აშშ-ის საკვებისა და მედიკამენტების ადმინისტრაციამ (FDA) ალცჰაიმერის დაავადების გამომწვევი მიზეზის სამკურნალო მედიკამენტი დაამტკიცა. მედიკამენტის სახელწოდებაა ადუჰელმი, მწარმოებელი კი კომპანია Biogen. ინფორმაციას ამის შესახებ უცხოური მედია ავრცელებს.

Bloomberg-ის ცნობით, FDA-მ ანტისხეულების თერაპიას დაჩქარებული ავტორიზაცია მისცა, რაც ნიშნავს, რომ მედიკამენტის მწარმოებელი კომპანია Biogen-მა მედიკამენტების სარგებლიანობის დასამკტიცებლად დამატებითი კვლევები უნდა აწარმოოს.

მიუხედავად იმისა, რომ ზოგიერთი მეცნიერი აღნიშნული თერაპიის მიმართ სკეპტიკურად იყო განწყობილი, პაციენტთა ადვოკატირების ჯგუფმა მედიკამენტს მხარი დაუჭირა.

FDA-ის ცნობით, ორგანიზაცია მხარს უჭერს წამლის ბაზარზე განთავსებას, რადგან ის ამცირებს ამილოიდებს – წებოვან, მავნე ცილას, რომელიც ალცჰაიმერით დაავადებული პაციენტების ტვინის მუშაობას აფერხებს.

“ეს არის კარგი ამბავი ალცჰაიმერით დაავდებული პაციენტებისთვის, ჩვენ აქამდე არ გვქონია დაავადების მოდიფიკაციის თერაპიის დამტკიცების შემთხვევა. თუმცა ეს არ იქნება განკურნებისთვის, მედიკამენტი დაავადების პროგრესს შეანელებს”, – განაცხადა მაიოს კლინიკის ექიმმა და ალცჰაიმერის დაავადების ექსპერტმა რონალდ პეტერსენმა.

Biogen–ის აღმასრულებელმა დირექტორმა მიშელ ვონატსოსმა განაცხადა, რომ კომპანიას უკვე წარმოებული აქვს წამლის მილიონობით ფლაკონი და ბაზარზე 10 დღიდან 2 კვირის ვადაში განთავსდება.

მედიკამენტების კვლევებში მონაწილეობას ძირითადად დაავადების საწყის ეტაპზე მყოფი პაციენტები იღებენ, თუმცა, ვონასტსისის განმარტებით, ადუჰელმის გამოყენება შესაძლებელი იქნება ალცჰაიმერის მქონე სხვა პაციენტებისთის, თუმცა მედიკამენტის დანიშვნის გადაწყვეტილებას მკურნალი ექიმები მიიღებენ.

აღნიშნულ პრეპარატზე კვლევები და დაკვირვება დიდი ხნის განმავლობაში გრძელდებოდა, საბოლოო გადაწყვეტილება კი FDA-მ 7 ივნისს მიიღო.