ახალი ამბები

სასიცოცხლოდ აუცილებელია, ამ ვერაგი დანაშაულის ჩამდენმა აგოს პასუხი — რელიგიათა საბჭო

18 სექტემბერი, 2021 • 1283
სასიცოცხლოდ აუცილებელია, ამ ვერაგი დანაშაულის ჩამდენმა აგოს პასუხი — რელიგიათა საბჭო

სახალხო დამცველთან არსებული რელიგიათა საბჭო მიმდინარე კვირაში გავრცელებული, სავარაუდოდ, სახელმწიფო უსაფრთხოების სამსახურიდან გაჟონილი ფაილების შესახებ განცხადებას ავრცელებს. რელიგიური ორგანიზაციების განცხადებით, მასალებით ცნობილი ხდება, რომ სუსი უკანონოდ უსმენდა ყველა რელიგიური ორგანიზაციის ლიდერს, სასულიერო პირსა თუ მათ ახლობლებს.

“ნეტგაზეთი” უცვლელად გთავაზობთ რელიგიათა საბჭოს განცხადებას:

სახალხო დამცველთან არსებული ტოლერანტობის ცენტრისა და რელიგიათა საბჭოს წევრი რელიგიური გაერთიანებების პროტესტი გავრცელებული საიდუმლო მასალების წინააღმდეგ ჩვენ გაოგნებული ვართ და გამოვხატავთ უკიდურეს პროტესტს გავრცელებული საიდუმლო მონაცემებისა და მათში ასახული ინფორმაციის გამო.

როგორც მედიის მიერ მოპოვებული მასალებით გახდა ცნობილი, სახელმწიფო უსაფრთხოების სამსახური ახორციელებდა უკანონო და ყოვლისმომცველ მოსმენასა და თვალთვალს სახალხო დამცველთან არსებული რელიგიათა საბჭოსა და ტოლერანტობის ცენტრის საქმიანობაზე, ყველა რელიგიური ორგანიზაციის ლიდერზე, სასულიერო პირებზე, მრევლზე, მათი ოჯახის წევრებსა და ახლობლებზე, – მათ შორის არასრულწლოვნებზე, ყველაზე, ვინც მათთან ამა თუ იმ ფორმით იყო დაკავშირებული, განურჩევლად იმისა, რელიგიურ უმცირესობას თუ უმრავლესობას მიეკუთვნებიან ისინი.

ამავდროულად, გავრცელებული მასალების მიხედვით, შეგვიძლია გამოვიტანოთ დასკვნა, რომ რელიგიური ორგანიზაციების წარმომადგენლებისა და რელიგიის თავისუფლების დამცველების წინააღმდეგ შემუშავებული იყო მათი საქმიანობისა და პირადი ცხოვრების მადისკრედიტირებელი საგანგებო ღონისძიებები.

მედიით გავრცელებული მასალების მიხედვით, ცნობილი გახდა, რომ განსხვავებული რელიგიური ჯგუფებისა და მათი უფლებების დამცველების საქმიანობის შესწავლა მიმდინარეობდა კონტრდაზვერვითი ღონისძიებების მეშვეობით, თითქოსდა სახელმწიფოსა და საქართველოს საპატრიარქოს რეპუტაციისა და ერთიანობის წინააღმდეგ საქმიანობის გამოვლინების კონტექსტში.

გავრცელებული მასალები შეიძლება მეტყველებდეს მხოლოდ და მხოლოდ იმაზე, რომ ხელისუფლება, უსაფრთხოების სამსახურის მეშვეობით, ჩადიოდა უმძიმეს დანაშაულს ადამიანის, საკუთარი მოქალაქეების, ყველა რელიგიური გაერთიანების, სამოქალაქო საზოგადოების, საქართველოს კონსტიტუციის, საქართველოს სახელმწიფოს დემოკრატიული და სეკულარული წყობის წინააღმდეგ.

თავისი შინაარსით უპრეცედენტო და ყოვლისმომცველი ხასიათის ეს უმძიმესი მოვლენა, აგრეთვე გვეუბნება იმის შესახებ, რომ რელიგიური გაერთიანებების წარმომადგენლები და უფლებადამცველები, ყველა ადამიანი, რომელიც უკანონო თვალთვალისა და მოსმენის მსხვერპლი გახდა, თავს საქართველოში ვეღარ იგრძნობს დაცულად და უსაფრთხოდ.

რელიგიათა საბჭოს წევრები ვმსჯელობთ სამართლებრივ გზებზე, საერთაშორისო მექანიზმებზე, რომელთაც შეიძლება მივმართოთ ჩვენი უფლებებისა და თავისუფლების, ჩვენი უსაფრთხოების დასაცავად. ამავდროულად, მოგიწოდებთ ყველას:

საქართველოს ხელისუფლებას, ოპოზიციურ პარტიებს, უფლებადამცველ ორგანიზაციებს, რელიგიურ გაერთიანებებს, მედიას, კერძო პირებს გაათმაგებული სიფრთხილით მოეკიდოთ გავრცელებულ საიდუმლო მონაცემებს, რამდენადაც მათში არსებულმა ინფორმაციამ, შესაძლოა უმძიმესი, სრულიად დაუმსახურებელი და გამოუსწორებელი ზიანი მიაყენოს თითოეული ადამიანის უსაფრთხოებასა და რეპუტაციას, მათ შორის, რაც ყველაზე საგანგაშოა, – არასრულწლოვნებს.

ასევე, დასახელებული მიზეზების გამო, გადაუდებელ აუცილებლობად მიგვაჩნია, რამდენადაც ეს შესაძლებელი იქნება, შეიზღუდოს წვდომა გავრცელებული ფაილების შინაარსზე და სრულად უზრუნველყონ ნებისმიერი პირადი ხასიათის ინფორმაციის დახურვა.

და ბოლოს, კიდევ ერთხელ: ჩვენ უმკაცრესად ვგმობთ და ვაპროტესტებთ სახელმწიფოს მიერ ადამიანის, უდანაშაულო და კანონმორჩილი მოქალაქეებისა და რელიგიური გაერთიანებების წინააღმდეგ ჩადენილ ტოტალური ხასიათის ბოროტებას! სასიცოცხლოდ აუცილებელია ამ ვერაგი დანაშაულის გამო პასუხი აგოს მისმა ჩამდენმა!

განცხადებას ხელს აწერენ:

სახალხო დამცველთან არსებული ტოლერანტობის ცენტრი; ქართველ მუსლიმთა კავშირი; სრულიად საქართველოს მუსლიმთა უმაღლესი სასულიერო სამმართველო; ლათინ კათოლიკეთა ამიერკავკასიის სამოციქულო ადმინისტრაცია; ევანგელურ ბაპტისტური ეკლესია; სახარების რწმენის ეკლესია; ხსნის არმია; ევანგელური ეკლესია სიცოცხლის სიტყვა; საქართველოს ევანგელისტური ეკლესია; დახსნილ ქრისტიანთა საღვთო ეკლესია; აჰმადია მუსლიმები გაერთიანება; მეგობართა საზოგადოება – კვაკერები; სვედენბორგის რელიგიური საზოგადოება.

რა მოხდა?

13 სექტემბერს ინტერნეტსივრცეში საჯაროდ ხელმისაწვდომი გახდა სასულიერო პირებთან, ჟურნალისტებთან და სხვებთან დაკავშირებული ასეულობით ფაილი, რომელიც, სავარაუდოდ, სუს-იდან არის გამოჟონილი. არაერთმა ჟურნალისტმა, მათ შორის, “ნეტგაზეთის” რეპორტიორმა, ფაილებში თავისი საუბრები ამოიცნო რესპონდენტებთან და სხვებთან.

ოპოზიციის თქმით, ფაქტი არის დასტური იმისა, თუ როგორ უსმენს და აკონტროლებს ყველაფერს სუსი. რაც შეეხება“ქართული ოცნებას”: მმართველი პარტიის რიტორიკა ბოლო დღეებში შეიცვალა:

თავდაპირველად, მმართველი გუნდის ლიდერები აღნიშნულს ეკლესიისა და სახელმწიფოს წინააღმდეგ ბრძოლად აფასებენ და ამაში ცალსახად ოპოზიციურ პარტიას, “ნაციონალურ მოძრაობას” ადანაშაულებდნენ. თუმცა ორი დღის განმავლობაში მის რიტორიკაში გაჩნდა ვერსია ექსპრემიერ გიორგი გახარიას გუნდის მიერ ინფორმაციის გატანაზე, თავად ფარული ჩანაწერების შინაარს კი ოცნებაში “ტყუილ-მართალს” უწოდებენ.

აღნიშნულთან დაკავშირებით პროკურატურამ გამოძიება დაიწყო. პროცესი კერძო კომუნიკაციის საიდუმლოების დარღვევის ფაქტზე, საქართველოს სისხლის სამართლის კოდექსის 158-ე მუხლის პირველი და მე-2 ნაწილებით მიმდინარეობს. სუს-მა განცხადება 14 სექტემბერს გაავრცელა და პროკურატურასთან თანამშრომლობის მზაობა გამოთქვა.

გერმანიის ელჩის კომენტარი მის სავარაუდო მოსმენაზე

მასალების გადაბეჭდვის წესი