ახალი ამბები

სწორი პოზიციაა, სჯობს, აქ დავსვათ წერტილი – უგულავა კეზერაშვილს ეთანხმება

29 სექტემბერი, 2022 • 577
სწორი პოზიციაა, სჯობს, აქ დავსვათ წერტილი – უგულავა კეზერაშვილს ეთანხმება

„სწორი პოზიციაა“, — ასე ეხმაურება ენმ-ის და „ევროპული საქართველოს“ ყოფილი წევრი, ოპოზიციონერი პოლიტიკოსი გიგი უგულავა ტელეკომპანია „ფორმულას“ დამფუძნებლისა და თავდაცვის ყოფილი მინისტრის დავით კეზერაშვილის განცხადებას.

„ვისაც პოლიტ „რაზბორკების“ გაგრძელება სურს, თბილისში ბევრი ჩიხია. ჩაიცუცქოს და არჩიოს საქმე. სჯობს აქ დავსვათ წერტილი, მეგობრებო!“, — წერს უგულავა Facebook-ზე, სადაც დავით კეზერაშვილის პოსტს აზიარებს.

ტელეკომპანია „ფორმულას“ დამფუძნებელი და თავდაცვის ყოფილი მინისტრი დავით კეზერაშვილი განცხადებას ავრცელებს. წერილში კეზერაშვილი ეხმაურება ნიკა მელიას მიერ რამდენიმე დღის წინ გაკეთებულ განცხადებას  და აცხადებს, რომ არასოდეს ჩარეულა და არც მომავალში აპირებს ჩაერიოს რომელიმე ცალკეული ოპოზიციური პარტიების დღის წესრიგის განსაზღვრაში.

მისი თქმით, უკვე მრავალი წელია, სახელისუფლებო მედია, რუსული პროპაგანდის სტილში, არ ერიდება მის მიმართ ტყუილსა და ცილისწამებას.

კეზერაშვილის თქმით, გულდასაწყვეტი სიახლე ისაა, რომ ამდაგვარ კამპანიაში ცალკეული ოპოზიციური ლიდერებიც ჩაერთნენ:

„ჩემი გააზრებული არჩევანია, არ შევიდე ამ გაუგებარ კინკლაობაში. ჩემი სახელის ირგვლივ ატეხილი ხმაურის და ბრალდებების მიუხედავად, არ ვაპირებ ამ დამაზიანებელ დისკუსიაში მონაწილეობას, რადგან ვთვლი, ამ ყველაფერს ერთი გამარჯვებული ეყოლება– ბიძინა ივანიშვილი და მისი ოლიგარქიული, პრორუსული რეჟიმი“, — აცხადებს კეზერაშვილი.

დავით კეზერაშვილი განცხადებას ავრცელებს

„ნაციონალური მოძრაობის“ თავმჯდომარის, ნიკა მელიას თქმით, მას მიაჩნია, რომ ენმ-ის მმართველობის დროინდელი თავდაცვის მინისტრი დავით კეზერაშვილი „არ არის გულწრფელი“ ბიძინა ივანიშვილთან ბრძოლაში და რაც უფრო შორს იქნება იგი პოლიტიკური სპექტრისგან, მით უკეთესი იქნება პოლიტიკური ცხოვრებისთვის. მან ასევე ახსენა ტერმინი „მოოლიგარქო ტიპაჟი“.

„ნაციონალური მოძრაობის“ ლიდერების ნაწილმა, – ლევან ხაბეიშვილმა, დავით კირკიტაძემ, გიორგი ბოტკოველმა, – მელია ამ ნათქვამის გამო გააკრიტიკეს.

ვრცლად:

მასალების გადაბეჭდვის წესი