საქართველოს პარლამენტის თავმჯდომარე, შალვა პაპუაშვილი გმობს რუსეთის მიერ დონეცკისა და ლუგასკნის “დამოუკიდებელ სახელმწიფოებად” ცნობას და აცხადებს, რომ საერთაშორისო თანამეგობრობამ ახლა მტკიცედ უნდა იმოქმედოს, რათა თავიდან აირიდოს ომი უკრაინაში. ამის შესახებ პაპუაშვილმა Twitter-ზე დაწერა:
“უკრაინის ტერიტორიების “დამოუკიდებელ სახელმწიფოებად” აღიარება საერთაშორისო სამართლის აშკარა დარღვევაა. საქართველო სოლიდარობას უცხადებს უკრაინას. კრიტიკულად მნიშვნელოვანია, რომ საერთაშორისო თანამეგობრობამ იმოქმედოს მტკიცედ, რათა თავიდან აირიდოს ომი და დაიცვას საერთაშორისო სამართლის ფუნდამენტური პრინციპები”, – წერს პაპუაშვილი.
Recognition of Ukraine’s territories as ‘independent states’ is a blatant violation of international law. Georgia stands in solidarity with #Ukraine. It is critical from international community to act resolutely to avoid war and protect fundamental principles of int. law.
— Shalva Papuashvili 🇬🇪 (@shpapuashvili) February 21, 2022
21 თებერვალს რუსეთმა დონეცკისა და ლუგანსკის რეგიონები დამოუკიდებელ “რესპუბლიკებად” ცნო. ეს გადაწყვეტილება რუსეთის პრეზიდენტმა ვლადიმირ პუტინმა უსაფრთხოების საბჭოს სხდომის შემდეგ, სპეციალურ მიმართვაში გამოაცხადა.
გადაწყვეტილების მიღებამდე პუტინმა საბჭოს სხვადასხვა წევრს მოუსმინა. მათ შორის იყო პრემიერ-მინისტრი დიმიტრი მედვედევი, რომელმაც 2008 წლის ომზეც ისაუბრა და თქვა, რომ რუსეთმა მაშინ მწარე გამოცდილებით ისწავლა, რომ სანქციებთან გამკლავება შესაძლებელია.
მანამდე თვითაღიარებული რესპუბლიკების ლიდერებმა პუტინს დამოუკიდებლობის აღიარების თხოვნით მიმართეს. იგივე გადაწყვეტილება მიიღო რუსეთის პარლამენტმა.
უკვე რამდენიმე კვირაა დასავლეთის ქვეყნები უკრაინაში რუსეთის შეჭრის საფრთხეზე საუბრობენ. მზარდი დაძაბულობის ფონზე, დიდი ბრიტანეთის პრემიერ-მინისტრი, ბორის ჯონსონი ამბობს, რომ რუსეთი 1945 წლის შემდეგ ყველაზე მასშტაბურ ომს გეგმავს.
აშშ-ს აქვს მოლოდინი, რომ პუტინი კვლავ აპირებს ომს. CNN-თან ინტერვიუში სახელმწიფო მდივანმა, ენტონი ბლინკენმა განაცხადა, რომ სახეზეა ყველა ქმედება, რომელიც წინ უსწრებს უკრაინაში რეალურ შეჭრას.
18 თებერვალს დონბასისა და ლუგანსკის ლიდერებმა რუსეთში მოსახლეობის ევაკუაცია დაიწყეს. მანამდე კი პუშილინმა თქვა, რომ არ გამორიცხავს, დახმარებისთვის რუსეთს მიმართოს.
