, ებრძვის. ეს ადამიანი არის ქვეყნის გარეთ. მას არ აქვს ქვეყნის შიგნით ბიზნესები, რითაც შეიძლება უზრუნველყოს ივანიშვილმა მისი ფინანსური წნეხი. ეს ძალიან მნიშვნელოვანია.
ქვეყნის შიგნით მყოფ ბიზნესაქტორებზე [ივანიშვილს] მარტივად შეუძლია ზეგავლენის მოხდენაც და მათი მარწუხებში მოქცევაც, და თუ დასჭირდა, სამართლებრივი დევნაც. ამის მაგალითია მამუკა ხაზარაძე. საზოგადოებას თავისი წარმოდგენები აქვს მის ავკარგიანობაზე, – ვიღაცას მოსწონს, ვიღაცას არა, – თუმცა, რომ დასჭირდა ივანიშვილს, მასზეც აამოქმედა თავისი რესურსები, ბერკეტები და წნეხი.
და ერთადერთი ადამიანია, რომელიც არ არის დამოკიდებული ივანიშვილზე და, ვფიქრობ, უმნიშვნელოვანესია მისი დახმარება ოპოზიციურ ველზე.
რა გარანტია არსებობს იმისა, რომ მისი დახმარება სხვადასხვა ოპოზიციური აქტორის მიმართ მომავალში არ გადაითარგმნება მის ხელში ბერკეტად?
ფანტასტიკური შეკითხვა დასვით. ამას უნდა არეგულირებდეს, მათ შორის, კანონები და ეს არ უნდა იყოს დამოკიდებული პოლიტიკოსებზე. შესაძლოა, დღეს ვინმე ვინმეს საერთოდ არ ეხმარებოდეს, მაგრამ ხვალ თუ ხელისუფლებაში მოვა ვინმე, შესაძლოა მან მაინც ბოროტად გამოიყენოს ვინმეს სასარგებლოდ. ეს არ გამოირიცხება, თუ შესაბამისი კანონები არ იქნება.
შესაძლოა, საერთოდ არ იყოთ თქვენ ოლიგარქი და მე თუ ცუდი ხელისუფალი ვიქენი და ცუდი კანონები იქნება, თქვენ გაგხადოთ 2 დღეში დიდი ფულის პატრონი. ამიტომ, ეგეთი რამეები გამოირიცხება კანონმდებლობით.
როგორც, მაგალითად, საქ.მმართველობაში პირადობის მოწმობის აღებაში ფული უნდა გადაგეხადათ, თუ პროცესის დაჩქარება გინდოდათ. დღეს ეს წესი არის ყველასთვის ერთი. 3 დღეში გინდა? იხდი. 10 დღეში გინდა? ნაკლებს იხდი. [გამოცდების] ჩაბარებაზეც, ჩემს ლამაზ თვალებზე კი არ არის, ისეთი სისტემაა შექმნილი, სადაც კორუფცია აღარ არის და მინისტრის შვილიც და რიგითი მოქალაქის შვილიც ერთ პირობებში აბარებენ გამოცდას. ეგ არის გარანტი ჩვენი ქვეყნის განვითარებისა. ეგ უნდა დავივიწყოთ.
ჩვენ გვჭირდება შესაბამისი კანონები, შესაბამისი სამართლებრივი აქტები, რაც უზრუნველყოფს ჩვენი ქვეყნის დემოკრატიულ განვითარებას.
ესე იგი, უშვებთ იმასაც, რომ დროთა განმავლობაში, მსგავსი პრევენციული კანონების არარსებობის პირობებში, შესაძლოა, კეზერაშვილის ფიგურაც გახდეს [პრობლემური]?
ეს არანაირად არ გამომდინარეობს ჩემი ნათქვამიდან… მსგავსი რამ არ მითქვამს. ეს გაიგეთ?
მე კითხვა შემოგიბრუნეთ იმ პასუხზე დაყრდნობით, რაც თქვენგან მივიღე.
ვფიქრობ, გასაგებად ჩამოვაყალიბე. გულწრფელად გეუბნებით, ეს ჩემი მაქსიმუმია, უკეთ ვერ ავხსნი.
„ნეტგაზეთი“ ცდილობს ამავე საკითხზე ინტერვიუს ჩაწერას ენმ-ის თავმჯდომარე ნიკა მელიასთან და დავით კეზერაშვილთან.
