ახალი ამბებირეკლამა

მაგთიკომი პარლამენტს მოუწოდებს კომუნიკაციების კომისიის საქმიანობა შეაფასოს

15 ივნისი, 2021 • 784
მაგთიკომი პარლამენტს მოუწოდებს კომუნიკაციების კომისიის საქმიანობა შეაფასოს

მაგთიკომი საქართველოს პარლამენტის თავმჯდომარესა და წევრებს განცხადებით მიმართავს და მოუწოდებს  კომუნიკაციების ეროვნული კომისიის საქმიანობა შეაფასოს. კომპანია პარლამენტის წინაშე ასევე  აყენებს საკითხს იმსახურებს თუ არა ნდობას კომისიის თავმჯდომარე კახა ბექაური.

მოგმართავთ საქართველოს პარლამენტს ღია წერილით, რომელშიც ასახულია მაგთიკომის საჯარო განცხადებები – საქართველოს კომუნიკაციების ეროვნული კომისიის მიერ გამოქვეყნებულ არაკომპეტენტურ, ყალბი ინფორმაციით გაჯერებულ 2020 წლის ანგარიშზე და საქართველოს კომუნიკაციების ეროვნული კომისიის თავმჯდომარის ბატონი კახა ბექაურის ქმედებებზე.  

კომუნიკაციების კომისია უკიდურესად დაპირისპირებულია დარგში მოღვაწე თითქმის ყველა სუბიექტთან. დარგში მოღვაწე კომპანიები გაუთავებელ სასამართლო დავებში იმყოფებიან კომუნიკაციების კომისიასთან. არაკომპეტენტურობა, ტყუილი, დაუმსახურებელი სანქცირება (უკანონო გადაწყვეტილებები) და შერჩევითი სამართალი გახდა ნორმა/ სტილი კომისიის მუშაობისა. მის ხელში დარგი ნადგურდება, მას არ ესმის დარგის მნიშვნელობა, კიბერუსაფრთხოება თუ ეკონომიკის პრინციპები. კიბერუსაფრთხოების გაზრდილი რისკების უგულვებელყოფამ შეიძლება პარალიზებამდე მიიყვანოს ქვეყანა, იქნება ეს თავდაცვა, ჯანდაცვა, განათლება, საბანკო-საფინანსო სექტორი, ვაჭრობა, ტურიზმი თუ ნებისმიერი სხვა მიმართულება.  

2017-2018 წლებში საქართველოს ბაზრიდან ორი უდიდესი საერთაშორისო ინვესტორი კომპანია (თელია სონერა და მეტრომედია) გავიდა. ზოგადად, კომისიის არაპროგნოზირებადი გადაწყვეტილებები ხელს უშლის და აფრთხობს ინვესტორს.  

უნდა აღინიშნოს, რომ კომისიის არასწორი, არაკომპეტენტური და უკანონო მიდგომების ფონზე, ჩვენი კომპანია იძულებული გახდა მაქსიმალურად ფრთხილად შეხედოს მომავალს, როგორც ახალი ტექნოლოგიების დანერგვის კუთხით, ასევე არსებითი კაპიტალდაბანდების განხორცილების მიმართულებით, იმ დროს, როდესაც მაგთიკომი ყოველდღიურად 40 კმ. ოპტიკური კაბელის მშენებლობას წარმატებით ახორციელებდა საქართველოს რეგიონების ინტერნეტიზაციის და მოქალაქეებისათვის ფიქსირებული ინტერნეტის ხელმისაწვდომობის უზრუნველსაყოფად.  

კომისიის უსუსური გადაწყვეტილებები გახდა საბაბი, რომ აშშ-ს სახელმწიფო დეპარტამენტის 2020 წლის ანგარიშში საქართველოზე, კომუნიკაციების კომისია ნეგატიური კუთხით მოხვდა. 

თქვენთვის ცნობილია ვენეციის კომისიის ნეგატიური დასკვნები კომუნიკაციების კომისიის ავტორობით შექმნილ საკანონმდებლო ცვლილებებზე.  

“ფრიდომ ჰაუსის” ანგარიშში კომუნიკაციების კომისიის ქმედება უარყოფითად არის შეფასებული.  

კომისიის მხრიდან, ხშირად ხდება ევროპული რეგულაციების არასწორი ინტერპრეტაცია. კანონების და რეგულაციების საკუთარ თავზე მორგება, რაც მნიშვნელოვან პრობლემას უქმნის დარგს. ასე, მაგალითად: კომისიის თავმჯდომარის რამოდენიმე ვადით არჩევა; კონკურენციის კანონის მორგება კომუნიკაციების კომისიაზე იმ ვადით, სანამ ბატონი ბექაური იქნება თავმჯდომარე…  

ისმის ლოგიკური კითხვა: კიდევ რა უარყოფითი უნდა მოახერხოს ამჟამინდელმა კომისიამ დარგის გასანადგურებლად?!  

გვინდა აღვნიშნოთ, რომ საქართველოს კომუნიკაციების ეროვნული კომისიის 2019 წლის ანგარიში პარლამენტს ჯერ კიდევ არ განუხილავს. ვიმედოვნებთ, რომ 2019 წლის და 2020 წლის ანგარიშების მოსმენა გაიმართება უახლოეს მომავალში.  

მოგიწოდებთ პარლამენტის წევრებს შეაფასოთ საქართველოს კომუნიკაციების ეროვნული კომისიის საქმიანობა, დადებითია თუ უარყოფითი, ხოლო კომისიის თავმჯდომარე ბატონი კახა ბექაური იმსახურებს თუ არა ნდობას? “


ვრცლად ამავე თემაზე შეგიძლიათ წაიკითხოთ:

მაგთიკომის განცხადება კომუნიკაციების კომისიის 2020 წლის ანგარიშზე

მაგთიკომის განცხადება საქართველოს კომუნიკაციების ეროვნული კომისიის თავმჯდომარის ქმედებებზე

 

მასალების გადაბეჭდვის წესი