მთავრობის მიერ გამოცხადებულ უქმე დღეებში იუსტიციის სახელები იმუშავებს. გავრცელებულ განცხადებაში წერია, რომ იუსტიციის სახლები და საზოგადოებრივი ცენტრები მომხმარებელს 4-დან 11 მაისის პერიოდის  უქმეებზეც მოემსახურება. ამასთან, ამ პერიოდში ხელმისაწვდომი იქნება იუსტიციის სახლის ყველა სერვისი.

“იუსტიციის სახლები და საზოგადოებრივი ცენტრები არ იმუშავებენ მხოლოდ აღდგომის დღესასწაულის უქმეებში – 30 აპრილიდან 3 მაისის ჩათვლით და შაბათ-კვირას, 8 და 9 მაისს.  ამავე პერიოდში მიუწვდომელი იქნება იუსტიციის სახლის სატელეფონო მომსახურების ცენტრიც.

შეგახსენებთ, რომ იუსტიციის სახლსა და საზოგადოებრივ ცენტრში მომსახურების მიღება  კვლავ პორტალ MY.GOV.GE-დან  ვიზიტის წინასწარი დაჯავშნის პრინციპითაა  შესაძლებელი.  წინასწარი დაჯავშნის გარეშე  მისული მომხმარებელი სერვისის მიღებას ვერ შეძლებს. ამასთან, იუსტიციის სახლი მოუწოდებს მომხმარებელს, მომსახურების მისაღებად გამოცხადდეს დაჯავშნისას მითითებულ დროს”, — ნათქვამია განცხადებაში.

9 აპრილს მთავრობამ  4-11 მაისი საქართველოს მასშტაბით უქმე დღეებად გამოაცხადა. 26 აპრილს, უწყებათაშორისი საკოორდინაციო საბჭოს სხდომის შემდგომ გამართულ ბრიფინგზე ცნობილი გახდა, რომ 3 მაისიდან 12 მაისის ჩათვლით, საქართველოს ქალაქებში შეიზღუდება მუნიციპალური ტრანსპორტის მუშაობა.