სამოქალაქო საზოგადოების ორგანიზაციები გმობენ GLOBSEC-ის ფორუმზე პრემიერ-მინისტრ ირაკლი ღარიბაშვილის მიერ გაკეთებულ განცხადებას, რომელიც იმეორებს კრემლის პოზიციას და უკრაინის ტერიტორიაზე რუსეთის უსამართლო შეჭრის მიზეზად უკრაინის ნატო-ში გაერთიანების სურვილს მიიჩნევს.

„პრემიერ-მინისტრს შევახსენებთ, რომ უკრაინის ნატო-ში გაწევრება უკრაინის ხალხის ისტორიული არჩევანია, რომელიც უკრაინის კონსტიტუციით არის გამყარებული. პრემიერს შევახსენებთ იმასაც, რომ ჰელსინკის აქტი განსაზღვრავს თითოეული ქვეყნის სუვერენულ უფლებას, თავისი შეხედულებისამებრ შეუერთდეს ნებისმიერ ხელშეკრულებას ან ალიანსს“, — ნათქვამია არასამთავრობო ორგანიზაციების გაცხადებაში.

არასამთავრობო ორგანიზაციები სინანულს გამოთქვამენ იმის გამო, რომ პრემიერ-მინისტრის გამოსვლა სრულად იყო თანხვედრაში კრემლის ნარატივთან და ირაკლი ღარიბაშვილმა არც ამჯერად გამოიყენა შესაძლებლობა, ყველა შესაძლო ფორმით დაეგმო რუსეთის ფედერაციის უსამართლო და არაპროვოცირებული თავდასხმა უკრაინაზე.

ისინი შეახსენებენ პრემიერ-მინისტრს, რომ ის წარმოადგენს სახელმწიფოს, რომლის ხალხმაც, აბსოლუტური უმრავლესობით, 2008 წლის 5 იანვარს გამართული პლებისტიცის საფუძველზე, მხარი დაუჭირა საქართველოს ნატოში გაწევრებას. აღნიშნული არჩევანი გამყარებულია საქართველოს კონსტიტუციის 78-ე მუხლით, რომლის მიხედვითაც კონსტიტუციურმა ორგანოებმა თავიანთი უფლებამოსილების ფარგლებში ყველა ზომა უნდა მიიღონ ევროპის კავშირსა და ნატოში საქართველოს სრული ინტეგრაციის უზრუნველსაყოფად.

განცხადებას ხელს აწერენ შემდეგი ორგანიზაციები:

• ადამიანის უფლებათა ცენტრი;
• დემოკრატიის კვლევის ცენტრი;
• ეკონომიკური პოლიტიკის კვლევის ცენტრი;
• ინფორმაციის თავისუფლების განვითარების ინსტიტუტი;
• მედიის განვითარების ფონდი;
• მმართველობის მონიტორინგის ცენტრი;
• პარტნიორობა ადამიანის უფლებებისთვის;
• პრევენცია პროგრესისთვის;
• რონდელის ფონდი;
• საერთაშორისო გამჭვირვალობა-საქართველო;
• საქართველოს ახალგაზრდა იურისტთა ასოციაცია;
• საქართველოს დემოკრატიული ინიციატივა
• საქართველოს სასამართლოს გუშაგი;
• სოციალური სამართლიანობის ცენტრი;
• ტოლერანტობის და მრავალფეროვნების ინსტიტუტი;
• უფლებები საქართველო;
• ფონდი ღია საზოგადოება საქართველო;
• წამების მსხვერპლთა რეაბილიტაციის საერთაშორისო ცენტრი.

საქართველოს პრემიერ-მინისტრმა ირაკლი ღარიბაშვილმა ბრატისლავაში, გლობალური უსაფრთხოების ფორუმზე 30 მაისს გამართული დისკუსიისას რუსეთის უკრაინაში შეჭრის „ერთ-ერთი მიზეზად“ ნატოს გაფართოება დაასახელა.

ღარიბაშვილმა უკრაინაში ომის “ერთ-ერთ მიზეზად” ნატოს გაფართოება დაასახელა