პარლამენტის ორმა კომიტეტმა მხარი დაუჭირა სახელმწიფო ინსპექტორის სამსახურის გაუქმებას. „ოცნების“ დეპუტატებმა საკითხს მხარი ერთხმად დაუჭირეს, მიუხედავად ოპოზიციის, სამოქალაქო სექტორისა და თავად სახელმწიფო ინსპექტორის სამსახურის წინააღმდეგობისა.
საპროცედურო საკითხთა და წესების, ასევე, ადამიანის უფლებათა დაცვისა და სამოქალაქო ინტეგრაციის კომიტეტების ერთობლივი სხდომა დღეს, 28 თებერვალს გაიმართა, სადაც დაჩქარებული წესით განიხილეს სადავო კანონპროექტი.
დილით პარლამენტში იყო მისული აშშ-ის ელჩი კელი დეგნანი, რომელიც მმართველი გუნდის დეპუტატებს შეხვდა სწორედ ამ საკითხთან დაკავშირებით. ელჩმა „ოცნებას“ მოუწოდა, დაჩქარებულად არ განეხილათ ინსპექტორის სამსახურის გაუქმების საკითხი, რაზეც დეპუტატმა ანრი ოხანაშვილმა თქვა, რომ პარლამენტი „სუვერენულ გადაწყვეტილებას“ მიიღებდა.
მისი თქმით, ახალი კანონპროექტით არა სახელმწიფო ინსპექტორის სამსახურის რეორგანიზაცია, არამედ სამსახურის ლიკვიდაცია ხდება.